Dörd il bundan əvvəl, yəni 2018-ci il aprelin 11-də dövlət başçısı İlham Əliyev Azərbaycan xalqınınyüksək fəallığı ilə baş tutan seçkilərdə böyük etimad qazanaraq növbəti dəfə prezident seçilmişdir. Həmin vaxtadək Prezident İlham Əliyev ölkəyə rəhbərlik etdiyi 15 ilə yaxın müddət ərzində Ulu öndər Heydər Əliyevin əsasını qoyduğu yolun uğurlu davamçısı olduğunu artıq sübuta yetirmişdi.
Bu dövrdə Bakı-Tbilisi-Ceyhan, Bakı-Tbilisi-Ərzurum neft və qaz kəmərləri fəaliyyətə başlamış, ölkə büdcəsinin gəlirləri dəfələrlə artmışdı. Həyata keçirilən sosial-iqtisadi islahatlar və fəal xarici əməkdaşlıq sayəsində Azərbaycan iqtisadiyyatı güclənmiş, əhalinin rifah halı yüksəlmiş, ölkənin dünyadakı nüfuzu artmış, müsbət beynəlxalq imici formalaşmışdı.
İqtisadi göstəricilərə əsaslansaq, 2003-2018-ci illərdə ümumi daxili məhsul 3,2 dəfə, büdcə gəlirləri 13,5 dəfə, ölkənin strateji valyuta ehtiyatları 26,6 dəfə, xarici ticarət dövriyyəsi 4,6 dəfə artmışdır. Əhalinin nominal gəlirləri 8,6 dəfə, minimum əməkhaqqı 12,9 dəfə, əhalinin banklardakı əmanətləri 30 dəfə artmışdır. Bu dövrdə 1 958 400 yeni iş yeri açılmış, işsizliyin səviyyəsi 9,2 faizdən 5 faizə, yoxsulluğun səviyyəsi 44,7 faizdən 5,4 faizə enmiş, 245 min nəfər məcburi köçkün mənzillə təmin olunmuşdur. Maaşlar təxminən 7 dəfə, pensiyalar 10 dəfədən çox artmışdır.
“Ancaq iqtisadiyyatı güclü olan ölkələr müstəqil siyasət apara bilərlər” – deyən Prezident İlham Əliyev ölkənin iqtisadi tərəqqisini siyasi və hərbi gücün artmasına da yönəldə bilmişdir. Bunun sayəsində Azərbaycan BMT, Avropa Şurası, ATƏT, NATO, Qoşulmama Hərəkatı və bütün digər nüfuzlu beynəlxalq təşkilatların yüksək tribunasından daha qətiyyətlə çıxış etmək imkanı əldə etmiş, bir çox məsələlərdə ölkəmizin rəyi beynəlxalq aləmtərəfindən hörmətlə qarşılanmışdır. 
Məhz bu dövrdə Azərbaycan Ordusu təchizat, silah-sursat, texnika, döyüş qabiliyyəti baxımından güclü ordular sırasına daxil oldu. 2016-cı ilin aprel döyüşləri bütün dünyaya ordumuzun gücünü, qələbə əzmini, ədalətin bərpa olunacağını göstərdi. Həmçinin, həmin illər ərzində işğalçı Ermənistan regional layihələrdən təcrid olunmuş, bütün inkişaf göstəriciləri üzrə Azərbaycandan dəfələrlə geridə qalmışdır.
Bütövlükdə, Prezident İlham Əliyevin ölkəyə rəhbərlik etdiyi 2003-2018-ci illər Azərbaycanın uğurlu inkişaf dövrü kimi tarixə daxil olmuşdur. Ona görə də təsadüfi deyil ki, 2018-ci ildə keçirilən növbəti seçkilərdə Azərbaycan xalqı yenidən Prezident İlham Əliyevə böyük etimad göstərmiş və seçkidən ötən dövr xalqın öz seçimində yanılmadığını bir daha sübuta yetirmişdir.
Bu dövrdə dünya növbəti və daha sərt təlatümlərlə üzləşmiş, COVİD-19 pandemiyası bütün ölkələrin iqtisadiyyatını və səhiyyəsini ciddi sınaq qarşısında qoymuşdur. Prezident İlham Əliyevin rəhbərliyi altında Azərbaycan pandemiya ilə mübarizəni yüksək səviyyədə təşkil edərək insan həyatını qorumaqla iqtisadi zərərləri minimallaşdırmaq arasında balansı təmin edə bilmişdir. Üstəlik, Azərbaycan Qoşulmama Hərəkatının sədri kimi pandemiya ilə mübarizə və vaksinlərin dünya üzrə ədalətli bölgüsü kimi məsələlərdə hərəkat və BMT qarşısında beynəlxalq ictimaiyyətin dəstəyini qazanan mühüm təşəbbüslər irəli sürməklə qlobal səviyyədə liderlik nümayiş etdirmişdir.
Məlumdur ki, bütün siyasi liderlər, seçkilərdə iştirak edən namizədlər xalqın, seçicilərin dəstəyini qazanmaq üçün öz hədəflərini elan edir, bir çox vədlər verirlər. Lakin dünya tarixində verdiyi vədlərin hamısına əməl etməyi bacaran çox az sayda siyasi lider tapmaq mümkündür.
Azərbaycan xalqı ona görə xoşbəxtdir ki, onun seçdiyi, inandığı lider məhz öz sözünə, vədinə sadiq qalan, qarşıya qoyduğu bütün həfədlərə çatmağı bacaran ağıllı, uzaqgörən, vətəninə sonsuz sevgi ilə bağlı olan bir insandır. “Bizim sözümüz imzamız qədər keçərlidir” – deyən Prezident İlham Əliyev Azərbaycanı inkişaf templərinə görə qabaqcıl ölkələr sırasına çıxarmaqla yanaşı, müasir dövrün ən mürəkkəb problemlərindən hesab olunan ərazi münaqişəsinin uğurlu həllinə nail oldu, yüz minlərlə vətəndaşımızın üzərindəki “məcburi köçkün” statusunu aradan qaldıraraq, onların təməl hüquqlarını bərpa etdi.
44 günlük Vətən müharibəsində ordumuzun, xalqımızın şanlı qələbəsini təmin edən Müzəffər Ali Baş Komandan İlham Əliyev “Qarabağ Azərbaycandır!” şüarını heç kimin, hətta bir müddət əvvəl bunun əksini deyən Ermənistan rəhbərliyinin belə inkar edə bilməyəcəyi reallığa çevirdi. Artıq bütün dünya Qarabağın təkcə de-yure deyil, de-fakto da Azərbaycanın olduğunu qəbul edir, Cənubi Qafqazda yaranmış yeni reallıqlarla hesablaşır.
Göründüyü kimi, ağıllı, qətiyyətli lider amili tarixin gedişatını belə dəyişmək iqtidarındadır. Prezident İlham Əliyevin rəhbərliyi altında ölkəmiz bundan sonra da öz müstəqillik tarixinin yeni şanlı səhifələrini yazmaqda davam edəcək.
 
Hülya Məmmədli
Politoloq