Azərbaycan Milli Elmlər Akademiyasının (AMEA) Fizika İnstitutu tərəfindən keçirilən tender müsabiqəsinin qalibi məlum olub.
Sozcu.info yeniavaz-a istinadən bildirir ki, tender müsabiqəsinin qalibi “Felon Ascompany” MMC (VÖEN-1702986881) olub.
“Felon Ascompany” MMC AMEA Fizika İnstitutuna istehlakyönlü müxtəlif xidmətlər (laboratoriya qazlarının 99,999% keyfiyyətdə dolumu, yanğınsöndürmə balonlarının dolumu, katriclərin dolumu) təqdim edəcək və göstəriləcək xidmətlər üçün AMEA-dan 19 min 91 manat 50 qəpik alacaq.
Məlumat üçün bildirək ki, “Felon Ascompany” MMC cəmi 6 ay əvvəl – 25.01.2021-ci il tarixində dövlət qeydiyyatına alınıb. Nizamnamə kapitalı 10 manat olan MMC Səbail rayonu, Abbasqulu Abbaszadə, ev 1/B ünvanında yerləşir. MMC-nin qanuni təmsilçisi Hüseynova Füzuli Adil oğludur.
Cəmi 6 ay əvvəl yaranan təcrübəsiz şirkətin Fizika İnstitutuna xidmətlər göstərməsindən başqa maraqlı məqamlardan biri də odur ki, “Felon Ascompany” MMC -nin  dövlət qeydiyyatına alındığı ünvanda yanvar-fevral aylarında onlarla şirkət qeydiyyata alınıb və bu şirkətlərin qanuni təmsilçiləri də eyni şəxslər olub.
“Felon Ascompany” MMC ilə birgə “Səbail rayonu, Abbasqulu Abbaszadə, ev 1/B” ünvanında qeydə alınan şirkətlərin bəziləri bunlar olub:

Onu da bildirək ki, bu cür maraqlı və şübhəli tender müsabiqələri AMEA tərəfindən əvvəllər də keçirilib. Belə ki, bu ilin aprel ayında AMEA İşlər İdarəsi tərəfindən keçirilən tender müsabiqəsinin qalibi “Service and Supply Ltd.” MMC olub.

“Service and Supply Ltd.” MMC ilə AMEA arasında 129 min 964 manat dəyərində müqavilə imzalanıb.

Tenderlə bağlı diqqət çəkən məqam odur ki, müsabiqənin qalibi olan “Service and Supply Ltd.” MMC -nin qanuni təmsilçisi Rasimli Kəmalə Rasim qızı eyni zamanda AMEA Zoologiya İnstitutunun ümumi işlər üzrə direktor müavinidir.

Qeyd edək ki, “Dövlət satınalmaları haqqında” Qanunun 13-cü maddəsinin 1-ci bəndində açıq şəkildə yazılıb ki, satınalan təşkilatdan hüquqi, maliyyə və ya təşkilatı asılılığı olan malgöndərənlərin (podratçıların) həmin təşkilat tərəfindən keçirilən satınalma prosedurlarında iştirakına yol verilmir.

Amma göründüyü kimi, satınalan təşkilat olan AMEA-nın keçirdiyi tender müsabiqəsinin qalibi olan podratçı şirkətin – “Service and Supply Ltd.” MMC-nin direktoru AMEA-dan əmək haqqı alan vəzifəli şəxsdir.

Sozcu.info xəbər verir ki, bu mənada Azərbaycan Milli Elmlər Akademiyasının İşlər İdarəsinin ötən il eyni şəxsə məxsus olan iki fərqli şirkətlə apardığı əməliyyatların qanuniliyi və əsaslılığı şübhə doğurur. Qeyd edək ki, Azərbaycan Milli Elmlər Akademiyasının İşlər İdarəsi 2020-ci ildə dəftərxana və təsərrüfat mallarının satınalınması məqsədilə “Service and Supply LTD” Məhdud Məsuliyyətli Cəmiyyıti ilə 30 min manatlıq müqavilə bağlayıb. Ötən ilin sonlarında bağlanmış bu müqavilədə adı keçən “Service and Supply LTD” MMC-nin hüquqi ünvanı Bakı şəhəri, Binəqədi rayonu, Süleyman Sani Axundov küçəsi 2, ev 25-də yerləşir. Azərbaycan Milli Elmlər Akademiyasının İşlər İdarəsi 2020-ci ildə yumşaq inventar, yataq ləvazimatları və xüsusi geyimlərin alınması ilə bağlı 50 min manatlıq müqavilə bağladığı “Aysberq KMT” MMC-də eyni ünvanda hüquqi qeydiyyatdadır. Bu iki MMC-nin bir rəhbəri var. Bu şəxs də Rasimli Kəmalə Rasim qızıdır. Çox maraqlıdır ki, bu xanımın adı həm də Zoologiya İnstitutunun ümumi işlər üzrə direktor müavini kimi keçir. Çox maraqlı bir mənzərə yaranır. Bu məlumatları AMEA Rəyasət Heyəti aparatının Hüquq və kadrlar idarəsinin rəisi Rasim Ağasiyevin necə izah etməsi maraqlı olardı. Biz isə araşdırmamızı davam etdirməyə çalışacağıq. Hələlik isə onu deyə bilərik ki, bu əməliyyatlardan korrupsiya iyi gəlir.