İngiltərə, ABŞ və Avstraliya Çinə qarşı mübarizə aparmaq üçün birləşiblər.
Sozcu.info “BBC”yə istinadən xəbər verir ki, 3 ölkə qabaqcıl müdafiə texnologiyalarını paylaşmaq üçün xüsusi təhlükəsizlik sazişi bağlayıblar.
“Aukus” olaraq adlandırılan saziş süni intellekt, kiber və kvant texnologiyalarını əhatə edəcək.
Sözügedən bu üç ölkə son bir neçə ildir ki, Çinin Hind-Sakit okeanında gücünün artması və hərbi varlığından narahatdırlar. 
Çərşənbə günü ABŞ Prezidenti Co Bayden, İngiltərənin Baş naziri Boris Conson və avstraliyalı həmkarı Skot Morrison “Aukus” adlı yeni təhlükəsizlik ortaqlığının işə salınması ilə əlaqədar ortaq bir bəyanat yayıblar. Bəyanatda deyilir ki, yeni əməkdaşlıq regionda təhlükəsizliyin və çiçəklənmənin təmin olunması məqsədi daşıyır.
Bu əməkdaşlıq Avstraliyaya ilk dəfə nüvə enerjisi ilə işləyən sualtı qayıqlar qurmağa imkan verəcək. Bu səbəbdən Avstraliya Fransa dizaynlı sualtı qayıqların inşasına dair razılaşmanı da ləğv edib.
Qeyd edək ki, Fransa 2016-cı ildə Avstraliya Hərbi Dəniz Qüvvələri üçün 12 sualtı gəmi inşa etməsi ilə bağlı müqavilə bağlamışdı. Sazişin dəyəri 50 milyard dollar təşkil edirdi. Sözügedən anlaşma Avstraliyanın ən böyük müdafiə müqaviləsi hesab edilirdi.