Azərbaycan Həmkarlar İttifaqları Konfederasiyası (AHİK) təşkilatın fəaliyyətsizliyi, xüsusən də şəhid ailələri və qazilərə münasibətdə laqeyidliyi barədə mətbuatda dərc edilən tənqidlərə cavab verib.
“AzPolitika.info” xəbər verir ki, qurumun bununla bağlı xüsusi açıqlamasında AHİK-in şəhid ailələrinə və qazilərə göstərdiyi yardımlar, eləcə də təşkilatın gəlir və xərcləri barədə məlumatlar verilir: “Azərbaycan Həmkarlar İttifaqları Konfederasiyası (AHİK) və üzv təşkilatları istər pandemiya dövründə, istərsə də Vətən müharibəsi və ondan sonrakı dövrdə ictimai təşkilat olaraq xüsusi fəallığı ilə seçilib, dövlətin, həmçinin şəxsən ölkə Prezidenti cənab İlham Əliyevin və Birinci vitse-prezident Mehriban xanım Əliyevanın təşəbbüsü ilə reallaşdırılan bütün sosial layihələrin icrasında yaxından iştirak edir.
Bildiririk ki, ümumiyyətlə, ölkəmizdə sosial layihələrin icrası dövlətin, o cümlədən Azərbaycan Prezidenti İlham Əliyevin və Birinci vitse-prezident Mehriban xanım Əliyevanın daim diqqət mərkəzindədir. Bütün bayramlarda və əlamətdar günlərdə şəhid ailələrinə, qazilərə və digər həssas qruplardan olan vətəndaşlarımıza hədiyyələr, sovqatlar, yardımlar paylanılır. Bu növ humanitar missiyalara dəstək verən AHİK qəbul olunmuş müvafiq qərarlar əsasında 2020-ci ildən bu günə kimi pandemiya və Vətən müharibəsi ilə əlaqədar ümumilikdə 18 235 064 manat vəsait xərcləyib.”
Açıqlamada qeyd olunur ki, AHİK “Silahlı Qüvvələrə Yardım Fondu”na və “YAŞAT” Fonduna üst-üstə 1.5 milyon manatdan çox vəsait ödəyib: “44 günlük müharibə dövründə AHİK və onun üzv təşkilatları tərəfindən “Silahlı Qüvvələrə Yardım Fondu”na 1 025 410 manat, “YAŞAT” Fonduna 586 510 manat, “Qarabağ Dirçəliş Fondu”na 600 000 manat, Silahlı Qüvvələrə və cəbhə bölgəsinə yaxın ərazilərdə yaşayan və müharibədən əziyyət çəkən sakinlərə 1 494 178 manat, Naxçıvan Muxtar Respublikasının həmkarlar ittifaqlarına 150 000 manat vəsait köçürülüb. Həmişə AHİK tərəfindən diqqətdə saxlanılan şəhid ailələrinə və qazilərə ümumilikdə 1 116 400 manat maddi yardım göstərilib. 6 277 şəhid ailəsinə və qaziyə birdəfəlik yardım edilib. 136 şəhid ailəsi AHİK tərəfindən himayəyə götürülüb, 64 şəhid övladına hər ay 150 manat məbləğində maddi yardım edilir və bu, onların 18 yaşına qədər davam etdiriləcək.”
AHİK tərəfindən “putyovkalar”ın satışına dair tənqidlərə cavab olaraq isə deyilir: “Xüsusilə qeyd edək ki, işçilərin sağlamlığının bərpası üçün həmkarlar ittifaqları öz üzvlərini sanatoriya-kurort yollayışları ilə təmin edir. Qeyd edək ki, bu yollayışlar AHİK tərəfindən deyil, iş yerlərində fəaliyyət göstərən həmkarlar ittifaqı komitələri tərəfindən ittifaq üzvlərinə verilir. Həmkarlar ittifaqı üzvü sanatoriya-kurort yollayışının dəyərinin yalnız 15%-ni ödəyir. İlk həmkarlar ittifaqı tərəfindən ittifaq üzvlərinə verilən hər 10 yollayışdan biri pulsuzdur. Bu məsələdə, yəni yollayışların verilməsində AHİK-in fəaliyyəti yalnız yollayışların sahə həmkarlar ittifaqları arasında rüblər üzrə bölgüsünü təmin etməkdir...
Həmkarlar ittifaqları üçün ödənilən üzvlük haqqına gəldikdə isə, bildiririk ki, üzvlük haqqının ödəlilməsi, hansı istiqamətdə xərclənməsi barədə dəfələrlə AHİK və onun sədri tərəfindən jurnalistlərə açıqlama verilib və mətbuat orqanlarında dərc olunub. Bir daha bəyan edirik ki, vəsaitin xərclənməsinə həmkarlar ittifaqlarında fəaliyyət göstərən nəzarət-təftiş komissiyaları tərəfindən nəzarət edilir. Eyni zamanda keçirilən iclaslarda, konfranslarda, qurultaylarda vəsaitin hara xərclənməsi barədə hesabatlar verilir.”
Açıqlamada AHİK sədri Səttar Möhbalıyev barədə dərc olunan fikirlərə də münasibət bildirilib: “Qeyd edək ki, AHİK sədri Səttar Möhbalıyev 1980-ci illərdən həmkarlar ittifaqlarında çalışır, bu sahədə həmişə nüfuzu və hörməti ilə fərqlənib. 1993-cü ildə isə AHİK-in sədri seçilib. S.Möhbalıyevin sədr və digər vəzifələrə seçilməsində rolu qeyd edilən şəxslər isə həmin vaxt, ümumiyyətlə, vəzifədə olmayıblar, nəinki kiməsə sədr seçilməkdə kömək etsinlər. Həm də ictimai təşkilat olduğu üçün həmkarlar ittifaqlarında rəhbərlik seçkilər əsasında formalaşır, heç bir kənar təsir mümkün deyil...”