Xəbər verdiyimiz kimi, Türkiyə Prezidenti Rəcəb Tayyib Ərdoğanın Azərbaycana səfəri başlayıb.
Sozcu.info xəbər verir ki, onun təyyarəsi artıq Füzuli Beynəlxalq Hava Limanına enib.
Ərdoğan Azərbaycana özəl “TUR” təyyarəsi ilə səfər edib. Prezident və ailəsindən başqa, ətraf mühit və şəhərsalma naziri Murat Kurum, xarici işlər naziri Mövlud Çavuşoğlu, milli müdafiə naziri Hulusi Akar, nəqliyyat və infrastruktur naziri Adil Karaismailoğlu, prezidentin kommunikasiya direktoru Fahrettin Altun və Prezident Administrasiyasının sözçüsü İbrahim Kalın da Azərbaycana gəliblər.
Qeyd edək ki, Azərbaycan prezidenti İlham Əliyevin dəvəti ilə Azərbaycana birgünlük işgüzar səfər etmək üçün Azərbaycana gələn prezident Ərdoğan, Vətən müharibəsi nəticəsində işğaldan azad olunmuş Füzulidə yeni inşa olunmuş Beynəlxalq Hava Limanının açılışında iştirak edəcək.
Türkiyə prezidenti bölgədə tikilən avtomobil yolunun və Zəngilanda Türkiyənin iştirakı ilə tikiləcək "Ağıllı kənd təsərrüfatı" şəhərciyinin təməlqoyma mərasimlərində iştirak edəcək.
Səfər zamanı Türkiyə-Azərbaycan münasibətləri bütün aspektlərdə nəzərdən keçiriləcək, iki ölkə arasında əməkdaşlığın daha da dərinləşdirilməsi istiqamətində atılacaq addımlar müzakirə olunacaq.