Yay tətilini səmərəli keçirmək istəyən insanlar əsasən səfalı bölgələrə üz tuturlar. Azərbaycanın rayonlarında otel sayı az, qiymətlər baha olduğundan bütün turistlərin tələbatı ödənmir. Buna görə də insanlar şəxsi evlərdə kirayədə qalmağa üstünlük verirlər.
Rayonlara görə qiymətlər fərqlidir. İsmayıllı rayonunun dağ və dağətəyi kəndlərində 50-70 manatdan aşağı ev tapmaq mümkün deyil. Qəbələdə isə qiymət günlük 80-100 manat arasında dəyişir. Qubada standart qiymət 70-100 manat civarındadır.
Fərdi ev sahibləri turistlərdən otel qiymətinə bərabər pul alsa da, təklif olunan xidmətin səviyyəsi, otellə müqayisədə, bir neçə dəfə aşağı olur. Məsələn, kirayəkeş turist yataq dəstini özüylə gətirməlidir; bu evlərdə turistlərə heç vaxt gigiyenik vasitələr təqdim olunmur; internetə çıxış imkanının həmişə müşkülə çevrilir. 
Bir sözlə, həftəlik 400-500 manatın müqabilində turistə 4 divar və 4 çarpayı təklif etməklə kifayətlənilir.
İqtisadçı Xalid Kərimli problemli məsələ ilə bağlı Sozcu.info-a açıqlamasında bunun səbəbini turizm ənənəsinin yoxluğunda görür:
“Ev turizminin inkşaf etməməsinin əsas səbəbi turizm ənənələrinin yoxluğudur. Turizm bazarı tədricən formalaşır. Bəzən insanların da xarakterindən asılı olur. Əksəriyyət yad şəxslərin evində qalmasına razı olmur. Bu problemə görə bazara təqdim edilən əmlak sayı azdır. Əmlak bazarına turistik məkanlar, şəxsi evlər təklif olunsa, ortada rəqabət başlayacaq. Rəqabətin sonu qiymətlərin daha sərfəli olmasına gətirib çıxaracaq. Güclü rəqabət yaratmaq mütləqdir”.
İqtisadçı Azərbaycanda turizmin yeni sahə olduğunu da əsas problem kimi görür:
“Turistik bölgələrdə texnologiyada aşağı səviyyədədir. Ümumi götürsək turizm sahəsində təklif az, xidmətin keyfiyyəti isə aşağıdır. Əhalinin turistik mədəniyyət ənənələrinin yeni formalaşması lazımi keyfiyyətin əsas götürülməsinə imkan vermir”.