Azərbaycan Respublikasının Prezidenti cənab İlham Əliyev yanvar ayının 30-da Azərbaycanın ikinci böyük şəhəri olan Gəncə şəhərinə rəsmi səfərdə olmuşdur. On səkkiz il ərzində cənab Prezident İlham Əliyev 18 dəfə Gəncə şəhərində rəsmi səfərdə olub. Gəncə Azərbaycanın ikinci şəhəridir və ölkə Başçısının buraya diqqəti həmişə yüksək səviyyədə olub. Gəncə şəhərinin kompleks inkişaf planı həm təsdiqlənib, həm də uğurla icra edilir. Gəncə şəhərində bir çox layihələr icra edilib və bu layihələrin icrası davam edir. Xüsusilə qeyd etməliyik ki, Gəncəyə gedən yollar tam müasirləşdirilib, Gəncəyə Bakıdan dəmir yolu xətti də tam modernləşdirilib, Gəncənin səhiyyə və təhsil infrastrukturu yenilənib. Bütün bunlar Gəncə şəhərinin strateji əhəmiyyətinə və dinamik inkişafına dövlət tərəfindən göstərilən xüsusi diqqət və qayğının nəticəsidir.

Dövlət azad edilmiş torpaqlar, yəni Qarabağ və Zəngəzur ilə yanaşı, bütün başqa şəhər və rayonların inkişafına diqqət ayırır. Bu gün ölkə qarşısında bir çox vacib və təxirəsalınmaz məsələlər həllini gözləyir, lakin, bunlarla yanaşı Gəncə şəhərinin daha da inkişaf etməsinə töhfə verəcək hər bir təşəbbüs dövlət tərəfindən dəstəklənir. Regionların Sosial-İqtisadi İnkişafı Dövlət proqramlarının icrasında Gəncə şəhəri həmişə xüsusi yerdə olub, Gəncənin inkişafı və şəhərin problemlərinin həlli daim diqqət mərkəzindədir. Azərbaycanın bütün regionlarında olduğu kimi, Gəncə şəhərində də əhalinin rifah halının və həyat şəraitinin yüksəldilməsi istiqamətində bütün zəruri addımlar dövlət tərəfindən atılır.

Gəncə şəhərinin strateji əhəmiyyətindən danışanda, İkinci Qarabağ müharibəsi dövründə Gəncə şəhərinin və gəncəlilərin erməni faşizminə qarşı göstərdikləri mübarizəni və qəhramanlığı xüsusilə qeyd etməliyik. Belə ki, İkinci Qarabağ müharibəsi dövründə Gəncə dəfələrlə cinayətkar Ermənistan ordusu tərəfindən bombalanıb. Şəhərə 13 raket atılıb, onlardan 8-i partlayaraq əfsuslar olsun ki, insanların həyatına son qoyub, beş raket isə partlamayıb. Bu da öz növbəsində onu göstərir ki, Ermənistan ordusu nə vəziyyətdə idi. Ancaq bu namərd atəş nəticəsində həlak olan vətəndaşlarımız yaşamalı idi. Onların arasında uşaqlar (6 uşaq həlak oldu), qadınlar, yaşlı insanlar da var idi. Təkcə Gəncə şəhərində 26 mülki vətəndaş namərd atəş nəticəsində həlak oldu, erməni faşizminin qurbanı oldu. Gəncə şəhəri həm “Toçka-U”, həm “SCUD” raketləri ilə atəşə tutulurdu. Əlbəttə, bu, hərbi cinayətdir və hərbi cinayət kimi dünya tərəfindən tanınmalıdır. Bu baxımdan Gəncədə inşa olunacaq Memorial Kompleks böyük əhəmiyyət daşıyır. Memorial Kompleks təqribən dörd hektarda yaradılacaq. Dağıdılmış binalar olduğu kimi qalacaq. Hər bir azərbaycanlı erməni vəhşiliyini unutmamalıdır. Çünki bu bizim qan yaddaşımızdır, bu yaddaş silinməməlidir və tariximizdə olduğu kimi yaşamalıdır. Azərbaycan xalqı olaraq regionda sülhün bərqərar olmasını istəyirik. Amma ermənilərin törətdiyi cinayətlər, vəhşiliklər heç vaxt unudulmamalıdır. Bu baxımdan, Gəncədə yaradılacaq Memorial Kompleks böyük əhəmiyyətə malikdir. Bu kompleks hər zaman vətəndaşlarımızın və əcnəbi qonaqların ziyarət etdiyi məkan olacaq. Bununla da, gələcək nəsillər də erməni faşizminin qanlı əməllərinin şahidi olacaqlar.
Gəncədə inşa olunacaq Memorial Kompleks bu yaddaşın silinməməsinə öz tövhəsini verəcək, erməni vəhşiliyini unutdurmayacaqdır.

Rafiq Əzizov,
Salyan rayon Dayıkənd kənd tam orta məktəbin direktoru