Bu ilin yanvar ayında Musavat.com saytında Bakının Xətai rayonunda Yusif Səfərov və Afiyəddin Cəlilov küçələrinin kəsişməsində yerləşən çoxmərtəbəli binanın söküləcəyi ilə bağlı yazı dərc edilmişdi. “TV Müsavat” ın reportyor qrupu sözügedən ünvanda olmuş, sakinlər və müvafiq şəxslərlə söhbətləşmişdi. Xatırladaq ki, yaşayış binası Zəfər abidə kompleksi ilə bağlı görüləcək işlər çərçivəsində, dövlət sifarişi əsasında sökülməlidir.
Bu günlərdə sakinlərin əksəriyyətinə artır kompensasiya ödənilib. Bina sakini Əsəd Seyidov Musavat.com-a bildirir ki, köçürülmə, demək olar ki, bitmək üzrədir: “Köçürülmə başlayıb. Kompensasiyadan razı qaldıq. Mən ailəmlə ötən ay köçdük. Bildiyim qədəri ilə az sayda sakin qalıb. Tanışlardan öyrəndim ki, sakinlərin kompensasiyalardan narazılığı yoxdur. 3 aşağı, 5 yuxarı razılığa gəlirlər. O binada ofislər də var idi. Eşitdiyimə görə, bina sakinlərinə və ofis rəhbərlərinə aprelin 10-a kimi vaxt verilib. Kompensasiyanın məbləği evin təmirindən asılıdır. Məsələn, bir qonşumuza 2500 AZN, digər qonşumuza isə hər kvadrat metrə görə 4500 AZN, bizə isə 5000 AZN ödənilib”.
Xətai Rayon İcra Hakimiyyətindən Musavat.com-a bildirildi ki, sakinlərlə və sahibkarlarla müqavilələr bağlanıb: “Minimum 2200 AZN olmaqla kompensasiyaların ödənişi davam edir. İndiki mərhələdə köçürülmənin nə zaman başa çatacağını demək qeyri-dəqiq olar. Proses davam edir”.