Koronavirusa gündəlik yoluxma sayının kəskin olaraq aşağı düşməsi artıq qapalı məkanlarda maska tələbinin ləğvi məsələsi ilə bağlı müzakirələrə yol açır. 
Xüsusilə havaların isinməsi ilə bu məhdudiyyətin aradan qaldırılması istənməkdədir.
Maraqlıdır, hazırkı yoluxma dinamikası ölkədə maska tələbinin ləğvinə imkan verirmi?
Sozcu.info xəbər verir ki, mövzu ilə bağlı Sfera.az-a danışan həkim-infeksionit Mərdan Əliyev əksər qapalı məkanlarda maska tələbinin ləğv edilməli olduğunu deyib. Müsahibimiz buna nümunə olaraq Avropa ölkələrini göstərib:
"Mart ayının ortalarından etibarən Avropa ölkələrində qapalı məkanlarda maska tələbi və peyvənd sertifikatları ləğv olunub. Qardaş Türkiyədə isə  mart ayının əvvəllərindən həm açıq, həm də qapalı yerlərdə maska tələbi aradan qaldırılıb və yalnız ictimai nəqliyyatla bağlı belə bir tələb var. Bizdə də bu istiqamətdə qərar qəbul edilməlidir. Restoranlarda, ictimai iaşə obyektlərində maska istifadəsinə dair tələbin qoyulması məntiqsizdir. Belə ki, burada insanlar arasında sosial məsafəyə riayət edilməsi mümkündür. Yalnız marşurut avtobuslarında bu məsafəni saxlamaq mümkün olmur və belə məkanlarda koronavirusa yoluxma riski yüksəkdir. Buna görə də bu nəqliyyat vasitəsində maska taxılmasının tərəfdarıyam”. 
Həkimin sözlərinə görə, maska tələbi iki istiqamət üzrə pandemiyanın sonlanmasından sonra da ənənə halında qalmalıdır:
"Bundan  başqa kəskin respirator infeksiyalarına yoluxma riskinin yüksək olduğu tibb müəssisələrində də maska istifadəsinin saxlanılması məntiqlidir. Bu, tək koronavirusun yox, həm də qrip, vərəm kimi xəstəliklərin də yayılmasının qarşısını ala bilər. Bu ənənənin hər iki sahədə saxlanılması daha yaxşıdır. Digər obyektlərdə isə maska tələbinin olmasına isə ehtiyac yoxdur”.