Arzuman Loğmanoğlu: “Cinayət işinin açılması qəzetimizin məlumatlarının dürüstlüyünün göstəricisidir”
“Yeni Sözçü” qəzetini izləyən oxucularımız yəqin ki, Ağcabədi rayonunda baş verən korrupsiya ilə bağlı Baş Prokuror Yanında Korrupsiyaya Qarşı Mübarizə Baş İdarəsində 152026123 saylı cinayət işinin açıldığını həm qəzetimizin, həm də internet səhifəsindəki məlumatla tanışdırlar. Qeyd edək ki, Ağcabədi rayonunda baş verən korrupsiya ilə bağlı cinayət işinin açılması haqqında ilk dəfə hakimiyyətə yaxın saytlardan olan infoaz.org saytı hüquq-mühafizə orqanlarındakı mənbəyə istinadən məlumat yaymışdı. Bu məlumat ətrafında apardığımız araşdırmalar da xəbərin tam doğru olduğunu təsdiqlədi. Belə ki, Ağcabədi rayonundakı mənbəmizin verdiyi məlumata görə, Baş Prokuror Yanında Korrupsiyaya Qarşı Mübarizə Baş İdarəsinin İstintaq İdarəsinin rəisi vəzifəsini icra edən, baş ədliyyə müşavirə Əli Quliyevin Ağcabədi rayon Avşar kənd sakini Kərimov Elqayıt Heydər oğluna göndərdiyi 10.11.2015-ci il tarixli məktubda qeyd edilir ki, “Sizin Azərbaycan Respublikasının Baş Prokuroruğuna ünvanladığınız 30.09.2015-ci il tarixli ərizəniz baxılması üçün Azərbaycan Respublikasının Baş Prokuroru Yanında Korrupsiyaya Qarşı Mübarizə Baş İdarəsinin İntintaq İdarəsində istintaq olunan 152026123 saylı cinayət işinə əlavə edilmişdir”. İstintaq İdarəsinin rəisinin vəzifələrini icra edən Əli Quliyev məktubunun sonunda şikayətçini əmin edir ki, iş üzrə hərtərəfli, tam və obyektiv araşdırma aparılaraq müvafiq tədbir görüləcəkdir.
Qeyd edək ki, Ağcabədi rayonunda korrupsiya hallarının baş verməsi ilə “Yeni Sözçü qəzetinin Araşdırma Qrupu” tərəfindən üzə çıxarılmış çoxsaylı faktlar ətrafında bu günə kimi Araşdırma Qrupunun bir neçə araşdırması oxucularımıza təqdim olunub. Məsələn, ilk dəfə olaraq məhz “Yeni Sözçü qəzetinin Araşdırma Qrupu” İcra Başçısının birinci müavini Rövşən Əhmədovun adına min manata yaxın buğda əkinə görə subsidiya yazılmasını üzə çıxarmışdı. Bundan başqa ilk dəfə məhz “Yeni Sözçü” qzəetinin əməkdaşları Ağcabədi rayonun Əhalinin Sosial Müdafiəsi Mərkəzindəki müdhiş korrupsiyanı, Ağcabədi icra başçısının müavini Rövşən Əhmədovun qardaşı oğlu Pərviz Əhmədov kənd və rayon camaatından ayrı-ayrı adlar altında 250 min manat pul yığıb aradan çıxması ilə bağlı faktı da ilk dəfə üzə çıxarmış, həmin fakt əsasında hazırlanmış məqalə Əmək və Əhalinin Sosial Müdafiəsi naziri Səlim Müslümovu qəti addımlar atdıraraq Mərkəzin direktoru Əbülfət Qasımovu vəzifəsindən kənarlaşdırmasına səbəb olmuşdu. Həmçinin Ağcabədi rayon Maliyyə İdarəsinin əməkdaşlarının tenderləri öz yaxın adamlarının adına olan şirkətlərə rəsmiləşdirməsi faktını da ilk dəfə məhz “Yeni Sözçü” qəzeti üzə çıxarmışdı. Həmin faktların üzə çıxması isə Ağcabədi rayon Maliyyə İdarəsinin rəisi Xosrov Nəsirovun karyerasına son qoymuşdu. Ən nəhayət, Ağcabədi rayonunda baş verən korrupsiya ilə bağlı Baş Prokuroru Yanında Korrupsiyaya Qarşı Mübarizə Baş İdarəsinin İntintaq İdarəsində 152026123 saylı cinayət işinin açılması və istintaq hərəkətlərinin başlaması qəzetimizin yazdıqlarını təsdiqləyir. Bu fakta münasibət bildirən “Yeni Sözçü” qəzetinin baş redaktoru Arzuman Loğmanoğlu hesab edir ki, cinayət işinin açılması qəzetimizin məlumatlarının dürüstlüyünün göstəricisi olmaqla yanaşı həm də qəzetmizə irad tutanlara verilmiş ən layiqli cavabdır.
Baş redaktorumuz tam haqlıdır. Bu cinayət işinin başlanamsı bir tərəfdən bizim yazdıqlarımızın böhtan olmayıb, ancaq həqiqətləri əks etdirdiyini ortaya qoymaqla yanaşı, Ağcabədidəki korrupsiya ilə bağlı çox yazdığımızı söyləyib, bizə irad tutanlara da ən gözəl cavabdır. Bundan sonra Respublikasının Baş Prokuroru Yanında Korrupsiyaya Qarşı Mübarizə Baş İdarəsinin İntintaq İdarəsində istintaq olunan 152026123 saylı cinayət işinin istintaqını izləməyə çalışmaqla yanaşı, Ağcabədi rayonunda baş verdiyi iddia olunan bir sıra korrupsiya faktlarının və bir çox cinayətlərin üstünün bu günə kimi açılmamasının səbəblərini üzə çıxarmağa çalışacağıq. Hesab edirik ki, bununla da Prezident İlham Əliyevin korrupsiya ilə bağlı mübarizə çağrışına öz tövhəmizi vermiş olarıq. Bundan başqa Ağcabədi rayonunda son zamanlar baş vermiş bəzi müammalı kadr yerdəyişmələrinin arxasında duran maraqların da nədən ibarət olduğuna aydınlıq gətirməyə çalışacağıq. O zaman biləcəkzinz ki, Ağcabədi rayon Suvarma Sistemləri İdarəsinin sabiq rəisi Əli Əliyev hansı maraqlara görə rayonun Subartezian Quylarının İstismarı İdarəsinin rəisi təyin edildi? Subartezian Quyularının İstismarı İdarəsinin sabiq rəisi Fəxrədin Kərimov hansı şəraitdə işdən çıxarılıb? Ağcabədi rayonunu içməli su ilə təmin etmək üçün Qarqar çayı sahilindəki 3 ədəd artezian quyusundan çəkilmiş 16 km su kəmərinin satması həqiqətdirmi?
Bu məsələlərdən başqa Ağcabədi rayonunda abadlıq işlərinin aparılması üçün ayrılmış vəsaitlərin rayon məmurları tərəfindən mənimsənilməsi faktı ilə bağlı iddiaların nə dərəcədə həqiqətə uyğun olduğuna aydınlıq gətirməyə çalışacağıq.
Sonda isə qeyd etmək istərdik ki, Gürcüstanda erməni kilsələrini pulsuz qazla təmin edən Rövnəq Abdullayevin Ağcabədinin üç kəndini, Saricali, Taynaq və Poladlı kəndlərinə bu günə kimi qaz verməməsinin də səbəblərini müəyyən etməyə çalıaşcağıq. Bütün bu suallar ətrafında “Yeni Sözçü qəzetninin Araşdırma Qrupu”nun apardığı geniş araşdırmanı yaxın saylarımızda oxucularımıza təqdim edəcəyik.

Vəfa Qafarova