İcra başçısı Şahin Məmmədovun başı dərddə; məsələ ilə bağlı president İlham Əliyevə də məlumat verilib
Ağcabədi rayon Avşar rayon sakini, sahibkar Elqayıt Kərimov sakini olduğu rayonda baş verən korrupsiya ilə bağlı şok faktlar açıqlaması bir neçə gündür ki, ölkə mətbuatının əsas mövzularından biridir. Qeyd edək ki, sahibkar Elqayıt Kərimov yerli icra hakimiyyətini kənd yolllarının təmirinə ayrılmış vəsaiti mənimsəməkdə ittiham etmiş, ötən il Hüsülü, Muğanlı, Təzəkənd, Minaxor, Arasbar, Qiyamadınlı, Mirzaverdili, Kürdlər, Kəhirli və Şərəfxanlı kənd yollarının əsaslı təmirinə 5 milyon manat pulun korrupsiyanın qurbanı olduğuna diqqət çəkmişdi. Bundan başqa E.Kərimov Qarqar çayının üstündən salınmalı olan körpünün də pulunun mənimsənildiyinə diqqət çəkərək, bu işlərin görülməmə səbəbini yerli icra hakimiyyəti başçısı Şahin Məmmədovun pulun olmaması ilə izah etməsi barışmayaraq sual edirdi ki, bəs bu ayrılan pullar hanı?
Bundan başqa Elqayıt Kərimov yerli icra hakimiyyətini Kür çayının qırağında Ağcabədi rayonunun Sarcalı kəndinə məxsus olan 3 min hektar, Kəbirli kəndində isə 2800 hektar qış otlaq sahəsinin təyinatı dəyişdirilərək kəndlilərdən alınıb və hansısa şirkətlərəə satmaqda da ittiham edib.
Sahibkar yerli məmurları Ağcabədi rayonunu içməli su ilə təmin etmək üçün Qarqar çayı sahilindəki 3 ədəd artezian quyusundan çəkilmiş 16 km su kəmərini satmaqda ittiham edərək belə deyib:“Məmurlar artezian quyularını çobanlara satıblar. 16 kilometr uzunluğunda çuqun boru isə çıxardılıb və 1 milyon manata satılıb. Qaradolaq, Mehrablı, Yeniqaradolaq və Aran kəndlərinə içməli su üçün külli miqdarda vəsait ayrılsa da heç bir iş görülməyib”.
Elqayıt Kərimov Hüsülü-Qiyamadınlı yolunun təmirinə ayrılan 5 milyon manat pulla bağlı məsələlərə də toxununb: “Bu yolun təmiri Ağcabədi rayon yol-tikinti idarəsi tərəfindən görülüb. Ancaq sənədlərdə təmir işlərinin “Fərid MMC” tərəfindən həyata keçirildiyi göstərilib və bu yolla təmirə ayrılan pullar mənimsənilib. Həmin yol layihəsində çayın üzərindən körpü tikilməsi nəzərdə tutulsa da bu iş görülməyib”.
Prezidentə və Baş prokurora da müraciət edən Elqayıt Kərimov abadlıq üçün ayrılmış vəsaitlərin rayon məmurları tərəfindən mənimsənildiyini bildirib. Qeyd edib ki, abadlıq işlərini sahibkarlara, mağaza sahiblərinə, idarə və təşkilatlara, məktəblərə, xəstəxanalara gördürüblər.
Sahibkar Elqayıt Kərimovun bu ittihamları ilə razılaşmayan Ağcabədi Rayon İcra Hakimiyyəti isə ittihamları qəbul etməyərək şikayətçini qərəzli olmaqda ittiham edərək korrupsiya ittihamlarını rədd etməyə çalışıb.
Ancaq deyəsən, Ağcabədi rayon hakimiyyətinin başçısı və digər məsul şəxslər bu ittihamları mətbuata təkzib etməklə yaxalarını qurtara bilməyəcəklər. İnfoAZ.org-a hüquq-mühafizə orqanlarından daxil olan məlumata görə, Ağcabədi rayonundakı korrupsiya faktlarının araşdırılmasına qərar verilib. Bununla bağlı artıq Baş prokuror yanında Korrupsiyaya Qarşı Mübarizə Baş İdarəsində 152026123 saylı cinayət işi də açılıb. Məlumata görə, Ağcabədi rayonundakı korrupsiya faktlarının araşdırılması ilə bağlı cinayət işinin açılması haqqında president İlham Əliyevə də məlumat verilib. Dövlət başçısı iş üzrə tam və obyektiv araşdırılma aparılması üçün müfaviq addımların atılmasına göstəriş verib.