Düşmənin Tərtər fobiyası - hərbi ekspert səbəbləri açıqladı

Şair Ramaldanov: “Ya təslim olacaqlar, əks təqdirdə, özlərinin məhvinə imza atacaqlar”

Vətən müharibəsinin başlandığı ilk gündən Ermənistan silahlı qüvvələri Tərtər rayonunu ardıcıl olaraq atəş altında saxlayır. Tərtər şəhəri və ətrafındakı 36 yaşayış məntəqələrinə ötən 25 gün ərzində 15 minə yaxın top mərmisi və raket yağdırılıb. Oktyabrın 21-də də səhərdən başlayaraq düşmən yenidən Tərtər istiqamətində atəşi bərpa edib. Azərbaycan Ordusu düşmənin hucumlarını cavabsız qoymur, atəş nöqtələrinin susdurulması istiqamətində adekvat tədbirlər görülür. Cənub istiqamətindən ordumuzun ard-arda zəfərləri Tərtər istiqamətində müşahidə edilmir və bu gedişat hazırda Azərbaycan cəmiyyətində ciddi müzakirə mövzusudur.
Ermənistan niyə Tərtəri atəş altında saxlayır? Səbəb nədir? Əsas, həlledici hücumu buradan gözlədiyi üçün bu istiqamətdə möhkəmləniblər?
Bu və digər suallarla Azərbaycan Silahlı Qüvvələrinin ehtiyatda olan polkovniki, hərbi ekspert Şair Ramaldanova müraciət etdik.
“Azərbaycan Ordusunun əks-hucum əməliyyatı plan üzrə gedir” - deyən ekspert qeyd edib ki, hansı istiqamətlər prioritet sayılırsa, o istiqamətlərdə əməliyyatlar davam edir: “Qarşı tərəf həmin istiqamətdə istehkamlarla və müxtəlif qurğularla möhkəmlənib. Burada psixoloji və siyasi faktor da var. Azərbaycan Ordusu artıq 3 rayon mərkəzini və ətrafda olan 100-dək kəndi, yaşayış məntəqələrini, strateji yüksəklikləri azad edib. Bu düşmənə psixoloji cəhətdən çox əhəmiyyətli təsirdir. Bundan başqa, siyasi tərəfi də var. Ali Baş Komandan, cənab İlham Əliyev dəfələrlə vurğulayıb ki, əgər Ermənistan konstruktiv mövqe tutsa, Azərbaycan torpaqlarının işğalından əl çəksə, ərazimizdəki qoşunlarını çıxarsa, Azərbaycan dərhal döyüşləri dayandıra bilər. Azərbaycan Ordusu çox qısa müddətdə düşmən qoşunlarını cənub istiqamətində darmadağın edərək İranla sərhədlərimizin bərpasına nail olub. Bilirik ki, İran ərazisindən işğal olunmuş ərazilərə hərbi sursat və hərbi təyinatlı yüklər daşınırdı. Bir tərəfdən düşmənin təminatı kəsilib, digər tərəfdən Zəngilanın alınması ilə düşmən üzərində həm də mənəvi bir qələbə əldə olunub. Bu gün Azərbaycan Ermənistanla dövlət sərhədinin bir hissəsini  bərpa edib. Hazırda gedən proseslər onu göstərir ki, Azərbaycan Ordusunun bugünkü nailiyyətləri siyasi arenada müsbət mənada Azərbaycanın xeyrinə işləyir. Cənub istiqamətində az itkilərlə bu zəfərlər əldə olunub.
Ağdərə, Ağdam istiqaməti isə düşmənin şəxsi heyəti arasında itkilərin çox ola biləcəyi ərazilər kimi nəzərdən keçirilir. Azərbaycan Ordusunun cənub istiqamətindəki uğurları bu istiqamətdən də uğurların olacağına şübhə yeri qoymur. Azərbaycan tərəfi hərbi nailiyyətləri siyasi proseslərə transfer edərək qarşıya qoyulan məqsədə çatmağı qərarlaşdırıb. Əsas da canlı qüvvə itkisinin minimuma endirilməsi yolu ilə torpaqların azad edilməsi nəzərdə tutulur".
Ordumuz haqqında fikir söyləyənləri obyektiv olmağa çağırıram” - polkovnik Şair  Ramaldanov
Şair Ramaldanov bildirib ki, Azərbaycan komandanlığı az itkilərlə torpaqların azad edilməsi istiqamətində addım-addım qabağa getməyi qərarlaşdırıb:
“Tərtər istiqamətində hücum əməliyyatlarının olmaması o demək deyil ki, bu istiqamət diqqətdən kənardır. Hərbçi xəritəyə baxanda vəziyyəti görür. Bu gün Zəngilan və Qubadlı istiqamətləri Azərbaycan Ordusunun nəzarətindədir və bu gedişat Laçından gələn yola ən yaxın ərazidir. Hərbi aspektləri açıqlamadan deyirəm ki, o istiqamətdə çox maraqlı bir vəziyyət yaranıb. Biz bir addım da atmaqla bir neçə məqsədə nail ola bilərik”.
Şair Ramaldanov dedi ki, düşmən qüvvələrinin mühasirəyə düşmək perspektivi var: “Azərbaycan Ordusunun qısa müddət sonra Laçına çıxma perspektivi var və bunu düşmən tərəf də nəzərə alır, bu da psixoloji durumlarına çox ciddi zərbə vurur. Baxmayaraq ki, orada bunkerləri, mühəndis istehkam qurğuları var, Azərbaycan Ordusunun bu istiqamətdə də dövlət sərhədinə çıxma ehtimalı zaman məsələsidir, arxada qalan hissədə problemləri asanlıqla həll etmək imkanları var. Azərbaycan Ordusunun bu gün 1 nömrəli tapşırığı dövlət sərhədinə çıxmaqdır. Ərazilərimizdə qalan düşmən qüvvələrinin neytrallaşdırılması elə də çətin məsələ olmayacaq. Mühasirədə olan, hər mənada təminatdan məhrum edilmiş düşmən qüvvələri seçim qarşısında qalacaqlar - ya təslim olacaqlar, əks təqdirdə, özlərinin məhvinə imza atacaqlar”.
Şair Ramaldanov deyir ki, bu gün Ermənistan silahlı qüvvələrinin 1 yolu var - silahı yerə qoyub Azərbaycan torpaqlarından çıxmaq.


Oxşar Xəbərlər

Xəbər lenti


{sape_links}{sape_article}