Müdafiə Nazirliyi: “Vəzifələrinin icrasına səhlənkar yanaşan, nöqsanlara yol verən bəzi vəzifəli şəxslər cəzalandırılıb”

Vətən müharibəsindən sonra sosial şəbəkələrdə əsgərlərin təminatı ilə bağlı yaranan problemlərlə bağlı məlumatlar rəsmi şəkildə araşdırılır.  Bildirilirdi ki, problemlərin yaranmasının müxtəlif səbəbləri var. Əsas problemlərdən biri əsgərlərin torpaqlarımızın işğaldan azad edilməsi ilə xidmət ərazilərinin genişlənməsi, dağlıq və çətin relyefdə olan mövqelərdə yerləşməsidir. Digər səbəblər arasında bəzi vəzifəli şəxslərin işlərinin öhdəsindən layiqincə gələ bilməməsi, əsgərə göndərilən payın ayrı-ayrı şəxslər tərəfindən ələ keçirilməsi və yenidən əsgərlərə pulla satılması iddiaları da var.
Bundan sonra Azərbaycanın Birinci vitse-prezidenti Mehriban Əliyevanın təşəbbüsü ilə Heydər Əliyev Fondu və “Bravo” supermarketlər şəbəkəsi işğaldan azad olunmuş ərazilərdə xidmət edən hərbi qulluqçulara yeni dəstək aksiyası başlatdı.
Aksiya çərçivəsində işğaldan azad olunmuş ərazilərdə hərbi xidməti davam etdirən əsgər və zabit heyəti üçün, onların istəkləri nəzərə alınmaqla, müxtəlif qida məhsulları, fərdi qulluq və gigiyenik ləvazimatlardan ibarət bağlamaların çatdırılmasına başlanıldı. Mesaj belə idi -  siqnal varsa, problem var, gözləmək olmaz! Lap problem yoxdursa da, daha yaxşı, əsgərin ərzağı, gündəlik tələbat vasitələri daha da bol olar! Onun bu davranışı nümunəvidir, təşviqedicidir və çox da lazımlıdır.

Birinci vitse-prezidentin əsgərə yardım kampaniyası başlatması çox əhəmiyyətli işdir. Mehriban Əliyevanın bu addımı əsgərlərin yaranmış problemlərini həll etmək əvəzinə “heç bir problem yoxdur”, “bəziləri təxribata yol verir” kimi əsassız fikirlər ortaya atanlara da cavab oldu. Çünki bu cür vəzifəli şəxslər problemin həllinə nail olmaq əvəzinə müxtəlif fərziyyələr və versiyalar irəli sürərək yaranmış vəziyyəti ört-basdır etməyə çalışırdılar.
Mehriban Əliyevanın təşəbbüsü, sosial şəbəkələrdə mətbuatda haqlı qınaq rəsmi qurumların, əsasən də Müdafiə Nazirliyinin hərəkətə keçməsinə səbəb oldu.
Müdafiə Nazirliyi dekabrın 23-də yaranmış vəziyyətlə bağlı rəsmi məlumat yayıb. Məlumatda qeyd edilir ki, müdafiə nazirinin əmri ilə nazirliyin müvafiq qurumlarının vəzifəli şəxsləri mütəmadi olaraq şəxsi heyətin yanında olur və şəraitə uyğun tələbatlar öyrənilir. Hərbi qulluqçular ərzaq və əşya təminatı normalarına uyğun bütün təminat növləri ilə fasiləsiz təmin olunur. Çöl şəraitində yerləşən bölmələrə əlavə çadırlar, sobalar və digər zəruri avadanlıqlar çatdırılır. Müxtəlif istiqamətlərdə səyyar mobil hamam-camaşırxana xidmətləri təşkil olunur, hərbi qulluqçular isti geyim formaları, yataq dəstləri, keyfiyyətli ərzaqla təmin edilir. Dağlıq ərazidəki hərbi hissələrin şəxsi heyəti normalara uyğun olaraq yüksək kalorili əlavə ərzaq payı ilə təmin olunur. Bununla yanaşı, anbarlarda kifayət qədər ehtiyatlar da mövcuddur.

Nazirlik bildirir ki, müharibə dövründə olduğu kimi, bu təşəbbüsə qoşulan xalqımız, müxtəlif təşkilatlar, şirkətlər, ayrı-ayrı şəxslər tərəfindən Ordumuza hərtərəfli yardım edilir. Əsgərlərimizə ərzaq payı normalarına daxil olmayan qida məhsulları, şirniyyatlar, fərdi gigiyena vasitələri və digər ləvazimatlar çatdırılır. Birinci vitse-prezident başda olmaqla, Azərbaycan Ordusuna dəstək olan hamıya Müdafiə Nazirliyinin rəhbərliyi bir daha dərin təşəkkürünü bildirir.
Bundan başqa, nazirlik bəzi yerlərdə nöqsanların olduğunu da açıqlayıb. Bildirilir ki, kompleks yoxlamalar nəticəsində ümumilikdə təminat məsələlərində sistemli problemlər aşkar edilməyib. Bəzi cüzi nöqsanlar müəyyən edilib və aşkar olunan bu çatışmazlıqlar dərhal aradan qaldırılıb. Vəzifələrinin icrasına səhlənkar yanaşan, nöqsanlara yol verən bəzi vəzifəli şəxslər cəzalandırılıb və onlar barəsində müvafiq tədbirlər görülüb.
Müdafiə Nazirliyi hərbi qulluqçuların valideynləri və yaxınlarına müraciət edərək bir daha bildirir ki, onları narahat edən məsələlərlə bağlı müraciətlərini sosial şəbəkələr vasitəsilə deyil, daha operativ həll olunması üçün nazirliyin sutka ərzində fasiləsiz fəaliyyət göstərən (012) 912, (012) 538-61-31, (012) 404-76-34 telefon nömrələri vasitəsilə bildirsinlər.