Azərbaycan Respublikasının Nazirlər Kabinetinə

Surəti: Azərbaycan Respublikasının Xarici İşlər Nazirliyinə

Son bir ildən çox müddətdə dünyada, o cümlədən Azərbaycanda hökm sürən Koronavirus (COVİD-19) pandemiyası şəraiti və onunla bağlı reallıqdan irəli gələn bir sıra məhdudiyyətlərin cəmiyyətin bütün təbəqələrinə müxtəlif səviyyələrdə təsir göstərdiyi aydın şəkildə özünü göstərmişdir. 

Bununla yanaşı, son aylarda bu məhdudiyyətlər üzrə mərhələ-mərhələ yumşalmaların həyata keçirilməsi özlüyündə müsbət tendensiya olduğundan, ötən dövr ərzində cəmiyyətdə problemlərin həlli, pandemiyanın və məhdudiyyətlərin insanlara psixoloji təsirinin azaldığı açıq şəkildə özünü büruzə verir. 
Xaricdə yaşayan ölkə vətəndaşlarının, eyni zamanda Azərbaycanda qohumluq əlaqəsi olan xarici ölkə vətəndaşlarının Azərbaycan Respublikasının Nazirlər Kabinetinin xüsusi razılığı əsasında Azərbaycana gəlməsinə icazə verilməsi də önəmli addımlardan biridir. 

Bununla belə, Nazirlər Kabinetinin razılığı əsasında Azərbaycana gəlməsinə icazə verilmiş şəxslərin müraciətlərinin müvafiq qaydada sənədləşdirilməsində yaranan çətinliklər ümumi görülmüş işlərə öz mənfi təsirini göstərir. 

Belə ki, müraciətə həm Nazirlər Kabinetində, həm Xarici İşlər Nazirliyində, həm də Dövlət Sərhəd Xidmətində operativ qaydada (bəzən müəyyən səbəblərdən istisnalar da olmuşdur) baxılsa da, Azərbaycan Respublikasına gəlməsinə icazə verilmiş Gürcüstan vətəndaşlarının Azərbaycana səfər etməsində çox ciddi problemlər yaranmışdır ki, bu da ümumilikdə görülmüş işlərə müəyyən qədər öz mənfi təsirini göstərir. 

Nazirlər Kabinetinin müraciət etmiş şəxsin Azərbaycana gəlməsinə icazə verməsi ilə bağlı Xarici İşlər Nazirliyinə, Dövlət Gömrük Komitəsinə və Dövlət Sərhəd Xidmətinə müvafiq məktub-məlumat göndərməsinə baxmayaraq, sonrakı prosedurun düzgün təşkil edilməməsi səbəbindən vətəndaş Gürcüstan ərazisində sənədləşmələrin aparılması üçün əlavə olaraq daha 6-9 gün vaxt və xərclərə yol verməli olur. Vətəndaş Azərbaycan Respublikası Nazirlər Kabineti tərəfindən çıxış üçün ona verilmiş məktubun nömrəsini şəxsən aparıb Azərbaycan Respublikasının Gürcüstandakı səfirliyinə təqdim etməli, səfirlik isə öz növbəsində bununla bağlı Gürcüstanın Xarici İşlər Nazirliyinə məlumat göndərməlidir. Nəticədə, 5-7 gün ərzində Xarici İşlər Nazirliyindən cavab alınmalıdır ki, bu da bir tərəfə 40-130 km məsafə qət olunmasını tələb edir. Bununla yanaşı, günlərlə zəng edilməsinə baxmayaraq, nə Azərbaycanın Gürcüstandakı Səfirliyinin, nə də Gürcüstanın Xarici İşlər Nazirliyinin internet səhifəsindəki telefon nömrələri ilə əlaqə saxlamaq mümkün olmur (səbəb müraciətlərin çoxluğu göstərilir).

“SOYDAŞ” İctimai Birliyi hesab edir ki, Azərbaycana gəlməsinə icazə verilmiş şəxslərin siyahısı Xarici İşlər Nazirliyi tərəfindən operativ qaydada birbaşa Gürcüstanın Xarici İşlər Nazirliyinə (və ya Gürcüstanın Azərbaycandakı Səfirliyinə) göndərilərsə, sənədləşmə daha qısa müddətdə həll edilmiş olar. Yekun cavabı isə bilavasitə müraciət etmiş şəxs müraciət etdiyi ölkədən (müvafiq olaraq Gürcüstandan və Azərbaycandan) almış olar. 

Təklifimiz hüquqi prosedur baxımından qiymətləndirilməzsə və ya tətbiqi mümkün olmazsa, bu halda fərqli və vətəndaşları qane edəcək prosedurun tətbiq edilməsi barədə müvafiq addımlar atmağınızı xahiş edirik.

“SOYDAŞ” İctimai Birliyi bir vətəndaş cəmiyyəti kimi, hər zaman həm dövlətimizin, həm də cəmiyyətimizin yanında olaraq yaşanan müəyyən problemlərin həllində vasitəçi olmağı özünə borc bilir.

Hörmətlə, 

SOYDAŞ İctimai Birliyinin İdarə heyətinin sədri  

Kamran Ramazanlı

Tarix: 07.06.2021