Elman Nəsirov: “İlk dəfədir ki, biz müstəqilliyimizi qalib dövlət olaraq qeyd edəcəyik”

10 gün sonra Azərbaycan özünün müstəqilliyinin 30 illiyini qeyd edəcək.
Xatırladaq ki, 18 oktyabr 1991-ci ildə parlamentdə Azərbaycanın dövlət müstəqilliyi haqda Konstitusiya Aktı qəbul edilib.  Müstəqilliyimizi tanıyan ilk dövlət Türkiyə, daha sonra Rumıniya və Pakistan olub.
Müstəqillik Bəyannaməsinin qəbulu xalqın iradəsi, Azərbaycan Xalq Cəbhəsinin Ali Sovet ətrafında təşkil etdiyi fasiləsiz mitinqlər, parlament daxilində istiqlalçı millət vəkillərinin apardığı fədakar mübarizə nəticəsində mümkün olub. Dövlət Müstəqilliyinin Bərpası haqqında 18 oktyabr 1991-ci ilin konstitusiya qanunu 1918-1920-ci illərdə mövcud olmuş Azərbaycan Xalq Cümhuriyyətinin hüquqi sənədlərinə və Azərbaycan Ali Sovetinin qəbul etdiyi 30 avqust Bəyannaməsinə əsaslanır.
Azərbaycanın müstəqillik gününün 30 illiyi həm də onunla özəldir ki, bu yubileyi qalib dövlətin qalib xalqı kimi qeyd edəcəyik. 30 il ərzində Azərbaycan ən ağrılı günlərdən keçib, ən böyük uğurlara imza ata bildi. Lakin olar ki, 30 ildə demək qazandığı ən böyük uğur 44 günlük Vətən müharibəsində əldə etdiyi zəfərdir.
Bəs dövlət səviyyəsində müstəqilliyin 30 illiyinə hazırlıq necə gedir?
Xatırladaq ki, cari ilin iyun ayında millət vəkili Vahid Əhmədov Azərbaycanın 30 illik müstəqilliyi ilə əlaqədar olaraq Milli Məclisin müəyyən tədbirlər planı işləyib hazırlanmasını təklif etmişdi.  Təkliflə bağlı hansısa işlər görüləcəkmi?

 Fazil Mustafa
Mövzu ilə bağlı millət vəkili Fazil Mustafa “Yeni Müsavat”a danışıb:
“Müstəqilliyimizin 30 illiyi ilə bağlı xeyli sayda təkliflər səsləndirilib. Onlardan biri də budur ki, Azərbaycanın müstəqilliyinə səs vermiş millət vəkilləri qiymətləndirilsin. Hesab edirəm ki, 30 illiyi yüksək səviyyədə qeyd etmək lazımdır. Bu, artıq yeni, şərəfli tariximizdir və biz bu tarixi dəyərləndirməliyik.
Əlbəttə ki, 30 il keşməkeşli oldu, müstəqillik rahat başa  gəlmir.   Amma   xeyli   uğurlar qazandıq. Bu uğurlar sayəsində bizim böyük imkanlarımız ortaya çıxdı. Xüsusən də Qarabağı azad etdikdən sonra daha böyük potensialımız gündəmdədir.
Beləliklə, müstəqilliyimizin uğurunu qazanmışıq və bu uğuru davam etdirməliyik. Qazandığımız ən böyük uğur Qarabağ zəfəridir. Çalışmalıyıq ki, bundan sonra hər hansı bir məğlubiyyət yaşamayaq".

Elman Nəsirov
Millət vəkili Elman Nəsirov bildirdi ki, müstəqilliyin 30 illiyi ilə bağlı ölkədə dövlət səviyyəsində tədbirlər keçiriləcək:
“İlk dəfədir ki, biz müstəqilliyimizi qalib dövlət olaraq, torpaqları işğaldan azad olan, ərazilərinin bütövlüyü bərpa olunan xalq kimi qeyd edəcəyik. Azərbaycanın Ali Baş Komandanı özünün Müzəffər Ordusu ilə tarix yazıb, yeni tarixi reallıqlar yaradıb. Bu gün Azərbaycan dövləti və xalqı qalibdir.
Ermənistan isə bu gün məğlubiyyət içərisində, faktiki olaraq vətəndaş müharibəsinin astanasında yaşayan dövlətdir. Reallıq budur. Onlar çox sönük şəkildə öz müstəqilliklərini qeyd etdilər. İlk dəfə idi ki, Ermənistanın ali siyasi rəhbərliyi Qarabağa, Xankəndinə gələ bilmədi və səbəb də bəllidir. Əlbəttə ki, hansı üzlə gələcəklər və ümumiyyətlə, onların Qarabağda nə işi var? Qarabağ Azərbaycandır, nida! Cənab Prezidentimiz də real həyatda bunu təsdiqlədi".

Vahid Əhmədov 
Millət vəkili Vahid Əhmədov isə qeyd etdi ki, parlamentdə Müstəqillik Günü ilə bağlı tədbirlər planının hazırlanması haqda səsləndirdiyi təklif barədə hələlik heç bir səs-soraq yoxdur:
“Hələlik etdiyim təklif barədə heç bir yenilik eşitməmişəm. Amma hesab edirəm ki, müstəqilliyimizin 30 illiyi çox yüksək səviyyədə keçirilməlidir. Çünki 18 oktyabr Müstəqillik Günüdür və bütün dünya bu münasibətlə ölkəmizi, dövlət başçımızı təbrik edir. Amma aldığım məlumata görə, artıq 28 mayı Müstəqillik Günü, 18 oktyabr Müstəqilliyin Bərpası Günü kimi qeyd edəcəklər. Bu da müzakirə obyektidir".
Qeyd edək ki, Azərbaycanda 28 May Müstəqillik Günü və 18 Oktyabr Müstəqilliyin Bərpası Günü hər il bayram kimi qeyd ediləcək. Bununla bağlı “Müstəqillik Günü haqqında” müddəa qanun layihəsində öz əksini tapıb.
İndiyə qədər Azərbaycanda 28 May Respublika Günü kimi qeyd edilirdi. Yeni qanun layihəsinə əsasən, 28 May Respublika Gününün adı dəyişdirilib və bundan sonra Müstəqillik Günü kimi qeyd ediləcək.
Qanun layihəsi Milli Məclisin Hüquq siyasəti və dövlət quruculuğu komitəsinin oktyabrın 7-də keçiriləcək iclasında müzakirə olunacaq.