Rasim Məmmədov, QHT rəhbəri: «Cənab nazir Ramil Usubov! İnanıram ki, Sizin tapşırıq və göstərişinizlə jurnalistə qarşı törədilmiş cinayət müəmmalarına tezliklə son veriləcək, cinayətkarlar sərt cəzalandırılacaq»
Ramiz Məlik, Xalq artisti: «Mən nazir Ramil Usubovun obyektivliyinə bələdəm və inanıram ki, jurnalist Asif Mərziliyə və qəzetin kollektivinə qarşı törədilmiş cinayətin sifarişçisi tezliklə qanun qarşısında cavab verəcək»
Xəbər verildiyi kimi, 2016-cı ilin martın 13-dən 14-ə keçən gecə Bakının mərkəzində «Təzadlar» qəzetinin baş redaktoru Asif Mərzilinin mənzili, 2016-cı ilin iyulun 9-da isə yenə də həmin ünvanda jurnalistin şəxsi avtomobili naməlum şəxslər tərəfindən benzin tökülərək qəsdən yandırılmışdır. Hadisənin ağırlıq dərəcəsi nəzərə alınaraq daxili işlrər naziri cənab Ramil Usubovun göstərişi ilə cinayət işi nəzarətə götürülmüş, dərhal Bakı şəhəri, Xətai rayon Polis İdarəsinin İstintaq Şöbəsində cinayət işi başlanılmış, sonra Bakı şəhər Baş Polis İdarəsinin İstintaq İdarəsinin icraatına qəbul edilmişdir (160110484 saylı cinayət işi, xüsusilə mühüm işlər müstəntiqi Nizami Əbilov). Cinayət hadisəsinin üstünün dərhal açılması üçün əməliyyat-istintaq qrupu yaradılmışdır. Jurnalist istintaqın qərarı ilə zərərçəkmiş kimi tanınmışdır. Lakin üstündən təxminən 2 il keçməsinə baxmayaraq hələ də cinayətkarlar məsuliyyətə cəlb edilməmişdir. Bu azmış kimi, cəzasız qalan cinayətkarlar redaksiyanın elektron poçtuna cinayətkarlar tərəfindən redaksiya əməkdaşlarının benzin tökülərək yandırılacağı ilə bağlı hədə dolu elektron məktub da göndəriblər. Bu artıq o deməkdir ki, cinayətkarlar istintaq orqanına açıq şəkildə meydan oxuyurlar. 
Redaksiya əməkdaşlarının həyəcan təbili çalan bəyanatı bu gün elektron mediada yayımlandıqdan sonra ölkənin tanınmış ziyalıları, QHT rəhbərləri, sayğılı oxucular tərəfindən çoxsaylı müraciət və məktublar almışıq. Onların bir qismini təqdim edirik:

 

Ramiz Məlik, Xalq artisti:

-İnana bilmirəm ki, ölkənin tanınmış bir qəzetinin baş redaktoruna, redaksiya kollektivinə qarşı törədilmiş ardıcıl cinayət hadisələri hələ də açılmamış qalmaqdadır. Mən şəxsən daxili işlər naziri Ramil Usubovun peşəkarlığına, qətiyyətliliyinə və obyektivliyinə bələdəm, inanıram ki, jurnalist Asif mərziliyə qarşı törədilmiş bu cinayət hadisəsinin üstü tezliklə açılacaq, cinayətin sifarişçisi qanun qarşısında cavab verəcək...

 

Rasim Məmmədov, İctimai Nəzarət Koalisiyasının rəhbəri, Dünya Azərbaycanlılarının Mədəniyyət Mərkəzi İctimai Birliyinin vitse Prezidenti, "Sabitlik və İnkişaf” Mərkəzi İctimai Birliyinin sədri: 
-Əlbəttə, 2 ilə yaxındır Azərbaycanda tanınmış bir qəzetin rəhbərliyinə qarşı mütəşəkkil cinayətkar dəstə tərəfindən törədilmiş iki cinayət hadisəsinin üstünün açılmaması, cinayətkarların məsuliyyətə cəlb edilməməsi məni sarsıdır, çox narahat edir. Bu azmış kimi, bu gün saytlarda oxudum ki, həmin cinayətkarlar indiyədək nəinki cəzalandırılıblar, məsuliyyətə cəlb olunublar, əksinə, onlar redaksiyaya elektron məktub göndərərək baş redaktor Asif Mərzilinin, redaksiya əməkdaşlarının benzin tökülərək yandırılacağını xəbərdar edib jurnalistləri ölümlə hədələyiblər. Mən üzümü çox hörmətli cənab nazir, general polkovnik Ramil Usubova tutaraq xahiş edirəm: hörmətli Ramil müəllim! Bilirsiniz ki, «Təzadlar» yeganə qəzetdir ki, başı üzərində Qarabağ şüarını 25 ildir gəzdirir, heç bir siyasi cərəyana qoşulmadan, dövlətçiliyimizə sədaqətlidir, müstəqil olaraq fəaliyyətini davam etdirir. Xatırlayırsınızsa, 2000-2001-ci illərdə Azərbaycanda dövlət çevrilişinə cəhd etmiş radikal qrupların ifşa edilməsi üçün məhz Sizin tapşırığınızla mən Rasim Məmmədov Rusiyaya ezam olunmuşam və müstəsna tapşırıqları yerinə yetirərək dövlətçiliyimizə xidmət göstərmişəm. Odur ki, bu gün Sizə müraciətim də təsadüfi deyildir. Ulu Öndər Heydər Əliyevin bir müdrik kəlamını xatırladıram: «Dövlət iki şeydə sarsıla bilər: günahsız cəzalandırıldıqda, cinayət törədən cəzasız qalanda!». Cənab nazir! Onu da bilirsiniz ki, Azərbaycan Prezidenti cənab İlham Əlyiev şəxsən Asif Mərziliyə böyük diqqət göstərib, 2009-cu ildə peşə fəaliyyəti ilə əlaqədar əsassız olaraq həbs ediləndə sərt reaksiya verib və Asif Mərzili iki gün sonra azadlığa buraxılıb. İndi belə bir jurnalistə, onun rəhbərlik etdiyi qəzetin kollektivinə qarşı törədilmiş cinayətin hələ də bağlı qalması təəssüf hissi doğurur. Asif Mərzili həm də Beynəlxalq Təşkilatların tanıdığı bir jurnalistdir və inanıram ki, Sizin tapşırıq və göstərişinizlə bu müəmmalara tezliklə son veriləcək, cinayətkarlar sərt cəzalandırılacaq.

 

Tanınmış hüquqşünas Əyyub Kərimov «Təzadlar»ın fəaliyyətinin dayandırılmasının əleyhinə olduğunu bildirdi: «Çünki redaksiyaya hədə dolu məktub göndərən qüvvələrin niyyətlərindən biri məhz qəzetin fəaliyyətinə mane olmaqdır. Ona görə də əgər redaksiya fəaliyyətini dayandırarsa, bu, hələlik istintaqa məlum olmayan qüvvələrin dəyirmanına su tökmək deməkdir. Mən hesab edirəm ki, «Təzadlar» fəaliyyətini davam etdirməlidir. Ancaq məsələ burasındadır ki, zərərçəkən və redaksiyanın kollektivi tərəfindən hüquq-mühafizə orqanlarından artıq xahiş yox, tələb olunmalıdır ki, nə vaxt hərəkətə keçəcəklər? Yoxsa, bu işə ciddi yanaşmaq üçün hansısa ölüm hadisəsi baş verməlidir?!» 

Tanınmış vəkil Adəm Məmmədov «Təzadlar»ın ünvanına göndərilən hədə məktubunu əslində redaksiyaya qarşı çox ciddi təhdid kimi qiymətləndirdi: «Görünür, Asif bəyin evini, sonra da avtomobilini yandıran şəxslər istintaqın hərəkətsizliyinə və məsuliyyətə cəlb edilmədiklərinə görə belə bir addım atmağa özlərində cürət tapıblar. Və daha da aqressivləşiblər. Bu da onu deməyə əsas verir ki, bu hadisələr vahid bir mərkəzdən gələn sifarişlərdir. Bu, təsadüf ola bilməz. Ona görə də hesab edirəm ki, bu təhdid cinayət məsuliyyətidir. Nə qədər ki, həmin qüvvələr istintaqa cəlb edilməyiblər, o zaman daha da əl-qol atacaqlar. Bunu nəzərə alaraq hüquq-mühafizə orqanları istintaqı obyektiv aparmalı və tezləşdirməlidirlər. Əks-təqdirdə, iş Dövlət Təhlükəsiplik Xidmətinə həvalə edilməlidir. Çünki bu cür işlərin obyektiv və vaxtında açılması üçün DTX-nin texniki imkanları daha genişdir».
Redaksiyanın fəaliyyətinin dayandırılmasına gəlincə, vəkil A.Məmmədov hesab edir ki, uzun illərdir fəaliyyət göstərən və nüfuzu olan «Təzadlar» qəzetinin fəaliyyətini dayandırması xoşagələn hal deyil: «Kollektivə səbrli və təmkinli olmalarını arzu edirəm, həmişə sizinləyik...». 

"Borçalı" cəmiyyətinin sədri, ictimai-siyasi xadim Zəlimxan Məmmədli isə bildirdi ki, biz demokratik hüquqi dövlətdə yaşayırıqsa, o zaman hər bir vətəndaşın hüquq və azadlıqları qorunmalıdır: «Əgər vətəndaşa və ya kollektivə hədə-qorxu dolu mesajlar göndərilərək təhdid edilirsə, bu o deməkdir ki, onların həyatı və sağlamlğı ciddi təhlükədədir. Bu cür halların qarşısının alınması isə təbii ki, hüquq-mühafizə orqanlarının işidir. Bu kimi faktların qarşısının vaxtında alınmaması isə təəssuf hissi doğurur. Ancaq yenə də hüquq-mühafizə orqanlarının cinayətkarın yaxalanması istiqamətində ciddi addımlar atacağına ümid edirəm».

 

Azərbaycanın tanınmış jurnalisti, teletənqidçi, filologiya elmləri doktoru, BDU-nun professoru, Əməkdar jurnalist Qulu Məhərrəmlinin fikrincə, jurnalistlərin fəaliyyət göstərməsi üçün ölkədə normal şərait olmalıdır: «Dövlət isə onların təhlükəsizliyini qorumalıdır. Əgər belə açıq təhdidlər, hədə-qorxular, şantajlar varsa, hesab edirəm ki, bu, birbaşa cinayət əməlidir. Və hüquq-mühafizə orqanları bu qüvvələri müəyyən edərək məsuliyyətə cəlb etməlidir. Çünki mətbuatımızın bugünkü susqunluğu dövründə «Təzadlar» qəzeti öz tənqidi və öbyektiv yazıları ilə fərqlənən mətbu orqandır. Ona görə də belə bir qəzeti təhdid hədəfinə götürmək və buna qarşı seyrçi qalmaq olmaz. Və bu halların aradan qaldırılmaması hüquq-mühafizə orqanları üçün ciddi qüsurdur. Eyni zamanda, biz jurnalistlər həmrəylik göstərərək həmkarlarımızın müdafiəsinə qalxaraq bu cür halların təkrarlanmamsına çalışmalıyıq. Jurnalist Asif Mərzilinin evi, sonra avtomobili benzin tökülərək qəsdən yandırılır, 2 il ötür və istintaq yerində dayanıb, nəticəsizdir. Bu yolverilməzdir...».