Yol polisi sürücünü yalnız iki halda təqib edə bilər

Fevralın 24-də Bakının Xəzər rayonunda yol polisinin "saxla” əmrinə tabe olmayan sürücü daha sonra atası və qardaşı ilə birgə onları təqib edən yol polislərinə hücum edib.

Azərbaycanda yol hərəkəti iştirakçılarının təhlükəsizliyə cavabdeh olan polis tərəfindən təqib edilməsi məsələsi həm "Yol Hərəkəti Haqqında”, həm də "Polis Haqqında” qanunla tənzimlənir.

Ekspert Ərşad Hüseynov bildirir ki, son vaxtlar bəzi vətəndaşlar hesab edirlər ki, yol polisi ilə rəftarda hər kəs istədiyini edə bilər: "Burada yol polislərinin özlərinin də məsələyə yanaşması da çox vacibdir. Bəzi yol polislərində xüsusi vasitələr və ya silah yoxdur. Onlar özlərinə təhkim edilmiş vasitələrdən lazım olan yerdə istifadə etmirlər. Məsələn polis əməkdaşına hücum varsa, onda odlu silah tətbiq edilə bilər. Polisə hücum dövlətə, hakimiyyət nümayəndəsinə hücum deməkdir və bunun qarşılığında öldürmək də var”. Avtomobilin yol polisi tərəfindən təqib edilməsinə gəlincə isə ekspert bildirib ki, avtomobilin təqibi yalnız iki halda baş verə bilər: "Əgər avtomobil yol hərəkət qaydasını pozubsa, sürücü sərxoşdursa, qəza şəraiti yaradırsa belə halda sürücüyə "saxla” əmri verilir. Əgər sürücü dayanma göstərişinə tabe olmursa, onu yalnız iki halda təqib etmək olar. Bu hallardan biri, sürücünün və avtomobildəki digər şəxs və ya şəxslərin hansısa cinayət törətməsi ilə bağlı məlumatın daxil olmasıdır.

İkincisi isə "saxla” əmrinə tabe olmayan sürücünün və ya avtomobildəki digər şəxs və ya şəxslərin cinayət törətməyə hazırlaşması ilə bağlı informasiyanın mövcudluğu ilə bağlı və ya öz hərəkətləri ilə digər şəxslərin həyat və sağlamlığına təhlükə yarada biləcəyi ilə bağlı ola bilər. Yalnız bu iki halda yol polisi tərəfindən avtomobilin təqib edilməsini həyata keçirilə bilər.

Digər hallarda avtomobilə "saxla”əmrini verən polis əməkdaşı dərhal raport tərtib edir və eyni zamanda həmin istiqamətdə xidmətdə olan polis əməkdaşlarına radiorabitə vasitəsi ilə xəbər verir. Raportda əmri verən polis əməkdaşı avtomobili hansı səbəbdən saxlamasını qeyd edir və dərhal skanerdən keçirərək sistemə yerləşdirir. Məlumat sistemə daxil olandan sonra istənilən yerdə yol polisi əməkdaşı üçün tabe olmayan avtomobili saxlamaq üçün əsas yaranır. Saxlanıldıqdan sonra isə həmin avtomobili idarə edən şəxs barəsində müvafiq tədbirlər görülür. Həm yol hərəkəti qaydasının pozulması, həm də yol polisinin qanuni tələbinə tabe olmamaqla bağlı məsuliyyətə cəlb edilir.

Hər hansı avtomobilin qırmızı işıqda keçməsi isə artıq cinayətin baş verəcəyinə əsas ola bilməz və buna görə yol polisinin sürücünü təqib etmək əsası yaranmır. Bütün bu fəaliyyətlər Yol Hərəkəti Haqqından Qanunun 85-ci, Polis Haqqında Qanunun 20-ci maddəsi ilə tənzimlənir”. "Yol Hərəkəti Haqqında” qanunun 85-ci maddəsində deyilir: Nəqliyyat vasitəsi bu Qanunun 37-ci maddəsinin I hissəsinin 1-ci bəndində nəzərdə tutulmuş sənədlərin yoxlanılması məqsədilə yalnız stasionar postlarda dayandırıla bilər. Nəqliyyat vasitəsinin dayandırılması fit və jezllə işarə verməklə və ya səsgücləndirici cihaz vasitəsilə nəqliyyat vasitəsini idarə edən şəxsin aydın görə və ya eşidə biləcəyi şəkildə tələb edilməlidir. Nəqliyyat vasitəsinin dayandırılması tələbi sürücü tərəfindən yerinə yetirilmədikdə, pozuntunun vaxtı, yeri, xarakteri, nəqliyyat vasitəsinin markası, rəngi, hərəkət istiqaməti, dövlət qeydiyyat nişanı və digər mühüm əlamətləri göstərilməklə müvafiq icra hakimiyyəti orqanının digər əməkdaşlarına radio-cihaz vasitəsilə məlumat verilir və bundan sonra yazılı formada müvafiq raport tərtib edilir.

Nəqliyyat vasitəsinin dayandırılması tələbini yerinə yetirməyən sürücü öz hərəkətləri ilə insan həyatına və sağlamlığına real təhlükə yaratdıqda nəqliyyat vasitəsi təhlükəsizlik şərtlərinə əməl edilməklə və müvafiq icra hakimiyyəti orqanının yuxarı vəzifəli şəxsinə radio-cihaz vasitəsilə məlumat verilməklə təqib oluna bilər, həmin nəqliyyat vasitəsinin dayandırılmasına başqa imkan olmadıqda isə bu məqsədlə məcburi dayandırma vasitələrindən istifadə oluna bilər.




Oxşar Xəbərlər

Xəbər lenti


{sape_links}{sape_article}