Azərbaycan Respublikasının Prezidenti cənab İlham Əliyevin həyata keçirdiyi düşünülmüş xarici siyasət nəticəsində Azərbaycanla tərəfdaş və dost olan ölkələrin sayı durmadan artmaqdadır. Bu münasibətlər daha da inkişaf etdirilir, starateji tərəfdaşlıq və müttəfiqlik səviyyəsinə gəlib çıxır. Artıq Azərbaycanla starateji tərəfdaş ölkələrdən biri də Qırğızıstandır. Qırğız Respublikasının Prezidenti Sadır Japarovun aprelin 20-də ölkəmizə rəsmi səfəri Azərbaycan və Qırğızıstan arasındakı münasibətlərin yeni mərhələyə qədəm qoyması kimi qiymətləndirilə bilər.
Qırğız Respublikasının Prezidenti Sadır Japarovun Azərbaycana rəsmi səfəri çərçivəsində 10 sənəd imzalanıb. İmzalanmış sənədlər sırasında Strateji Tərəfdaşlıq haqqında Bəyannamə və Dövlətlərarası Şuranın yaradılması haqqında Memorandum xüsusi əhəmiyyətə malikdir. Bu, o deməkdir ki, strateji tərəfdaşlıq qarşılıqlı fəaliyyətin yüksək səviyyəsidir və ölkələri məhz strateji xarakterli əməkdaşlığa kökləyir. Qarşılıqlı əməkdaşlığın səmərəliliyini artıran digər amil isə Dövlətlərarası Şura çərçivəsində həm ikitərəfli gündəliyə aid məsələlər, həm də regional və beynəlxalq problemlər daha effektli və fəal surətdə müntəzəm müzakirə olunmasıdır.
Ölkələrimiz bir çox eyni beynəlxalq təşkilatlarda - Qoşulmama Hərəkatı, BMT, ATƏT, İslam Əməkdaşlıq Təşkilatı, ECO, Türk Dövlətləri Təşkilatında təmsil olunurlar. Hər iki ölkə bütün beynəlxalq təşkilatlarda ənənəvi olaraq həmişə bir-birini dəstəkləyir. Azərbaycanda yüklərin bütün istiqamətlərə - həm Şimala, həm Cənuba, həm də Qərbə göndərilməsinə imkan verən müasir nəqliyyat infrastrukturu yaradılıb. Azərbaycanın liman infrastrukturunun imkanları Qırğızıstan üçün açıqdır.
Lakin bununla yanaşı bəzi sahələr vardır ki, burada hər iki ölkə öz səylərini birləşdirməlidir. Buna misal olaraq nəqliyyat infrastrukturunun və Şərq-Qərb nəqliyyat dəhlizinin daha səmərəli fəaliyyət göstərməsi üçün səylərin birləşdirilməli olduğunu göstərmək olar. Azərbaycanda yüklərin bütün istiqamətlərə - həm Şimala, həm Cənuba, həm də Qərbə göndərilməsinə imkan verən müasir nəqliyyat infrastrukturu yaradılıb. Azərbaycanın liman infrastrukturunun imkanları Qırğızıstan üçün açıqdır. Həmçinin Qırğızıstan iqtisadiyyatının enerji sektoru Azərbaycan şirkətləri üçün maraqlı ola bilər. Azərbaycan şirkətlərinin müasir enerji müəssisələrinin, elektrik stansiyalarının, o cümlədən istilik elektrik stansiyalarının yaradılmasında müəyyən təcrübəsi var. Bu istiqamətdə də səylərin birləşdirilməsinə və Azərbaycanın investisiya potensialına çox böyük ehtiyac var.
Azərbaycan və Qırğızıstan arasında perspektiv əməkdaşlıq istiqamətlərindən biri də kənd təsərrüfatı sahəsidir. İki ölkə arasında imzalanmış sənədlərə uyğun olaraq prezidentlərin tapşırıqlarının əməli surətdə yerinə yetirilməsi məqsədilə Azərbaycanın Kənd Təsərrüfatı Nazirliyinin nümayəndə heyətinin yaxın vaxtlarda Qırğızıstana səfəri planlaşdırılır.
Dövlət başçılarının görüşü zamanı gələn il Qırğız Respublikası ilə diplomatik münasibətlər qurulmasının 30 illiyinin qeyd ediləcəyini bildirən Azərbaycan Prezidenti İlham Əliyev bunu tarixi hadisə adlandırdı. Dövlətimizin başçısı münasibətlərin strateji tərəfdaşlıq səviyyəsinə çatdığını qeyd edərək, belə bir hadisənin əlamətdarlığını xatırladaraq ötən 29 il ərzində iki dövlət arasında münasibətlərin ilk dəfə bu səviyyəyə yüksəldiyini diqqətə çatdırdı. Prezident İlham Əliyev, eyni zamanda strateji tərəfdaşlığın böyük üstünlüklər verəcəyini və beynəlxalq qurumlarda iki ölkənin bir-birinin maraqlarını müdafiə edəcəyini önə çəkib.
Xalqlarımız ortaq mədəni irs və ortaq tarixə malik xalqlardır. Məhz Azərbaycanla Qırğızıstanı birləşdirən bir çox ortaq dəyərlər ölkələrimizin starteji tərəfdaş olmasını şərtləndirən əsas səbəblərdəndir. Dövlətlərarası münasibətlərdə humanitar sahə həmişə mühüm yer tutub. Bu sahədə mühüm əlaqələri olan ölkələrimiz mütəmadi olaraq qarşılıqlı təşəbbüslərlə çıxış edir və bir-birini dəstəkləyirlər. Azərbaycanın qədim şəhəri Şuşanın  gələn il türk dünyasının mədəniyyət paytaxtı elan olunması təşəbbüsünün Qırğızıstan tərəfindən dəstəkləməsi də deyilənlərə əyani sübutdur. Qırğız Respublikasının Prezidenti Sadır Japarovun səfəri zamanı imzalanmış sənədlərə əsasən ölkələrimiz arasında münasibətlər bundan sonra daha da inkişaf edəcək və hər iki ölkənin iqtisadi imkanlarının güclənməsinə əlavə töhfə olacaqdır.
 
Bakı şəhəri Suraxanı rayonu 13 saylı
Birləşmiş Şəhər Xəstəxanasının
baş həkimi Vidadi Bayramov