Quba rayonunda uzun müddətdir davam edən məişət tullantılarının vaxtında daşınmaması problemi artıq kritik həddə çatıb. Rayon mərkəzi və ətraf kəndlərdə zibillərin toplanmaması, konteyner çatışmazlığı və nəzarətsizlik əhalinin narazılığını pik həddə yüksəldib. Sosial şəbəkələrdə, yerli mediada və vətəndaş müraciətlərində Qubanın natəmiz küçələri ilə bağlı şikayətlər get-gedə artır.

Əski-İqrığ kəndi meşələrində ekoloji fəlakət

Son görüntülərdən də göründüyü kimi, Əski-İqrığ kəndi yaxınlığındakı meşə massivinə atılan zibil yığınları artıq təkcə gigiyenik deyil, həm də ekoloji təhlükə yaradır. Meşəlik əraziyə atılmış plastik tullantılar, məişət zibilləri və digər sərt materiallar torpağı çirkləndirir, heyvanların yaşam mühitinə müdaxilə edir və uzunmüddətli ekoloji zərər vurur.

Bu hal bir daha göstərir ki, rayon üzrə zibilin yığılması və daşınması sahəsində ciddi boşluq mövcuddur.

Məsul qurumun fəaliyyətsizliyi – Quba Mənzil Kommunal Təsərrüfatı Birliyi hara baxır?

Qubada məişət tullantılarına cavabdeh qurum olan Mənzil Kommunal Təsərrüfatı Birliyi öz funksiyalarını yerinə yetirmir. Sakinlərin dediklərinə görə:

Zibil maşınları bəzi küçələrdən günlərlə keçmir;

Bəzi ərazilərdə zibil qutuları ümumiyyətlə yoxdur;

Mövcud konteynerlər isə həddindən artıq dolub-daşır;

Sürətli reaksiya və nəzarət mexanizmi sıfıra bərabərdir.

Qurumun sədri Dəyanət Quliyev isə qəbul saatlarında belə iş otağında tapılmır. Vətəndaşlar dəfələrlə müraciət etsələr də, ya rəisin işdə olmadığı bildirilir, ya da qəbula düşmək mümkün olmur. Bu isə bir daha sübut edir ki, Qubada tullantı təsərrüfatı məsuliyyətsizlik və nəzarətsizlik ucbatından iflic vəziyyətinə gəlib.

Cavabsız qalan şikayətlər – sistem niyə işləmir?

Zibillərin yığışdırılmaması ilə bağlı çoxlu sayda şikayətlər olsa da, real addımlar atılmır. Bu problemin uzun müddətdir həll olunmaması aşağıdakı ehtimalları gücləndirir:

Qurum daxilində ciddi idarəetmə boşluğu var;

İş prosesinə nəzarət olunmur;

Yerli icra strukturları məişət tullantıları sahəsinə diqqət ayırmır;

Ekoloji və kommunal xidmətlər arasında koordinasiya yoxdur.

Ekoloji təhlükə get-gedə böyüyür

Qubada meşələrin zibilliyə çevrilməsi yalnız bir kəndin problemi deyil. Bu gün müdaxilə olunmazsa, yaxın illərdə bölgənin təbii flora və faunası ciddi zərər görə bilər. Zibilin yandırılması, torpağa qarışması, çaylara axıdılması kimi hallar daha ağır nəticələrə gətirib çıxaracaq.

Aidiyyəti qurumlar cavab verməlidirlər:

1. Quba rayonunda zibilin daşınması üzrə niyə davamlı bir mexanizm qurulmayıb?

2. Mənzil Kommunal Təsərrüfatı Birliyinin sədri Dəyanət Quliyev niyə iş vaxtı qəbulda olmur?

3. Əski-İqrığ kəndi meşələrindəki zibil nə üçün aylarla yığışdırılmır?

4. Ekoloji pozuntulara görə hansı məsul şəxslər cavab verəcək?

5.Qubanın sakinləri hər gün çirkli küçələrdə yaşamağa məhkumdur, yoxsa vəziyyətin dəyişməsi üçün real addımlar atılacaq?

Afət Məmmədova

Qeyd: Qarşı tərəfin də mövqeyini öyrənməyə hazırıq.

Sozcu.info