Bakıda marketdə işləyən gözətçini öldürən dostlar növbəti dəfə hakim qarşısına çıxarılır. Onlardan biri 17 il, digəri isə 18 il həbs cəzası alıb.
Sozcu.info xəbər verir ki, Bakı Ağır Cinayətlər Məhkəməsində qətl törətməkdə ittiham edilən Fuad Yusifli və Sadiq Cəlalovun cinayət işi üzrə məhkəmə iclası başa çatıb.
Hakim Zeynal Ağayevin sədrliyi ilə keçirilən məhkəmə iclasında hökm oxunub.
Hökmə əsasən Fuad Yusifli 18 il, Sadiq Cəlalov isə 17 il müddətinə azadlıqdan məhrum ediliblər.
Hadisə 2020-ci ilin iyun ayında baş verib. Hüseyn Əhmədovun Sabunçu rayonu Kürdəxanı qəsəbəsi ərazisində yerləşən işlədiyi mağazanın anbarında üzərində zorakılıq əlamətləri olan meyiti aşkar edilib. Polis əməkdaşları tərəfindən bu cinayət əməlini törətməkdə şübhəli bilinənlər - Tərtər rayon sakini Fuad Yusifli və Kürdəmir rayon sakini Sadiq Cəlalov saxlanılıb.
Aparılmış istintaqla məlum olub ki, adları çəkilən şəxslər qabaqcadan əlbir olub cinayət əlaqəsinə girərək, həmin tarixdə mağazanın anbar qapısından içəri daxil olan, orada mühafizəçi işləyən Hüseyn Əhmədova yumruqla zərbələr vurmaqla, habelə əllərini, ayaqların və ağzını yapışqan lentlə bağlamaqla onu öldürüblər. Daha sonra isə mağazanın içərisindəki dəmir seyfdən 51 min 292 manat məbləğində pulu götürüb talayaraq, quldurluq ediblər.
Hər iki şəxs ibtidai istintaq zamanı müdafiəçinin iştirakı ilə dindirilərkən törətdikləri cinayəti etiraf edib. Onlardan hadisə zamanı mağazadan əldə etdikləri vəsait, həmçinin, mağazanın mühafizə kameraları üçün quraşdırılmış cihazlar maddi sübut kimi götürülüb.
Təqsirləndirilən şəxslərə qarşı Cinayət Məcəlləsinin 120.2.1- ci (qabaqcadan əlbir olan bir qrup şəxstərəfindən adam öldürmə) və 120.2.5-ci (tamah məqsədi ilə adam öldürmə) maddələri ilə ittiham irəli sürülüb.