Sozcu.info xəbər verir ki, hakim Azad Məcidovun sədrliyi ilə keçirilən prosesdə hakim bildirib ki, siyahı üzrə 49 nəfər şahidin 46-sı dindirilib.

Məhkəmədə dindirilməyən Kanvoy taborunun əsgəri olmuş Röyal Əhmədovun, Lənkərandan Bakıya etab olunan dustaq Cavid Nehmətovun və Şirvan şəhər sakini Anar Həsənovun istintaqa verdiyi ifadə elan edilib.

Anar Həsənov istintaqdakı ifadəsində "Qoca" ləqəbli Etibar Məmmədovu və "Kriti Elvin" ayamalı Elvin Nəciyevi (Şirvanda "Qoca" tərəfindən öldürülüb) tanıdığını bildirib: "Etibarın sayəsində Fadayə xanımı da tanımışan. Mobil nömrəsi məndə olub. Bir-iki dəfə telefonda danışmışıq. Lakin Elvin öldürüləndən sonra "Qoca" ilə münasibətim olmayıb. Fədayə xanımla da danışmamışam"

Prosesdə vəkillər müvəkkillərinin məhkəmə zalında əllərinə vurulan qandalın açılmasını tələb ediblər.

Hakim vəkillərin bu istəyini təmin edib və təqsirləndirilən şəxslərin qandalları açılıb.

Vəkillər istintaqda dindirilən, lakin şahidlər siyahısına daxil edilməyən şəxslərin də dindirilməsini istəyiblər.

Hakim bildirib ki, işə obyektiv baxılması üçün həmin şəxsləri dindirəcəklər.

Proses oktyabrın 10-da davam edəcək.

Qeyd edək ki, ötən il oktyabrın 23-də Bakıda məhbusların qaçması faktı ilə bağlı Baş Prokurorluğun Ağır Cinayətlərə Dair İşlər üzrə İstintaq İdarəsində başlanan cinayət işi üzrə Fədayə Məmmədova (Fədayə Laçın) təqsirləndirilən şəxs qismində cəlb olunaraq Nəsimi Rayon Məhkəməsinin qərarı ilə barəsində həbs qətimkan tədbiri seçilib.

Onun barəsində Cinayət Məcəlləsinin 304.2.1-ci (mühafizə altında olan şəxsə qaçmağa yardım etmə, qabaqcadan əlbir olan bir qrup şəxs tərəfindən törədildikdə) maddəsi ilə cinayət işi başlanılıb.

Baş Prokurorluğun Ağır cinayətlərə dair işlər üzrə istintaq idarəsində Cinayət Məcəlləsinin 304.2.1 (qabaqcadan əlbir olan bir qrup şəxs tərəfindən azadlıqdan məhrum etmə və ya həbs yerindən, yaxud mühafizə altından qaçma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə cinayət işi başlanmaqla istintaq qrupu yaradılıb, dərhal təxirəsalınmaz istintaq hərəkətləri aparılıb.

Baş Prokurorluğun, Daxili İşlər Nazirliyinin və Ədliyyə Nazirliyi Məhkəmə Ekspertizası Mərkəzinin ekspertlərinin iştirakı ilə hadisə yerinin müfəssəl müayinəsi həyata keçirilib, maddi sübutlar götürülüb, şahidlər dindirilib və digər zəruri prosessual hərəkətlər yerinə yetirilib.

Əməliyyat-axtarış tədbirləri nəticəsində 2017-ci ilin oktyabrın 23-də Bakı-Astara-Bakı planlı dəmir yolu qarovulu ilə Bakı şəhərinə müşayiət zamanı xüsusi vaqondan qaçmış, 1989-cu ildə Şirvan şəhərində anadan olmuş, əvvəllər məhkum olunmamış, Cinayət Məcəlləsinin 120.2.2 və 228.1-ci maddələri ilə təqsirləndirilən Əli Ağami Şirvan şəhərində tutularaq istintaq təcridxanasına yerləşdirilib, araşdırma aparılır. "Qoca” ləqəbli Etibar Məmmədov isə saxlanılan zaman atışmada ölüb.

Xatırladaq ki, cinayət işi üzrə 13 nəfər təqsirli bilinir və 1 nəfər barəsində isə axtarış elan olunub. Həbsdə olan şəxslər - müğənni F.Laçın, Penitensiar xidmətin Konvoy taborunun keçmiş komandiri Bəhruz Abdullayev, Penitensiar xidmətin üç sabiq əməkdaşı - qarovul rəisi Ceyhun Səmədov, qarovul rəisinin müavini Fuad Hacıyev və qarovul rəisinin digər müavini Tural Poladxanov, Əli Ağami, Günay Atakişiyeva, taksi sürücüsü Məhəmməd Hacıyevlə yanaşı, Aqil Nəcəfov, Anar Əsgərov, İsrəfil Soltanov, Şahmar Bəyəlizadə və Tərlan Zeynalovdur.

İttiham aktına əsasən, 7 nəfər - Müzəffər Məmmədov, Emil Səfərov, Ramil Səlimov, Hətəm Əliyev, Vüsal Abbasov, Rövşən Camalov və Rəşad Məmmədov zərərçəkmiş şəxs qismində tanınır./report/