44 günlük Vətən Müharibəsində Şanlı Qələbəmizin birinci ildönümü münasibətilə noyabrın 5-də Suraxanı Rayon İcra Hakimiyyətində “Qalib Azərbaycan xalqı” adlı tədbir keçirilib.
Sozcu.info xəbər verir ki, tədbirdə Suraxanı Rayon İcra Hakimiyyətinin başçısı Əziz Əzizov, RİHB yanında Şuranın üzvləri, rayonun hüquq-mühafizə orqanlarının, idarə, müəssisə və təşkilatların rəhbərləri, şəhid ailələri və qazilər iştirak edib.
Tədbir iştirakçıları əvvəlcə Ulu Öndərin Heydər Əliyev parkında ucalan abidəsini ziyarət edərək önünə gül dəstələri qoyub və rayon İcra Hakimiyyətində sərgilənmiş Zəfər gününə həsr olunan rəsm əsərləri ilə tanış olublar.
Dövlət himninin səsləndirilməsi ilə başlanan tədbirdə rayon İcra Hakimiyyətinin başçısı Əziz Əzizov çıxış edərək qalib xalq olmağın sonsuz sevinc və qürurunu yaşayan xalqımızı və tədbir iştirakçılarını Zəfər günü münasibəti ilə təbrik edib və Azərbaycanın azadlığı, müstəqilliyi uğrunda canından keçərək şəhid olmuş vətən övladlarımızın xatirəsi bir dəqiqəlik sükutla yad edilib.
RİH başçısı Əziz Əzizov prezident, Ali Baş Komandan İlham Əliyevin rəhbərliyi ilə ötən ilin sentyabrın 27-də başlanan və zəfərlə başa çatan Vətən müharibəsində qazanılan qələbənin tarixi əhəmiyyətindən bəhs edərək bildirib ki, həyata keçirilən düşünülmüş siyasətin və vaxtında atılan addımların nəticəsi olaraq biz bu gün qalib ölkəyi: “Ölkə başçımız dahi siyasətçi, müdrik dövlət xadimi ulu öndər Heydər Əliyevin layiqli varisi kimi onun vəsiyyətini həyata keçirdi və arzuladığı Qarabağı azad etdi. O, həm də bütün dünyaya sübut etdi ki, Azərbaycan xalqı qəhrəman, məğrur xalqdır. Qalib Azərbaycan xalqı Ali Baş Komandan İlham Əliyevin ətrafında sıx birləşərək bütün dünyaya öz gücünü, mətinliyini, mübarizliyini nümayiş etdirdi. Həmçinin, dövlətimiz tərəfindən şəhid ailələrinə və qazilərə diqqət ayrılır.
Zəfər gününə həsr olunmuş video rolikin nümayişi və Gülarə Əliyeva adına 3 nömrəli Uşaq İncəsənət Məktəbinin müəllimlərinin müşayiəti altında Suraxanı rayon gənci Gülyaz Həsənzadənin ifası ilə davam etdirilən tədbirdə Azərbaycan Respublikası Prezidentinin müvafiq sərəncamı ilə təltif olunan şəhid və qazilərin orden və medallarının təqdimetmə mərasimi keçirilib.
Tədbirin sonunda 87 saylı tam orta məktəbin şagirdlərinin təqdimatında “Qalib Azərbaycan Xalqı” adlı tamaşa nümayiş etdirilib.