Bir müddətdir Sumqayıt sakinləri şəhəri bürüyən pis qoxu və tüstüyə səbəb olan zibil poliqonu barədə sosial şəbəkələrdə etiraz edir.
Yeniavaz.com xəbər verir ki, bu barədə araşdırma edən ekoaktivistlər pis qoxu və tüstünün tək zibil poliqonundan gəlmədiyini iddia edib. Onların sözlərinə görə, ərazidə yerləşən zavodlar şəhərin havasını çirkləndirir:
“Sumqayıtda Zibil poliqonu demək olar ki, sönüb. Bir neçə günə də tam sönər. Sumqayıtın havasının çirklənməyinin 2 əsas səbəbi var. 
1. Sumqayıt Kimya Sənaye parkı
2. STP dəki zavodlardan biri”.
Onlar həmçinin Ekologoya və Təbii Sərvətlər Nazirliyinə inamın qalmadığını bildiriblər: “Zibil poliqonu yananda ETSN yatmışdı. İndi də bu zavodları müdafiə etmək üçün poliqon deyib durur. ETSN-in apardığı heç bir ölçməyə, monitorinqə, nə bizim, nə də xalqın zərrə qədər inamı qalmayıb. Ona görə sadə çıxış yolu var. Gəlin bu iki zavodun fəaliyyətini 1-2 günlük dayandıraq. Görün Sumqayıtın havası necə dəyişəcək. Ölçməyə ehtiyac yoxdur, hər kəs hiss edəcək”.

Məsələ ilə bağlı Sumqayıt Şəhər İcra Hakimiyətinin mətbuat katibi Eyvaz Qocayevlə əlaqə saxladıq. Onun Yeniavaz.com-a verdiyi açıqlamaya görə, Sumqayıtda məişət tullantıları poliqonunda baş vermiş yanğın təbii şəkildə meydana gəlir: 
“İllərdir toplanan tullantılar yer altında qazlaşmaya səbəb olur və nəticədə də yanğın baş verir. Lakin bu hadisə ötən həftə baş verib. Sumqayıt şəhər məişət tullantıları poliqonunda ötən gün və ondan öncəki gün ərzində yanğın hadisəsi baş verməyib. Bir neçə gün öncə gecə saatlarında havadakı mövcud vəziyyət poliqon ərazisi ilə əlaqəsi yoxdur. Dünən gecə saatlarında da əraziyə baxış keçirilib və məlum olub ki, poliqon ərazisində tüstülənmə yoxdur. 
Poliqon ərazisi daim Sumqayıt Şəhər İcra Hakimiyyəti tərəfindən nəzarətdə saxlanılır. Sumqayıt Şəhər İcra Hakimiyyəti başçsının bununla bağlı sərəncamı var və işçi qrup yaradılıb. Ərazidə yanğın hallarının olmaması üçün mütəmadi olaraq torpaqlama və digər qabaqlayıcı tədbirlər görülür. 
Sumqayıt şəhərində məişət tullantılarının toplanması, daşınması, zərərsizləşdirilməsi və emalı sahəsində müasir standartlara cavab verən sistemin yaradılması və yeni texnologiyalara əsaslanan zavodun tikilməsi ilə bağlı ilkin layihələndirmə işləri həyata keçirilib və müvafiq dövlət qurumlarına təqdim olunub. Bu istiqamətdə işlər davam etdirilir”.
Eyvaz Qocayev həmçinin, Sumqayıtda havanı çirkləndirdiyi iddia edilən zavodlarla bağlı Sumqayıt Şəhər İcra Hakimiyyətinin araşdırma apardığını da qeyd edib.
Mövzu ilə bağlı Yeniavaz.com-a açıqlama verən Ekologiya və Təbii Sərvətlər Nazirliyinin (ETSN) Dövlət Ekoloji Təhlükəsizlik Xidmətinin rəisi Hikmət Əlizadə bildirib ki, Sumqayıtda havanın çirklənməsi ilə bağlı məsələni ETSN dəfələrlə yerli icra orqanlarının nəzərinə çatdırıb: 
“Həmin poliqonun idarə edilməsi ilə məşğul olan “Sumqayıt şəhər Təmizlik Departamenti” MMC cərimələnib. Təkcə 2020-ci ildə bu poliqonu idarə edən hüquqi şəxs 6 min 800 manat məbləğində cərimələnib, dəfələrlə məcburi göstəriş verilmişdir. 2021-ci ilin yeddi ayı ərzində 5 akt, 2 inzibati protokol tərtib edilib. Son dəfə isə iyul ayının sonunda 4 min 800 manat məbləğində cərimə tədbiri tətbiq edilib. Lakin biz də anlayırıq ki, bu cərimələrlə problem həllini tapmır.
Xidmət rəisi Hikmət Əlizadə, Sumqayıtda yerləşən zavodların havanı çirkləndirməsi barədə yayılan iddiaların əsassız olduğunu bildirib: 
“Biz həmin əraziləri ən müasir cihazlarla monitorinq etmişik. Müəyyən edilib ki, orada yanğın baş verməsə belə, dəm qazının miqdarı normadan dəfələrlə yüksəkdir. Nəticədə bu şəhər ərazisində xoşagəlməz iy-qoxunun yayılmasına gətirib çıxarır”.
H.Əlizadə qeyd edib ki, həll yolu tapmaq üçün qurumları cərimələkdən əlavə, müasir tələblərə cavab verən poliqon yaradılmalıdır:
“İlk olaraq görüləcək iş məişət tullantılarının çeşidlənməsidir. Bu baş verdikdə, bizim hal-hazırda müşahidə etdiyimiz problem olmayacaq. Çünki, bu gün məişət tullantıları necə gəldi basdırılır və torpağın alt qatlarında gedən proseslər nəticəsində öz-özünə alışma baş verir. Bildiyimiz kimi, Balaxanıda müasir standartlara cavab verən məişət tullantıları poliqonu var. Həmin poliqonun Sumqayıtda yaradılmasına imkan yoxdursa belə, yerli icra orqanları tullantıların toplanıb Balaxanı poliqonuna daşınması haqqında fikirləşə bilər. Bunun üçün müvafiq nəqliyyat vasitələri, iri tutumlu nəqliyyat vasitələrinin alınması gərəkdir. Eyni zamanda bəzi müəssisələr nazirliyə müraciət edib ki, onlarda məişət tullantılarının yarandılması üçün imkan var. Həmin müəssilərlə əlaqə saxlanıla bilər. Yerli orqanlar bu variantlar üzərində çalışmalıdır. Yerli pilot layihələr hazırlana bilər. Məsələn, keçən ildən etibarən Ekologiya və Təbii Sərvətlər Nazirliyi 37 regionda 250 nöqtədə xüsusi plastik tullantıların yığılması üçün konteynerlərin quraşdırılması, onların çeşidlənməsi ilə bağlı pilot layihə həyata keçirir. Bu gün əgər hansısa regionda belə bir problem varsa, bu cür pilot layihələrin üzərində işlənə bilər”.