Turizmdə pandemiyanın yaratdığı ağır böhran davam edir

2021-ci ilin yanvar ayı ərzində Azərbaycanın ümumi ixracı 1,6 milyard dollar təşkil edib ki, bunun da 146 milyon dollarını qeyri-neft məhsulları təşkil edib. Qeyri-neft sektoru üzrə ixrac 2020-cu ilin müvafiq dövrü ilə müqayisədə 5,2 milyon dollar və ya 3,7 faiz artıb.
 İqtisadi İslahatların Təhlili və Kommunikasiya Mərkəzinin “İxrac İcmalı”ndan məlum olur ki, 2021-ci ilin yanvar ayı ərzində Türkiyəyə 52,7 milyon, Rusiyaya 42,8 milyon, İsveçrəyə 10 milyon, Gürcüstana  6,4 milyon və Çinə 4,3  milyon dollar dəyərində qeyri-neft sektoruna aid mal ixrac olunub.
İlin birinci ayında ixrac edilən qeyri-neft sektoruna aid malların siyahısında xurma (16,7 milyon dollar) birinci, pambıq mahlıcı (14,3 milyon dollar)  ikinci və qabığı təmizlənmiş meşə fındığı (10,2 milyon dollar) üçüncü olub. 2021-ci ilin ilk ayı ərzində meyvə-tərəvəz ixracı 37 milyon, pambıq lifi ixracı 14,3 milyon, alüminium və ondan hazırlanan məmulatların ixracı 13,8 milyon, kimya sənayesi məhsullarının ixracı 3 milyon, qara metallar və onlardan hazırlanan məmulatların ixracı 7,8 milyon, pambıq ipliyi ixracı 3,2 milyon,  spirtli və spirtsiz içkilərin ixracı 1 milyon, şəkər ixracı 1,5 milyon, bitki və heyvan mənşəli piylər və yağlar  ixracı  1,7 milyon, çay ixracı 760 min dollar təşkil edib.

Ötən ilin yanvarında qeyri-neft ixracın 16,3 milyon dollarla birinci yer tutan qızılın ixracı bu ilin eyni dövründə cəmi 9,7 milyon dollar təşkil etməklə 40,5 faiz azalıb. Ötən il 13,2 milyon dollarla ikinci yeri pomidor tutmuşdu. Bu il isə Rusiyanın qadağası üzündən ixrac iki dəfə azalaraq cəmi 6,8 milyon dollar təşkil edib.
2021-ci ilin yanvarında qeyri-dövlət ixracatçı subyektlərin reytinqində ilk onluqda “MKT İstehsalat Kommersiya” MMC, “Almeyvə” MMC, “Baku Steel Company”, “Critical Fruit” MMC, “Aqrovest” MMC, “Sun Food” MMC, “Land Lojistic” MMC, “P-Aqro” MMC, “Metal Trader LTD” MMC  və “Ram Beynəlxalq Nəqliyyat və Ticarət LTD” MMC təmsil olunurlar.
Qeyri-neft sektoru üzrə ixrac əməliyyatlarında iştirak edən dövlətə məxsus şirkətlərin siyahısına isə “SOCAR Polymer” MMC və Azərbaycan Respublikası Dövlət Neft Şirkətinin “Marketinq və İqtisadi Əməliyyatlar İdarəsi” başçılıq edir. Daha sonra bu siyahıda “Azəralüminium” MMC, “Azergold” QSC, “Azərpambıq Aqrar Sənaye Kompleksi” MMC, “Azərenerji” ATSC, “Azəripək” MMC, “Azərbaycan Dəmir Yolları” QSC, “Azərtütün Aqrar Sənaye Kompleksi” MMC və “Azərbaycan Hava Yolları” QSC təmsil olunur.
“İxrac İcmalı”na görə, cari ilin yanvar ayında “Azərkosmos” ASC tərəfindən dünyanın 21 ölkəsinə 1,98 milyon dollar dəyərində xidmət (peyk telekommunikasiya xidmətləri və optik peyk xidmətləri) ixrac edilib. “Azərkosmos” ASC-nin xidmət ixracından əldə etdiyi gəlir onun ümumi gəlirlərinin 84 faizini təşkil edib.  “Azərkosmos” ASC-nin 2021-ci ilin yanvar ayında xidmət ixracı həyata keçirdiyi əsas ölkələr Birləşmiş Krallıq, Fransa, ABŞ, BƏƏ, Pakistan və Türkiyədir.
Koronavirus (COVİD-19) pandemiyasının yaratdığı böhran nəticəsində turizm sektorunda müşahidə olunan tənəzzül cari ilin ilk ayında da davam edib. 2021-ci ilin yanvar ayında dünyanın 105 ölkəsindən Azərbaycana 36,1 min və ya əvvəlki ilin müvafiq dövrü ilə müqayisədə 6,3 dəfə az əcnəbi və vətəndaşlığı olmayan şəxs gəlib və baş tutan səfərlər əsas etibarilə qeyri-turizm məqsədilə həyata keçirilib.
2021-ci ilin yanvar ayında xarici vətəndaşların bank kartları vasitəsilə ölkəmizdə apardıqları əməliyyatların həcmi 25  milyon manat təşkil edib.
İqtisadiyyat şöbəsi,