Standartlaşdırma, Metrologiya və Patent üzrə Dövlət Komitəsinin mətbuat xidmətinin rəhbəri Fazil Talıblı bunun inandırıcı olmadığını deyib:

“Həmin kolbasa Rusiya istehsalıdır. Azərbaycan məhsulu olsaydı üzərində “AZS” yazılardı. Fotonun doğurdanmı Azərbaycanda çəkilib-çəkilmədiyini isə mən deyə bilmərəm”.

F.Talıblı bildirib ki, bununla bağlı komitəyə rəsmi müraciət daxil olmayıb:

“Azərbaycanın mövcud standartında kolbasanın tərkibinə kenquru ətinin qatılması nəzərdə tutulmayıb. Amma hansısa sahibkar kenquru ətindən kolbasa buraxmaq istəsəydi, qanunvericiliyə uyğun olaraq resepturası hazırlanmalıdır. Səhiyyə Nazirliyi icazə verərsə, sahibkar onun istehsalına başlaya bilər. Amma Azərbaycanda kenquru ətindən kolbasa və sosiska istehsalı yoxdur. Bu, ümumiyyətlə, azərbaycanlıların damaq dadına ziddir”.

Komitə rəsmisi “Tərkibində kenquru əti olan məhsulun ölkəmizə idxalı mümkündürmü” sualına cavab olaraq deyib ki, burada qəbahətli heç nə yoxdur:

“Rusiya ilə Azərbaycanın birgə qoşulduğu sazişlər mövcuddur. Bu ölkənin istehsal etdiyi məhsulların ölkəmizə idxalı və onun tanınma prosedurundan keçərək qanuna uyğun şəkildə satışı mümkündür. Burada qəbahətli nə isə yoxdur. Əsas tələb məhsulun tərkibi ilə üstündə göstərilən xammalın eynilik təşkil etməsidir. Yəni istehlakçı aldadılmasın. Əgər bu məhsul ölkəmizdə satılırsa belə, onun da öz alıcısı var. Amma mən şəxsən həmin fotonun Azərbaycanda çəkildiyinə şübhə edirəm”.