"Qələbədən sonra sizi Rustavidə gözləyirəm. Həbsxana qapımı Batumililərin də açmağını istəyirəm. Heç kim evdə qalmamalıdır, hər kəs seçkilərə".
Sozcu.info xəbər verir ki, üçüncü prezident Mixail Saakaşvili həbsxanadan Batumidə keçirilən mitinqə toplaşan vətəndaşlara bu sözlərlə müraciət edib.
Saakaşvili vətəndaşları oktyabrın 30-da keçiriləcək özünüidarə seçkilərinin ikinci turunda iştirak etməyə çağırıb.
“Əziz, doğma, sevimli Batumi xalqım, toplaşdığınıza və məni dəstəklədiyinizə görə sizə təşəkkür edirəm. Çox sağ olun ki, oktyabrın 14-də bir çoxunuz Tbilisidə idiniz. Möhkəm dayanıram. Sizinlə birbaşa əlaqəni gözləyirəm. Hakimiyyət məni məhkəməyə belə aparmağa cəsarət etmədi və mənə telefonla danışmağı qadağan etdi, amma dəqiq bilirəm ki, onlar artıq məğlub olublar və biz artıq qalibik.
Əminəm ki, Batumidə "Oçneba"nın göy rəngli bayrağı əvəzinə ağ rəngli, beş xaçlı bayraqlar dalğalanacaq və Qiorqi Kirtadze Batumi tarixində ən yaxşı mer olacaq.  Mişa Bolkvadze Xelvaçaurinin ən yaxşı meri olacaq. Qalibiyyətdən sonra sizi Rustavidə gözləyirəm. Həbsxana qapımı Batumililərin də açmağını istəyirəm. Heç kim evdə qalmamalıdır, hər kəs seçkiyə! Bir saniyə belə dayanmamalıyıq, hər tərəfə hücum etməliyik, onlardan özümüzü müdafiə etməməliyik, onlar özünümüdafiə rejimindədirlər və elə də qalmalıdırlar. Yaşasın Batumi, yaşasın Acarıstan, yaşasın Gürcüstan", - Mixail Saakaşvilinin məktubunda deyilir.