“Mən bilirəm ki, Eldəniz Səlimov mənə heç nə edə bilməz. Amma digər rəsmi qurumlar haqqımda axtarıb nəsə tapa bilər. Barışdırardın, çıxıb gedərdi da. Xəsarət yetirib, eliyib da. İndi gündə bir adla bizi deputat səlahiyyətindən məhrum eləsinlər?! Onda camaat da düz deyir ki, parlamenti buraxaq”.
Bu sözləri Tahir Kərimli dünən parlamentin iclasında dedi. Polis zabitini döyən həmkarı Eldəniz Səlimovun qanunsuz hərəkətini ört-basdır edilməsi təşəbbüsünü irəli sürdü. Millət vəkili Tahir Kərimli. Vaxtilə Azərbaycanın Ali Məhkəməsinin sədri olan bir şəxs. “Fəxr elə ki, səni deputat döyür”, - deyən Səlimovla eyni təfəkkürdə olduğunu açıq şəkildə parlament tribunasından elan etdi. 
“Xəsarət yetirib, eliyib da”... Bu bir deputat sözüdürmü? Söhbət təkcə polisin döyülməsindən getmir. Qanun heç bir kəsə qarşı zorakılıq etməyə imkan vermir. Amma təsəvvür edin, döyülən sadə bir vətəndaş idi. O zaman, görəsən, Tahir Kərimli həmin cümləni necə qurardı?! 
Dünən qarşıma Kərimlinin 1993-cü ildə parlamentə etdiyi çıxışın videosu çıxdı. O nə emosiya, o nə artisizm idi. Heç Hollivud aktyorlarında bu qədər rola girmək qabiliyyəti görə bilməzsiniz. Həmin kadrlarda o zaman prezident olan Əbülfəz Elçibəy də görünür. Tahirin çıxışı zamanı başını əlləri ilə tutub. Buna əli üzündə qalıb da demək olar...
Tahir Kərimli deyir ki, deputatın yiyəsi yoxdur. Yiyəsi olmayan şəxsin parlamentə düşmək məsələsi tamam başqa mövzunun söhbətidir. İndi aktual olan sual budur ki, o niyə yiyəsiz qalıb?! Yiyəsi ondan imtina edibmi və özünə başqa yiyə axtarırmı?! Bunlar təbii ki, ritorik suallardır və onun bu barədə açıq danışacağını gözləmirəm. 
Dəqiq bəlli olan odur ki, spikerin dediyi kimi deputatın əsl yiyəsi olan xalq – seçicilər Tahir Kərimlidən imtina edəcəklər. Onlar öz deputatlarına görə utanmaq istəmirlər. Heç bir seçici öz danışığını bilməyən, qanunlara göz basan, cinayət törədən şəxsin cinayətini görməzdən gəlməyə çalışan bir adamın onları təmsil etməsini istəməz. Öz ifadəsi ilə desək, Tahir Kərimli özü öz qələmini qırdı.
Bu arada bir məsələni də xatırlatmaq istəyirəm. E. Səlimovla bağlı məsələ ictimailəşən gün onun “boz kardinal” Ramiz Mehdiyevin adamı olması haqda xəbərlər yayıldı. 3-4 gün bu informasiya mediada, sosial şəbəkələrdə tirajlandı. Nəhayət, dünən Səlimovla bağlı həbs qərarı veriləndən sonra Ramiz Mehdiyev bu haqda açıqlama yaydı. Bildirdi ki, həmin deputatın onunla heç bir bağlılığı yoxdur. Dedi ki, bəzi maraqlı dairələr gündəmi dəyişmək, sensasiya yaratmaq və diqqəti ölkənin taleyüklü məsələlərindən yayındırmaq üçün cəmiyyətdə baş verən bütün xoşagəlməz hadisələri hər vəchlə onun ayağına yazmağa, onunla bağlamağa cəhd göstərirlər.
Tahir Kərimli özünü ifşa etməyə bir az tələsdi. Bir neçə saat səbr etsə idi, yiyəsiz qalmazdı...