“Azərbaycan, Türkiyə və Gürcüstan çox sıx şəkildə əməkdaşlıq edirlər. Bu əməkdaşlıq get-gedə dərinləşir. Bu hər üç dövlətin milli maraqların uyğundur”. Bu sözləri Sozcu.info -ya açıqlamasında hərbi ekspert Emin Həsənli deyib.
Onun sözlərinə görə, bu üç dövlət birlikdə böyük layihələr həyata keçirib: “Ona görə də bu dövlətlər hər üç ölkənin və birgə layihələrin təhlükəsizliyinin qorunması baxımından birgə əməkdaşlıq edirlər. Gələcəkdə birgə təlimlərin keçirilməsi, birgə hərbi əməkdaşlığın daha da genişlənməsi nəzərdə tutulur. Azərbaycanla Türkiyənin əməkdaşlıq münasibətləri yüksəkdir. Eyni zamanda Azərbaycanla Gürcüstanın əməkdaşlığı çox yaxşıdır. Biz qonşu dövlətlər kimi çox yaxşı əməkdaşlıq münasibətləri qurmuşuq. Bu üç dövlət bir-biri ilə sərhəd dövlətlərdir. Bununla yanaşı Azərbaycan və Türkiyə regiondakı dövlətlərlə əməkdaşlığı dərinləşdirməkdə regionda sülhün və təhlükəsizliyin qorunmasına öz töhfələrini verməkdə maraqlıdır.
Məlumdur ki, dünyada yeni çağırışlar, yeni ittifaqlar yaranmaqdadır. Ona görə də, bu üç dövlətin əsas məqsədi regionda sülhün və təhlükəsizliyin qorunmasıdır. Xüsusən də dünyada terrorizm baş alıb gedir. Müharibə ocaqları çoxdur və tez-tez dövlətlərarası münaqişələr yaranır. Bu münaqişələrin, müharibələrin, təhdidlərin qarşısını almaq birgə əməkdaşlıqdan keçir. Hərbidə əldə edilən yeniliklər dost ölkələr arasında mübadilə olunur və bu çox vacibdir”.