“Biz yaxşı bilirik ki, cənab Prezident (Makron) Rusiyaya ilk növbədə Avropa və qlobal təhlükəsizliyin təmin edilməsi ilə bağlı aktual məsələləri müzakirə etmək üçün gəlib”.
 
Sozcu.info xəbər verir ki, Rusiya prezidenti Vladimir Putin ötən gün fransalı həmkarı Emmanuel Makron ilə Moskvada baş tutan və beş saatdan çox davam edən görüşdən sonra keçirilən mətbuat konfransında belə deyib.
 
O, görüşü “mənalı və faydalı” adlandırıb və danışıqlar zamanı Rusiyanın ABŞ-dan və NATO-dan tələb etdiyi təhlükəsizlik təminatları məsələlərinin də müzakirə olunduğunu bildirib.
 
Putinin sözlərinə görə, dünənki görüşün əsas mövzusu, təbii ki, Ukrayna məsələsi olub. O, Makrona Kiyevin Minsk razılaşmalarına əməl etməkdən imtina yolunu tutduğunu bildirdiyini deyib: “Əlbəttə, mən öz tərəfimdən Prezidentin diqqətini hazırkı Kiyev hakimiyyətinin zirvə görüşlərində əldə olunanlar da daxil olmaqla, Normandiya formatında Minsk tədbirlər paketi və sazişləri çərçivəsində öhdəliklərə əməl etmək istəməməsinə cəlb etdim”.
 
Rusiya Prezidenti bildirib ki, Kiyev Minsk razılaşmalarının ləğvinə yönəlik addımlar atmağa çalışır: “Konstitusiya islahatları, amnistiya, yerli seçkilər, Donbasısn xüsusi statusunun hüquqi aspektləri kimi fundamental məsələlərdə irəliləyiş yoxdur. İndiyə qədər, ən azı mütəxəssislər arasında məşhur olan Ştaynmayer düsturu Ukrayna qanunvericiliyində təsbit edilməmiş qalır”.
 
Bununla yanaşı, Putin Minsk razılaşmalarına alternativin olmadığını da vurğulayıb: “Bir daha təkrar edirəm, Kiyevdə deyirlər ki, ya əməl edəcəklər, ya da deyirlər ki, bu, onların ölkəsini məhv edəcək. Hazırkı prezident bu yaxınlarda bəyan etdi ki, bu, Minsk razılaşmalarındakı bir sıra məqamı bəyənmir. Yaxşı, bəyən - bəyənmə, səbr et, gözəlim. Onu yerinə yetirmək lazımdır, başqa cür alınmayacaq”.
 
Putin onu da bildirib ki, Ukraynanın sabiq prezidenti Pyotr Poroşenko hələ hakimiyyətdə olarkən Rusiya ona hər hansı çətinliklə üzləşsə, siyasi sığınacaq təklif edib və indi də buna hazırdır. “Bu gün Donbassda nizamlanma məsələsində ciddi fikir ayrılıqlarımıza baxmayaraq, mən öz təklifimi indi də təsdiq etmək istəyirəm və düşünürəm ki, (Poroşenko) bu istiqamətdə çoxlu səhvlərə yol verib, amma yenə də onun dövlət cinayətkarı kimi təqib olunması, fikrimcə, həm də bugünkü rəhbərliyin öz uğuru üçün vəziyyəti həddindən artıq şişirtməsidir. Biz Rusiyada cənab Poroşenko kimi insanlara sığınacaq verməyə hazırıq”, - deyə Putin bildirib.
 
NATO strategiyasından danışan Putin xatırladıb ki, Rusiya bu strategiyada düşmən kimi göstərilib: “Moskvanı hələ də NATO-nun sırf müdafiə ittifaqı olması arqumenti ilə sakitləşdirməyə çalışırlar, lakin bir çox ölkələrin vətəndaşları bunun nə qədər doğru olduğunu öz təcrübələrindən görüblər”, - deyə Putin İraq, Liviya və Əfqanıstanı misal göstərib.
 
Prezident həmçinin bildirib ki, Rusiya üçün təhlükəsizlik zəmanətləri ilə bağlı ABŞ və NATO ilə dialoq bitməyib. Onun sözlərinə görə, NATO-nun yayılmaması, Rusiya sərhədləri yaxınlığında zərbə sistemlərinin yerləşdirilməməsi, NATO infrastrukturunun 1997-ci ilə qədər qaytarılması kimi bütün əsas məsələlər üzrə dövlətlərin cavabında heç bir konkretlik yoxdur. Onlar bu nöqtələrdən "sadəcə yan keçiblər."
 
Rusiya lideri həmçinin xatırladıb ki, NATO üzvləri Ukraynaya silah tədarükünü davam etdirirlər: “NATO-ya üzv ölkələrin özlərinin müşayiəti ilə onlar Ukraynanı müasir silah növləri ilə doldurmağa davam edir, Ukrayna ordusunun modernləşdirilməsi üçün əhəmiyyətli miqdarda maliyyə vəsaiti ayırırlar. Hərbi mütəxəssislər və təlimatçılar göndərirlər”, - deyə o, Makronla bu məsələni də müzakirə etdiklərini vurğulayıb.
 
NATO-nun Şərqdə yeni üzvlər vasitəsilə genişlənməsinin qəti əleyhinə olduğularını bildirən Rusiya prezidenti narahatlıqlarını belə ifadə edib:
 
“NATO-nun sərhədlərimizə daha da yayılması bizim üçün ümumi təhlükə yaradır. Biz NATO-ya tərəf yox, NATO bizə doğru irəliləyir. Ona görə də Rusiyanın aqressiv olduğunu söyləmək ən azı sağlam məntiqə uyğun gəlmir”, - deyən Putin xəbərdarlıq edib ki, Ukraynanın NATO-ya qəbulu Şimali Atlantika Alyansı ilə Rusiya arasında müharibə təhlükəsi ilə nəticələnəcək və bu, Kiyevin Krımı hərbi yolla geri almaq cəhdlərinə imkan verməyəcək.
 
“Ukraynanın (NATO-ya) mümkün qəbulu niyə bu qədər təhlükəlidir? Bir problem var: Avropa ölkələri, o cümlədən Fransa hesab edir ki, Krım, məsələn, Ukraynadır, biz isə onun Rusiya Federasiyasının bir hissəsi olduğuna inanırıq. Və bu vəziyyəti hərbi yolla dəyişməyə cəhdlər edilərsə və Ukraynanın doktrina sənədlərində qeyd edilir ki, a) Rusiya düşməndir, b) Krımı hərbi yolla qaytarmaq olar. Təsəvvür edin ki, Ukrayna NATO-nun üzvüdür və beşinci maddə ləğv edilməyib, əksinə, cənab Bayden bu yaxınlarda beşinci maddənin mütləq imperativ olduğunu və yerinə yetiriləcəyini bildirib. Deməli, Rusiya ilə NATO arasında hərbi qarşıdurma olacaq... biz NATO ilə döyüşəcəyik?”.
 
Dövlət başçısı xəbərdarlıq edib ki, Avropa ölkələri belə vəziyyətdə avtomatik olaraq qaliblərin olmayacağı müharibəyə cəlb olunacaq.
 
Putin istisna etmir ki, NATO və Rusiyanın potensialları müqayisəedilməzdir: “Biz bunu başa düşürük. Amma biz onu da başa düşürük ki, Rusiya aparıcı nüvə dövlətlərindən biridir. Bəzi komponentlərə görə, müasirliyə görə biz hətta çoxlarını qabaqlayırıq. Bu döyüşüm qalibləri olmayacaq. Və siz öz iradənizin əksinə olaraq özünüzü bu münaqişəyə cəlb edəcəksiniz. Roma müqaviləsinin beşinci bəndini yerinə yetirmədiyiniz üçün gözünüzü qırpmağa belə vaxtınız olmayacaq. Cənab prezident təbii ki, bu inkişafı istəmir. Mən də istəmirəm. Ona görə də Makron buradadır və ardıcıl olaraq altı saat mənə suallar, zəmanətlər və həll yolları ilə əlaqədar əzab verir”, - Putin bildirib.
 
Putin əlavə edib ki, bunu nəcib missiya hesab edir və belə bir səy göstərdiyi üçün Makrona minnətdardır.
 
“Biz öz tərəfimizdən hamıya uyğun olan bu kompromisləri tapmaq üçün hər şeyi edəcəyik”, - deyəb Putin Fransa prezidenti Emmanuel Makrona Rusiya ilə NATO arasında münasibətlərin nizamlanması, təhlükəsizliyin təmin edilməsi və sabitlik mühitinin yaradılması və Ukraynanın cənub-şərqində vəziyyətin nizamlanması istiqamətində göstərdiyi səylərə görə təşəkkür edib.
 
“Biz artıq Parisdə toplaşmışıq və indi bilirəm ki, hər bir dövlət başçısının, xüsusən də Avropanın böyük dövlətinin yaşadığı problemlərə baxmayaraq, cənab prezident hələ də necə davranmalı olduğumuz barədə fikir mübadiləsini daha da irəli daşımaq üçün Rusiyaya gəlməyi zəruri hesab edir”, - deyə Putin bildirib.

O qeyd edib ki, Makronun bir sıra ideyaları Ukraynada gələcək addımlar üçün əsas ola bilər: "Gözləyək, görək cənab prezidentin Kiyevdəki görüşü necə keçəcək? Biz razılaşdıq ki, onun Ukraynanın paytaxtına səfərindən sonra yenə də bir-birimizə zəng edib bu məsələ ilə bağlı fikir mübadiləsi aparaq", - deyə Putin fikrini yekunlaşdırıb.