Biləcəri qəsəbəsinin Yəhya Hüseynov küçəsinin sakinləri, hazırda onların yaşadığı, 1982-ci ildə dəmiryolçular üçün inşa edilmiş binalarda istilik sisteminin olmamağından şikayət edirlər.
Bu barədə Sozcu.info-a məlumat verən həmin binalardan birinin sakini Gülnarə Rəsulova bildirib ki, pandemiyadan əvvəl binalarda mövcud olan köhnə istilik sistemi sökülüb. Onun sözlərinə görə, binada yeni istilik sisteminin təchiz ediləcəyi barədə vəd verilsə də, bu vəd yerinə yetirilməyib:
“Həmin ərazidə 5 binayıq ki, bu binalarda hələ də istilik sistemi yoxdur. Hardasa pandemiyadan əvvəl gəlib köhnə, sovet dövründən qalan istilik sistemini söküb-dağıtdılar, yollarımızı pis günə qoydular ki, biz burada istilik sistemini bərpa edəcəyik. Camaatdan pul yığıldı. Biz hətta lazım olan digər vasitələri özümüz alıb gətirdik, quraşdırdıq. Bizə deyilənə görə, keçən qış artıq binalar istilik sistemi ilə təchiz olunmalı idi. Lakin necə dağıdıblarsa, indiyə kimi elə də qalıb. Əgər noyabr ayında binalara istilik veriləcəksə, bunun üçün hazırda işlər getməlidi. Lakin heç bir iş getmir və biz illərdir istiliyə həsrət qalmışıq. Bizə deyilir ki, işlərin tamamlanması üçün büdcədə pul yoxdur”.
Məsələ barədə Binəqədi Rayon İcra Hakimiyyətindən məlumat almağa çalışsaq da, qurumun rəsmi saytına yerləşdirilən heç bir əlaqə vasitəsinə cavab verilmədi.