Oktyabrın 29-da Dənizkənarı Milli Parkda Zəfər yarmarkası təşkil olundu. Hər gün minlərlə insan yarmarkaya axın etdi. Təşkilatçılar özəl yanaşma ilə vətəndaşların marağını cəlb etməyi bacardılar. “Qəhrəmanların izi ilə” mövzusunda reallaşan yarmarkada 44 günlük Vətən müharibəsində istifadə olunan texnika və avadanlıqlar nümayiş etdirildi. Ziyarətçilər hərbi maşınlara daxil ola, məşhur “İtiqovan” pilotsuz uçuş aparatını yaxından görə bildilər, hərbçilərin izahı ilə müxtəlif silahlar və texnika barədə məlumatlanmaq imkanı qazandılar.

Yarmarkanın satış hissəsində müxtəlif şirkətlər məhsullarını satışa çıxardılar-qida məhsulları, kitablar, suvenirlər və s. Bayram ab-havasını tamamlayan isə hər axşam təşkil olunan hərbi vətənpərvərlik ruhunda konsert proqramları idi.

Xüsusilə, 8 Noyabr-Zəfər günü ilə əlaqədar yarmarkada bir sıra tədbirlər təşkil olundu. Azərbaycan Prezidenti, Silahlı Qüvvələrin Ali Baş Komandanı İlham Əliyevin Şuşada hərbçilər qarşısında çıxışı yayımlandı. Eyni zamanda, Türkiyədə "YAŞAT" Fondu tərəfindən müalicəsi davam etdirilən qazilərimizlə canlı bağlantı təşkil edildi. Gün tanınmış estrada ulduzlarının iştirakı ilə konsert proqramı ilə yekunlaşdı. Yarmarka noyabrın 9-a qədər davam etdi. Toplanan vəsait "YAŞAT" Fonduna ianə edildi.
 


Mədəniyyət Nazirliyinin Media və kommunikasiya şöbəsinin müdiri Məryəm Qafarzadə Sozcu.info-a yarmarka barədə təəssüratlarını bölüşüb: “Zənnimcə, şanlı qələbəmizin ildönümünün əsas rəmzlərindən biri də Zəfər yarmarkası oldu. Biz də yarmarkanı ziyarət etdik, qazi qardaşlarımızla görüşdük, satışa çıxarılan məhsullarla tanış olduq. Xalqımız yenə dəmir yumruq kimi həmrəy olub, layihəyə öz töhfələrini verməyə çalışırdılar. Yarmarkadan əldə olunan gəlirin şəhid və qazi ailələrinin müraciətlərinin təmin olunmasına xərclənməsi də alqışa layiq addımdır. Yarmarka boyu hər axşam təşkil olunan konsert proqramları isə paytaxtımıza xüsusi bayram əhvalı bəxş etdi. Zəfər günü həm Vətən sevgisini, həm sonsuz qürur, həm də şəhidlərimizə, qazilərimizə sevginin sayğının təntənəsidir. Mənim üçün Zəfər yarmarkası sadaladıqlarımızın təzahürü idi. Arzu edirəm, qələbəmiz əbədi və sarsılmaz olsun ki, Zəfər yarmarkasını hər il eyni  həvəslə işğaldan azad edilmiş torpaqlarımızda da qeyd edək”.


Teleaparıcı Nigar Sabirqızı Zəfər yarmarkasında iki dəfə iştirak edib: “Çox maraqlı idi. Ən çox xoşuma gələn insanların səmimiyyəti idi. Bilinirdi ki, onları ora heç kim zorla gətirməyib. Ziyarətçilərin məqsədi əylənmək deyildi. Müşahidələrim göstərir ki, vətəndaşlar sanki şəhid ailələri və qazilərə yardım etməyi borc bildikləri üçün yarmarkaya gəlmişdilər. Bilirik ki, yarmarkadan toplanan vəsait “YAŞAT” Fonduna ianə ediləcək. İnsanlar da bu yardımda sevə-sevə iştirak edirdilər. Hərbi geyimlər, sursatlar,texnikalar bizim qələbəmizin simvolu idi. Çox gözəl suvenirlər satılırdı. İnsanların marağı böyük idi. Eyni zamanda “YAŞAT” fondunun və ASAN könüllülərinin gördüyü işi vurğulamaq istəyirəm. “YAŞAT” düşərgəsində də iştirak etmişdim. Ümumiyyətlə, fondun fəaliyyətini yüksək dəyərləndirirəm. Çox nəcib işə imza atıblar. Bütün diqqət və qayğı şəhid ailələrinə, eləcə də qazilərimizə yönəldilir.İnsanların əylənməsi üçün də şərait yaradılmışdı, konsert proqramları təşkil olunmuşdu. Hər şey çox gözəl təşkil olunmuşdu. Üzərində şəhidlərimizin adları qeyd olunan metal “asılqan”lar olan Zəfər ağacını da qeyd etmək istərdim. Bu ağacı görəndə çox duyğulandım”.


"ASAN" Xidmətin mətbuat katibi Elnur Niftəliyev "Yeni Müsavat" a 12 gün ərzində yarmarkadan toplanan vəsaiti açıqladı:

"12 gün ərzində yarmarkada 64 min 558 manat 58 qəpik vəsait toplanıb və Azərbaycan Respublikasının ərazi bütövlüyünün müdafiəsi ilə əlaqədar yaralananlara və şəhid ailələrinə dəstək məqsədi ilə “YAŞAT” Fonduna ianə edilib".

Yarmarkanın dəstəkçiləri Bakı Şəhər Mədəniyyət Baş İdarəsi, Bakı Şəhər Halqası Əməliyyat Şirkəti (Formula1 Azərbaycan), "ABAD" publik hüquqi şəxsi, Azərbaycan Dövlət Reklam Agentliyi, "Azərişıq" ASC, 156 -Evakuasiya Xidməti, "NIGROUP" MMC, Bakı Strafor Kəsim Mərkəzi, "ASAN Könüllüləri" Təşkilatı idi.

Qeyd edək ki, yarmarka “YAŞAT” Fondu, Azərbaycan Respublikasının Müdafiə Nazirliyi, Bakı Şəhər İcra Hakimiyyəti, Dənizkənarı Bulvar İdarəsi və Azərbaycan Peyntbol Federasiyasının təşkilatçılığı, Bakı Şəhər Mədəniyyət Baş İdarəsi, Bakı Şəhər Halqası Əməliyyat Şirkəti (Formula1 Azərbaycan), "ABAD" Publik Hüquqi Şəxs, Azərbaycan Dövlət Reklam Agentliyi, "Azərişıq" ASC, "ASAN Könüllüləri" və digər qurumlar, eləcə də özəl şirkətlərin dəstəyi ilə təşkil olunmuşdu.