Yanvarın 31-də “2 fevral – Gənclər Günü” ilə bağlı Suraxanı Gənclər Evində rayon gəncləri ilə görüş keçirilmişdir. 

Sozcu.info xəbər verir ki, tədbirdə Suraxanı Rayon İcra Hakimiyyətinin başçısı Əziz Əzizov, müavinləri Könül xanım Axundova, Fuad Cəbrayılov iştirak etmişlər.
  
Suraxanı Gənclər Evinin direktoru Natavan Rüstəmova giriş sözü ilə çıxış edərək qonaqları salamlamış və gəncləri “2 fevral – Gənclər Günü” münasibəti ilə təbrik etmişdir.

Daha sonra RİH başçısı Əziz Əzizov çıxış edərək bildirmişdir ki, ölkəmizdə həyata keçirilən gənclər siyasətinin nəticəsidir ki, bu gün dövlətçiliyə bağlı, intelektual, yüksək dünyagörüşlü gənclərimiz formalaşmışdır. Həmçinin Ali Baş Komandan cənab İlham Əliyevin rəhbərliyi ilə 44 günlük Vətən müharibəsində tarixi qələbənin qazanılmasında gənclərin rolundan və göstərdikləri şücaətdən bəhs edən RİH başçısı gənclərin dövlət və milli maraqlar ətrafında daha sıx birliyinin təmin olunmasında milli-mənəvi dəyərlərin təbliğinin, gənclərin vətənpərvər ruhda yetişməsi istiqamətində dövlətin həyata keçirdiyi layihələrin yüksək əhəmiyyət kəsb etdiyini qeyd etmişdir.

Görüşə qonaq qismində qatılmış aktyor, ssenarist, aparıcı Fərda Xudaverdiyev rayon gənclərinin suallarını cavablandırmış və onlarla bir sıra aktual mövzularda diskussiya aparmışdır.
Sozcu.info