Rusiya TIR-ları Azərbaycana niyə buraxmır? - 3000 YÜK MAŞINI SƏRHƏDDƏ QALDI

Rusiyadan Azərbaycana gedən yük maşınları 20 gündür ki, bu ölkənin gömrük xidməti tərəfindən buraxılmır.
Sozcu.info xəbər verir ki, yük maşınları bu ölkənin gömrük xidməti tərəfindən Dağıstan ərazisində saxlanılıb. Məlumata görə, təxminən 3000-ə yaxın yük maşını içi dolu yüklə gömrükdə qalıb. Sürücülər deyirlər ki, dünən körpüdən cəmi 45 maşın buraxılıb. Buraxılan maşınlardan 40-ı Dağıstan maşınları, 5-i Azərbyacana məxsus maşınlardır. Qeyd edilir ki, Azərbaycana məxsus buraxılan maşınlar da boş maşınlar olub. Hazırda yüklə dolu olan yük maşınları Rusiya tərəfində qalıb.
Qeyd edək ki, günə 200-300 maşın keçməli olduğu halda, sayı 40-a endiriblər.
Məsələylə bağlı Gömrük Komitəsinin Mətbuat və İctimaiyyətlə Əlaqələr İdarəsinin rəisi Natiq Axundov münasibət bildirib. O Rusiya ilə sərhəddə sıxlığın yaranma səbəbini Rusiya tərəfində yerləşən gömrük-keçid məntəqəsində tikinti-quraşdırma işlərinin aparılması ilə əlaqədar olduğunu qeyd edib:
"Son günlər ölkəmizin Rusiya Federasiyası ilə sərhəddə yerləşən Şimal Ərazi Baş Gömrük İdarəsinin "Samur" gömrük postundan keçən yük nəqliyyat vasitələrinin nisbi sıxlığı müşahidə olunur. Buna səbəb isə Rusiya tərəfində yerləşən gömrük-keçid məntəqəsində tikinti-quraşdırma işlərinin aparılmasıdır. Məhz buna görə də "Samur" gömrük postunun ixrac nəzarət xətti vasitəsilə gündəlik yük nəqliyyat vasitəsinin say etibarı ilə keçidi 150-200-ə qədər enmişdir. Xatırladaq ki, "Samur" gömrük postu vasitəsilə gündəlik həm ixrac, həm də idxal nəzarət xəttləri üzrə 500, yəni ümumilikdə 1000 yük nəqliyyat vasitəsinin keçidini təmin etmək mümkündür. Lakin Rusiya tərəfində yerləşən gömrük-keçid məntəqəsinin infrastrukturu və aparılan təmir-tikinti işləri yük nəqliyyat vasitələrinin keçidini artırmağa imkan vermir. Sərhədkeçmə proseslərinin intensivliyinin artırılması məqsədilə ölkəmizin gömrük orqanları qarşı tərəfdəki həmkarları ilə mütəmadi olaraq müzakirələr aparır və sıxlığın aradan qaldırılması ilə bağlı müvafiq tədbirlər görülür".
Natiq Axundov əlavə edib ki, yük nəqliyyat vasitələrinin sıxlığının aradan qaldırılması istiqamətində qarşı tərəflə mütəmadi məsləhətləşmələr və müzakirələr aparılır:
"Onu da qeyd edək ki, Prezident İlham Əliyevin "Xanoba" gömrük postunda tikinti işləri ilə bağlı tədbirlər haqqında" Sərəncamına uyğun olaraq Dövlət Gömrük Komitəsi bu istiqamətdə də müvafiq işləri sürətlə davam etdirir. Tikinti işləri başa çatdıqdan sonra isə şimal istiqamətində yerləşən gömrük postlarındakı sıxlıqlar aradan qaldırılacaq. Hazırda "Samur" gömrük postu gücləndirilmiş iş rejimində fəaliyyət göstərir və bir daha qeyd edirik ki, yük nəqliyyat vasitələrinin sıxlığının aradan qaldırılması istiqamətində qarşı tərəflə mütəmadi məsləhətləşmələr və müzakirələr aparılır".


Oxşar Xəbərlər

Xəbər lenti


{sape_links}{sape_article}