Oktyabrın 14-də Beyləqan rayonunda Ümumdünya Statistika Günü münasibətilə tədbir keçirilib. Tədbirdə Beyləqan Rayon İcra Hakimiyyətinin başçısı Əziz Əzizov, RİH başçısının müavinləri və aparatın əməkdaşları, rayon Statistika İdarəsinin rəhbərliyi və kollektivi, idarə və müəssisə əməkdaşları iştirak ediblər.

Sozcu.info xəbər verir ki, əvvəlcə Ümummilli Lider Heydər Əliyevin abidəsi önünə gül dəstələri düzülüb, xatirəsi ehtiramla yad edilib.

Gənclər Evində davam edən tədbiri Beyləqan Rayon İcra Hakimiyyətinin başçısı Əziz Əzizov giriş nitqi ilə açaraq Ümumdünya Statistika Gününün əhəmiyyətindən danışıb. Rayon rəhbəri bildirib ki, 20 oktyabr-Ümumdünya Statistika Günü dövlət idarəçiliyinin və sosial-iqtisadi inkişafın əsas dayaqlarından biri olan statistika sahəsinə verilən yüksək qiymətin təcəssümüdür. O vurğulayıb ki, Azərbaycanda müasir statistika sisteminin formalaşması Ulu Öndər Heydər Əliyevin adı ilə bağlıdır. Məhz onun rəhbərliyi ilə qəbul edilmiş “Statistika haqqında” qanun bu sahənin hüquqi bazasını möhkəmləndirib, idarəetmənin beynəlxalq standartlara uyğunlaşdırılmasına imkan yaradıb. Bildirilib ki, Prezident İlham Əliyevin rəhbərliyi ilə bu gün statistika fəaliyyəti rəqəmsal texnologiyaların tətbiqi, şəffaflıq və operativlik prinsipləri əsasında inkişaf edir və ölkənin davamlı sosial-iqtisadi tərəqqisinə mühüm töhfə verir.

Beyləqan Rayon Statistika İdarəsinin rəisi Rövşən Quliyev çıxış edərək idarənin fəaliyyəti, əldə olunan nəticələr və qarşıda duran vəzifələr barədə məlumat verib. O, qeyd edib ki, rayon üzrə sosial-iqtisadi göstəricilərin dəqiq toplanması və təhlili regionun davamlı inkişafına əhəmiyyətli rol oynayır.

Mil-Muğan Regional Mədəniyyət İdarəsinin Beyləqan rayon nümayəndəsi Məhəmməd Qələndərov da çıxışında statistik xidmətin ictimai həyatda, mədəni və iqtisadi proseslərin idarə olunmasında artan əhəmiyyətindən danışıb.

Tədbirin sonunda bir qrup rayon statistika idarəsinin əməkdaşı peşə fəaliyyətində fərqləndiklərinə görə Beyləqan Rayon İcra Hakimiyyəti başçısının Fəxri Fərmanı ilə təltif olunub.