Bakı şəhər İcra Hakimiyyətinin keçmiş aparat rəhbəri, bir müddət icra başçısının müavini səlahiyyətlərini icra etmiş Rasim Quliyevin növbəti məhkəməsi baş tutub.
Sozcu.info xəbər verir ki, Rasim Quliyevin işi Bakı Ağır Cinayətlər Məhkəməsində hakim Faiq Qəniyevin sədrliyi ilə araşdırılır.
Sonuncu proses sənədlərin tədqiqi mərhələsi ilə davam etdirilib.
İlk olaraq Dövlət Tikinti Arxitektura Komitəsinin birinci müavini Namiq Hümbətovun bu il 7 oktyabrda "FF"Tikinti Şirkətinə ünvanladığı məktub elan olunub.
Məktubda binanın tikintisinə 2017-ci ildə başlanıldığı qeyd edilir.
Rasim Quliyev deyib ki, onun imzası ilə sərəncam olanda artıq binanın tikintisi davam edirmiş: "Tkinti 2015-ci ildə başlayıb. Ona görə də mənim imzaladığım sərəncam əhəmiyyətsiz olub".
Sənədlərdən o da məlum olub ki, "FF"şirkətinin inşa etdirdiyi binanın yerində yeni metrostansiyasının girişi nəzərdə tutulduğu üçün tikinti dayandırılıb.
Başqa bir sənəddə şirkətin tikinti aparmasına ilk sərəncamın 2012-ci il avqustun 1-də Bakı şəhər İcra Hakimiyyətinin başçısı Hacıbala Abutalıbovun verdiyi yazılır
Amma 2014-cü il oktyabrın 28-də isə Hacıbala Abutalıbovun həmin ərazidə tikintinin dayandırılması barədə də sərəncamı var. Həmçinin Abutalıbovun 2015-ci il oktyabrın 21-də özünün bir il əvvəl imzaladığı sərəncamı ləğv edən başqa bir sərəncamının olduğu da üzə çıxıb.
Başı bəlalı şirkət 2015-ci ildə ərazidə tikinti aparmaq üçün Xüsusi Tikinti Nişanı alsa da, məlum olub ki, 2015-2018-ci illərdə şirkət həmin ərazidə tikinti quraşdırma işləri aparmasını üçün Xüsusi Nişan qüvvəsini itirib. Buna görə də şirkət tikinti işləri aparmaq üçün yenidən sərəncam almalı olub.
Bu dəfə isə 31 may 2018-ci ildə Rasim Quliyev Bakı şəhər İcra Hakimiyyəti başçısının müavini səlahiyyətlərini müvəqqəti icra edən şəxs kimi tikintiyə icazə barədə sərəncam imzalayıb. Bundan sonra şirkətə yeni tikinti nişanı verilib.
Sərəncam məsələsi bununla da bitməyib. 2018-ci ilin 1 oktyabrında Bakı şəhər İcra Hakimiyyətinin yeni başçısı Eldar Əzizov Rasim Quliyevin imzası ilə olan sərəncamı ləğv edib.
Nəticə olaraq da 11 mart 2019-cu ildə Fövqəladə Hallar Nazirıiyinin Tikintidə Təhlükəsizliyə Nəzarət Agentliyi tikintinin dayandırılması barədə qərar verib. Bundan sonra isə 2019-cu il martın 13-də Nazirlər Kabineti şirkətin ərazidə 5 mərtəbə bina tikməsinə razılıq verib.
2019-cu il mayın 6-da mədəniyyət naziri Əbülfəz Qarayev Baş nazirin müavini Hacıbala Abutalıbova məktub göndərib. Məktubda bildirilib ki, Dilarə Əliyeva 141 və 145 saylı ünvandakı ikimərtəbəli binalar yerli əhəmiyyətli tarixi abidədir. Məktubda qeyd edilib ki həmin binalar qəzalı vəziyyətdədir, binalarda çatlar əmələ gəlib.
Hacıbala Abutalıbov bu zaman həmin binaların tarixi abidələr siyahısından çıxarılması üçün aidiyyəti qurumlara müraciət edib. Aidiyyəti qurumların bəziləri həmin binaların bərpasına külli miqdarda vəsait tələb olunduğunu əsas gətirərək bu binaların tarixi abidələrin siyahısından çıxarılmasına etiraz etməyib.
İttihamda yazılır ki, R.Quliyev Nəsimi rayonu, Dilarə Əliyeva küçəsində yerləşən binanın, həmçinin yerli əhəmiyyətli mədəniyyət abidəsi kimi dövlət tərəfindən mühafizə olunan yaşayış evinin sökülməsi, yerində yeni binaların tikintisi üçün “FF-2011” şirkətinə qanunsuz icazə verib.
İttihama əsasən, Rasim Quliyev Nəsimi rayonu ərazisində ofis və yaşayış binalarının tikilməsinə dair 31 may 2018-ci il tarixli sərəncamı icra başçısının müavini vəzifəsini icra etdiyi vaxt imzalayıb. Həmin ərazidə 1893-cü ildə inşa edilmiş, yerli əhəmiyyətli tarix və mədəniyyət abidəsi kimi dövlət tərəfindən mühafizə olunan yaşayış evinin olması nəzərə alınmayıb.
Qeyd edək ki, Rasim Quliyevin yaxınları bildirir ki, həmin sərəncam Hacıbala Abutalıbovun zamanında imzalanıb.