Daxili işlər naziri Vaxtanq Qomelauri, Kvemo Kartli qubernatoru Şota Rexviaşvili, Marneuli-Qardabani üzrə majoritar deputat Zaur Darğallı və digər hökumət nümayəndələri hazırda Dmanisiyə gəliblər. Sozcu.info  24News.ge-yə  istinadən xəbər verir ki, onlar Dmanisi rayon polis şöbəsinin binasında vəziyyətlə bağlı xüsusi iclas keçirilir. Nazir bildirib ki, baş vermiş qarşıdurmaları etnik münaqişə adlandırmaq olmaz və dünənki insident zamanı qanunu pozan hər bir şəxs mütləq cəzalandırılacaq. "Dünən baş verənlər çox təəssüfvericidir. Biz elə dünən məsələ ilə bağlı istintaq başlatdıq. Niyəsə bəziləri məsələni etnik qarşıdurmaya çevrimək istəyir. Azərbaycanlılar da, gürcülər də bizim ölkəmizin vətəndaşlarıdılar. Biz əsrlərdir ki, birlikdə yaşayırıq və qardaşıq. Əlbəttə ki, bu məsələ etnik qarşıdurmaya çevirilməməlidir. Ölkədəki etnik azərbaycanlılar bizim vətəndaşlarımızdır. Bundan əlavə, Azərbaycan bizim stratejik tərəfdaşımız, dostumuz və qonşumuzdur. Məsələni etnik qarşıdurmaya çevirmək ölkəyə qarşı düşmənçilikdir və biz buna icazə verməyəcəyik,"-deyə Vaxtanq Qomelauri əlavə edib. Təqribi olaraq 1 saat əvvəl Dmanisi rayon mərkəzinə əlavə polis qüvvələri cəlb edilib. Hazırda polis rayon mərkəzinə nəzarət edir və nisbi sakitlikdir. Qeyd edək ki, dünən bir qrup svan əsilli ekomiqrant etnik azərbaycanlılara məxsus mağazaya hücum edərək oradakı insanlara qarşı fiziki şiddət göstəriblər. Bu gün isə rayon mərkəzinə toplaşan yerli azərbaycanlı icmasının nümayəndələri günahkarların dərhal cəzəlandırılmasını tələb ediblər. Daha sonra isə insident böyüyb və tərəflər arasında Dmanisi küçələrində fiziki qarşıdurmalar yaşanıb.