“Təəssüf ki, Azərbaycanda da koronavirus əleyhinə saxta peyvənd pasportu verənlər var”.
Bunu Nazirlər Kabineti yanında operativ qərargahın keçirdiyi mətbuat konfransında Azərbaycan Prezidentinin İqtisadi məsələlər üzrə köməkçisi Şahmar Mövsümov bildirib.
Onun sözlərinə görə, insanlar var ki, əlində COVID pasportu var, amma hazırda reanimasiyadadır və ağır vəziyyətdədir: “Araşdırma zamanı məlum olub ki, onlar saxta pasport alıb. Düşünün ki, insan pul verib saxta pasport alıb, amma onun həyatı böyük bir təhlükə altındadır. Bütün bunlar araşdırılır və həmin şəxslər məsuliyyətə cəlb edilir”.
“Saxta peyvənd pasportu alan da, verən də cinayətkardır. Onların hər ikisi cinayət edirlər. Nəticədə isə itirən onlardır” - deyə, Şahmar Mövsümov bildirib.
Onun sözlərinə görə, beynəlxalq elm də deyir ki, vaksinasiya effektivdir: “İnanmayanlar bizə desinlər ki, niyə inanmırlar? Bizə də imkan vermirlər ki, biz bu pandemiyadan çıxaq. Heç kəs istəmir ki, pandemiya davam etsin”.