Azərbaycan Respublikasında 29 yanvar tarixinə təyin edilmiş bələdiyyə seçkilərinin təşviqat mərhələsi davam edir.

Leqal.info xəbər verir ki, Yeni Azərbaycan Partiyasının (YAP) Suraxanı rayonu, Qaraçuxur bələdiyyəsi üzvlüyünə
namizədləri, Qaraçuxur bələdiyyəsinin sədri İxdiyar Nəcəfov, Jalə Qibləliyeva, Aytən Paşayeva, Aytən Novruzova, Arif Şahmuradov, Rəşad Rzayev, Uğur Əliyev və Kənan Qasımlı (şəhid Muxtar Qasımlının qardaşı-red) Qaraçuxur qəsəbəsinin şəhidləri Muxtar Qasımlı və Orxan Qəhrəmanovun bulaq-abidə kompleksini ziyarət ediblər. Qəhrəman şəhidlərimizin abidə kompleksi önünə tər güllər düzülüb, ruhlarına dualar oxunub.
Qaraçuxur bələdiyyəsinin sədri, YAP-ın Qaraçuxur bələdiyyəsi üzvlüyünə namizədi İxdiyar Nəcəfov 44 günlük Vətən müharibəsində
qazanılmış misilsiz qələbənin məhz şəhidlərimizin xüsusi şücaəti hesabına əldə olunduğunu bildirdi: "Cənab Prezident İlham Əliyev çıxışlarında hər dəfə şəhidlərimizin fədakarlığını, yüksək vətənpərvər ruhda döyüşmələrini xüsusi vurğulayır. Bəli, biz qələbəmizi şəhidlərimizə, qazilərimizə borcluyuq. Prezidentimizin də
söylədiyi kimi, ordunun nə qədər müasir silahı, texnikası olsa da, qələbəni qazanan əsgər və zabitlərdir. Həm Muxtar, həm də Orxan doğma torpaqlarımızın düşmən tapdağından azad olunması üçün şirin canlarını fəda etdilər. Onların göstərdiyi igidlik bundan sonra yüz illər, min illər keçsə də, əbədi yaşayacaq. Ruhları şad olsun. Bu gün Cənab Prezident İlham Əliyev və Birinci Vitse-Prezident Mehriban xanım Əliyeva tərəfindən şəhid ailələrinə, qazilərə
hər cür diqqət və qayğı göstərilir".
Şəhid Muxtar Qasımlının atası Əli Qasımov dövlət başçısının şəhid ailələrinə və qazilərə göstərdiyi yüksək qayğıdan xeyli məmnun qaldıqlarını bildirdi. O bildirib ki, nə qədər ki, dövlətimiz var şəhidlərin əziz xatirəsi əbədi yaşayacaq.
YAP-ın Qaraçuxur bələdiyyəsi üzvlüyünə namizədləri İxdiyar Nəcəfov, Jalə Qibləliyeva, Aytən Paşayeva, Aytən Novruzova, Arif Şahmuradov və Rəşad Rzayev təşviqat mərhələsi çərçivəsində Yeni Günəşli "D" yaşayış sahəsi 27-ci binanın sakinləri ilə də görüşüblər. Namizədlər sakinlərə YAP-ın seçki proqramı və bələdiyyə seçkilərinin əhəmiyyəti haqqında geniş məlumat veriblər. Qaraçuxur bələdiyyəsinin sədri İxdiyar Nəcəfovun sözlərinə
görə, "D" yaşayış sahəsində yerləşən "D park"da və bu massivi əhatə edən bütün binalarda mütəmadi olaraq abadlıq işləri həyata keçirilir. Sakinləri narahat edən problemlər daim diqqətdə saxlanılmaqla həlli istiqamətində müvafiq qanunvericiliyə uyğun olaraq addımlar atılır. İxdiyar Nəcəfov, Jalə Qibləliyeva, Aytən Paşayeva Aytən Novruzova, Arif Şahmuradov və Rəşad Rzayev sakinləri seçkidə fəal olmağa və YAP-ın namizədlərinə səs verməyə çağırıblar.
Görüş zamanı bina sakinlərinin təklifləri qeydə alınıb.