Prezident İlham Əliyev Azərbaycan Respublikası idmançılarının və idman mütəxəssislərinin təltif edilməsi haqqında Sərəncam imzalayıb.

Sozcu.info xəbər verir ki, təltif olunanların arasında tanınmış adlar da var.

Belə ki, Eduard Məmmədov, Azər Məhərrəmov və Vəfa Musayeva "Tərəqqi" medalı, İlahə Qədimova və Mövlud Mirəliyev isə "Əməkdar bədən tərbiyəsi və idman xadimi" fəxri adı ilə təltif olunublar.

Azərbaycanlı peşəkar kikboksçu Eduard Məmmədov 30 qat dünya çempionu, 11 qat Avropa çempionu, 11 qat dünya kubokunun sahibi, WAKO versiyası üzrə 10 qat dünya çempionu, 15 qat Azərbaycan çempionu, Asiya və Avrasiya çempionu, peşəkarlar arasında dünya çempionu, peşəkarlar arasında WAKO versiya üzrə interkontinental kəmərin sahibi, peşəkarlar arasında IKBO versiya üzrə dünya kəmərinin sahibidir.

Vəfa Musayeva Everest dağına qalxan Azərbaycanın ilk qadın alpinisti olub. O bu uğura cari ilin may ayında imza atıb.

Tanınmış şahmatçı İlahə Qədimova yeniyetmələr arasında dünya birinciliyinin ikiqat qalibi, 20 yaşlı şahmatçılar arasında Avropa çempionatının qızıl medalçısıdır. Azərbaycan Şahmat Federasiyasının baş katibi olan İlahə Qədimova cari ildə də bir sıra mötəbər yarışlarda işləyərək hakim fəaliyyətini davam etdirib. FIDE tərəfindən ən yüksək kateqoriyalı hakimlər siyahısına daxil edilib.

Mövlud Mirəliyev 2008-ci ildə Çinin Pekin şəhərində baş tutan XXIX Yay Olimpiya Oyunlarında bürünc medal qazanıb. Fransanın paytaxtı Parisdə keçirilən cüdo üzrə veteranlar arasında dünya çempionatında qızıl medal sahib çıxıb. Hazırda Xüsusi Olimpiya Komitəsinin

prezidenti vəzifəsində çalışır.

Təltif olunanlar arasında Azərbaycanın Milli Qəhrəmanı Asif Məhərrəmovun (Fred Asif) oğlu Azər Məhərrəmov da var. 48 yaşlı armrestlinq (qol güləşi) üzrə usta idmançı 2022-ci ilin may ayında Polşanın Rumya şəhərində keçirilmiş qol güləşi üzrə Avropa çempionatının qalibi olub.

Həmin ilin sentyabrında Fransanın Dyepp şəhərində keçirilən dünya çempionatında da fəxri kürsünün ən yüksək pilləsinə qalxıb. (Oxu.az)