5 mart səhər saatlarında Azərbaycan–İran sərhədi yaxınlığında baş verən pilotsuz uçuş aparatı (İHA) hücumundan sonra Azərbaycan hökuməti təhlükəsizlik tədbirlərini gücləndirib. Hadisədən dərhal sonra ölkənin cənub hava məkanında uçuşlara məhdudiyyət tətbiq olunub və İranla sərhəddə yük daşımaları müvəqqəti dayandırılıb.

Rəsmi məlumatlara görə, Azərbaycan ərazisinə dörd İHA ilə hücum həyata keçirilib. Uçuş informasiya sistemlərində yayımlanan məlumatlarda göstərilir ki, Bakının uçuş informasiya bölgəsinin İran sərhədinə yaxın hissəsində hava hərəkəti 12 saat müddətinə qismən məhdudlaşdırılıb.

Azərbaycan tərəfi hücuma görə İranı məsul hesab edir. Azərbaycan Prezidenti İlham Əliyev məsələ ilə bağlı açıqlamasında bildirib ki, ölkə bu hücuma səssiz qalmayacaq. Prezident qeyd edib ki, silahlı qüvvələrə müvafiq cavab tədbirlərinin hazırlanması və həyata keçirilməsi barədə göstəriş verilib.

İran tərəfi isə hadisəyə fərqli münasibət bildirib. Rəsmi Tehran bu insidenti İsrail tərəfindən törədilmiş mümkün təxribat kimi qiymətləndirib və məsuliyyəti üzərinə götürməyib.

Hadisənin ən ciddi nəticələrindən biri Naxçıvan bölgəsində qeydə alınıb. Məlumata görə, İrana məxsus olduğu iddia edilən İHA-lardan ikisi  Naxçıvan Muxtar Respublikası yaxınlığındakı hava limanının ərazisinə düşüb. Nəticədə 4 nəfər yaralanıb, terminal binasına ziyan dəyib və ərazidə yanğın baş verib. Digər pilotsuz aparat isə Şəkərabad kəndində yerləşən məktəbin yaxınlığına düşüb.

Tibbi mənbələrin məlumatına əsasən, hadisə nəticəsində 4  nəfər xəsarət alıb. Azərbaycan Xarici İşlər Nazirliyi ilkin mərhələdə iki yaralı olduğunu bildirsə də, sonradan dörd nəfərin tibbi yardım üçün müraciət etdiyi açıqlanıb.

Hücumdan sonra təhlükəsizlik tədbirləri çərçivəsində Azərbaycan Respublikasının Nazirlər Kabineti də xüsusi qərar qəbul edib. Qərara əsasən, Azərbaycan–İran dövlət sərhədində yerləşən bütün sərhəd-keçid məntəqələrində yük və tranzit daşımaları müvəqqəti olaraq tam dayandırılıb.

Rəsmi açıqlamada bildirilib ki, bu addım beynəlxalq hüquq normalarına zidd olan hücumların yaratdığı mövcud təhlükəsizlik vəziyyəti nəzərə alınaraq atılıb.

Ekspertlər hesab edir ki, baş verən hadisə regionda təhlükəsizlik vəziyyətini daha da gərginləşdirə bilər. Azərbaycan tərəfinin cavab tədbirləri hazırlaması barədə bəyanatları isə qarşıdakı günlərdə siyasi və hərbi gərginliyin artması ehtimalını gündəmə gətirir.

İnsidentin detalları və tərəflərin reaksiyası ilə bağlı araşdırmalar davam edir. Regionda vəziyyət isə hələ də diqqətlə izlənilir.

Arzuman Loğmanoğlu

Sozcu.info