Dünya Ahıska Türkləri Birliyi (DATÜB) Ukraynada yaşayan və savaşın ortasında qalan Axısxa Türklərinin son durumu ilə bağlı məlumat yayıb. 
Sozcu.info DATÜB-ün Mərkəzi Qərargahına istinadən bildirir ki, müharibə bölgəsində olan Axısxa Türklərinin ərazidən çıxarılması və yaxud onların təhlükəsizliyinin təmin olunması üçün Türkiyə Cümhuriyyətinin müvafiq qurumları ilə ortaq fəaliyyət göstərilir.
DATÜB-ün bununla bağlı açıqlamasını təqdim edirik: 
“Rusiya-Ukrayna müharibəsinin başlaması Ukraynada yaşayan hər kəsə mənfi təsir göstərməklə yanaşı, bu ölkədə yaşayan Axısxa Türklərini də ciddi narahat edib. Dünya Ahıska Türkləri Birliyinin Baçqanı cənab Ziyəddin Kassanov 24 fevral 2022-ci ildə Qazaxıstanın paytaxtı Nur Sultanda olan Türkiyənin xarici işlər naziri cənab Mövlud Çavuşoğlu ilə görüşüb. Kassanov bu görüş zamanı Ukraynadakı Axısxa Türklərinin vəziyyəti ilə bağlı nazirə məlumat verib. 
Cənab nazirimiz Mövlud Çavuşoğlu DATÜB Başqanı ilə görüşündə Ukraynanın hava məkanının bağlı olması səbəbindən bu ölkədəki Türk vətəndaşlarının evakuasiyasının avtobuslarla həyata keçiriləcəyini, Ukraynada yaşayan Axısxa Türklərinin də, Türkiyə Cümhuriyyəti vətəndaşları kimi, evakuasiya ediləcəyini bəyan edib. Hörmətli M.Çavuşoğlu eyni zamanda Türkiyə Cümhuriyyətinin Ukraynadakı səfiri ilə görüşündə də bu ölkədə yaşayan Türkiyə vətəndaşları və Axısxa Türkləri ilə bağlı lazımi göstərişlər verib.

Bu müddətdə DATÜB olaraq Türkiyə Cümhuriyyəti Xarici İşlər Nazirliyinin Ukraynada yaşayan vətəndaşlarımız üçün dərc etdiyi elanlar paylaşılıb, lazım gəldikdə əlaqə saxlamaq üçün telefon nömrələri xalqımıza çatdırılıb.
DATÜB sədri cənab Ziyəddin Kassanovun göstərişi ilə qurumun birinci müavini İsmayıl Əhmədov 23 fevral - 01 mart 2022-ci il tarixləri arasında döyüş bölgələrində olan Axısxa Türkləri ilə görüşmək, fikir mübadiləsi aparmaq və onların ruhyüksəkliyini artırmaq üçün Ukraynaya gedib. Bundan əlavə, cənab İsmayıl Əhmədov və DATÜB Ukrayna Nümayəndəliyinin rəhbəri cənab Marat Rəsulovla daimi əlaqə saxlanılıb, sosial şəbəkələrdə informasiya təxribatlarının qarşısını almaq üçün canlı yayımlar və yazılar dərc edilib. Ukraynada yaşayan Axısxalı bacı və qardaşlarımıza, eləcə də istər Türkiyə Cümhuriyyəti vətəndaşlarını təxliyə edən avtobuslarla, istər də öz imkanları ilə Ukraynadan çıxan şəxslərə lazımi məlumatlar verilib.

Rusiya-Ukrayna müharibəsinin 6-cı günündə DATÜB olaraq Ukraynadakı qardaşlarımıza dəstək olmaq üçün həm Türkiyə Xarici İşlər Nazirliyinin Böhran Mərkəzi, həm də Qızıl Aypara ilə əlaqələr qurmaqdayıq. 
Ukrayna dövlətinin qərarı ilə 60 yaşdan aşağı kişilərin ölkədən çıxışı qadağan olunduğundan, Ukrayna vətəndaşı olan Axısxa Türklərinin yaşadıqları bölgələrdə ərzaq və ləvazimat çatışmazlığından əziyyət çəkməmələri üçün müəyyən işlər görülüb. Bundan əlavə, evakuasiya ediləcək şəxslərin siyahıları Türkiyə Cümhuriyyəti Xarici İşlər Nazirliyinə təqdim edilərək, atılacaq addımlar dəyərləndirilir.
DATÜB olaraq cənab Başqanımız Ziyəddin Kassanovun rəhbərliyi ilə Ukraynada yaşayan qardaşlarımızın vəziyyəti ilə bağlı mütəmadi olaraq məlumat mübadiləsi aparırıq və Türkiyə dövlətinin qurum və təşkilatları ilə koordinasiyalı şəkildə lazımi araşdırmalar və atılacaq addımlar çərçivəsində çalışdığımızı bildiririk. 
Allah bütün məsum və günahsız insanları, millətimizi qorusun!
DATÜB Mərkəzi Qərargahı
Sozcu.info