ABŞ-ın müdafiə naziri Ceyms Mattisin Amerika hərbçilərinin Suriyanı tərk eləməsi ilə bağlı qərarı imzaladığı bildirilib.

Amerikanın CNN televiziyasının Müdafiə Nazirliyindən olan mənbəyə istinad elədiyi xəbərə görə, yanvar ayında istefa verəcəyi bildirilən Mattis ABŞ hərbçilərinin Suriyadan çıxmasını nəzərdə tutan sənədi imzalayıb. ABŞ hərbçilərinin Suriyadan qarşıdakı həftələr ərzində çıxmağa başlayacağı bildirilir.

ABŞ prezidenti Donald Tramp ABŞ hərbçilərini Suriyadan çıxarmaq qərarını bəyan elədikdən sonra müdafiə naziri C.Mattis vəzifəsindən istefa verəcəyini açıqlamışdı.