Respublikamızda dövlət tibb müəsissələrində göstərilən tibbi xidmətlər pulsuz olsa da, bəzi xəstəxana rəhbərləri bu qaydaya qətiyyən riayət etmir.

Deyirlər, rüşvətxoru müəyyən eləmək çətin məsələdir. Çünki, bu alış-verişin gizli məqamları görünən deyil. Sumqayıt 2 saylı doğum evində isə rüşvətxorluq hallarını axtarmağa bəlkə də heç ehtiyac belə yoxdur. İnsafən, xəstəxana kifayət qədər yüksək səviyyədə təmir olunub və yaxşı şərait yaradılıb..

Necə deyərlər, görünən dağa nə bələdçi? Doğum evindəki "dağ boyda” açıq alveri az qala normaya çevirmiş baş həkim İmmi Ələkbərova deyəsən hörmətli səhiyyə nazirinin zaman-zaman səslənən acı etiraflarından nəticə çıxartmaq fikrində olmayıb. Korrupsiyaya qarşı bütün ölkə ilə birlikdə mübarizə aparıldığı indiki günlərdə doğum evində ginekoloqdan tutmuş tibb bacısınadək əksər səhiyyə işçiləri rüşvətin girovuna çevrilib.

Şikayətçilərin bildirdiyinə görə, 2 saylı Doğum Evində rüşvətxorluq o həddə çatıb ki, burda pul verməsən heç adamın üzünə belə baxmırlar. Doğuş prosesi bu xəstəxanada sanki qanuna uyğun şəkildə müəyyən olunmuş qiymətlərlə həyata keçirilir. İlkin araşdırmalar göstərdi ki, buraya gələnlərin analıq sevinci 350-700 manat civarında ölçülür. Analar doğum evində nə qədər çox qalırsa, bir o qədər "sutoçnı" ödəyir. Apardığımız araşdırmadan aydın oldu ki, buradakı bəzi qəssabsifət həkimlərin xofu qarşısında "şirinlik” ödəmək məcburiyyətində qalan valideynləri körpəsinin taleyi daha çox narahat edir.

Məsələn, bu müəssisənin qəbul şöbəsində doğuşa gələn xanımlardan təbii doğuş üçün 350, qeysəriyyə 650 manat məbləğində ödəniş etmək tələb olunur. Hətta maraqlananlara belə bir məlumat da verilir ki, həmin məbləğin az hissəsi doğuşu qəbul edəcək həkimə, müəyyən hissəsi kiçik personala və çox hissəsi isə keçmiş baş həkim İmmi Ələkbərovaya çatırmış. Lakin bu, gələcək ananı sonrakı ödənişlərdən də azad etmir. İş bununla bitsə, dərd yarıdır. Hələ qeydiyyat pulu, xəstəni görmək pulu, yemək və əşya daşımaq pulu, lazım oldu-olmadı təyin olunan dərmanların pulu...

Şöbəyə gətirildikdən sonra ana olmağa hazırlaşan xanımlar burada elə münasibətlə rastlaşırlar ki, onların növbəti pul tələblərini də yerinə yetirməkdən başqa çarələri qalmır. Yenicə doğmuş qadının xəstəxanada ən azı 3 gün qalması tələb olunur ki, doğum evində işləyən tibb bacıları, baxıcılar və digər işçilərə də bu müddət ərzində 50 manata qədər pul xərclənir.

Xəstəxanada üstünlüyü "salam" verən xəstələrə verirlər, digər xəstələr isə bir kənarda qalır.

2 saylı doğum evində hökm sürən belə mənzərə nədənsə, səhiyyə şöbəsinin müdirinin diqqətindən kənarda qalmışdı. Bunun səbəbləri bizə aydın deyil. Əsas vəzifəsi dünyaya pulsuz-parasız insan gətirmək olan tibb ocağından rüşvətin yığışdırılması əlbəttə, həmdə şəhər səhiyyəsi rəhbərliyinin də işgüzar nüfuzuna xidmət edərdi. Şəhər icra hakimi Zakir Fərəcovun məsələyə müdaxiləsi,bundan sonra rüşvət girdabında batanlara dərs olacağına ümid edirik