Sahibkarlıq fəaliyyətinə yeni başlayanlar və biznesini daha da genişləndirmək istəyənlər üçün özəlləşdirmə ilə bağlı keçirilən hərraclara qatılmaq əlverişli üsullardan biridir. Bu amili nəzərə alaraq 13 iyul və 27 iyul tarixlərində İqtisadiyyat Nazirliyi yanında Əmlak Məsələləri Dövlət Xidməti tərəfindən keçiriləcək özəlləşdirmə hərracına çıxarılan ən münasib qiymətə olan dövlət əmlaklarının siyahısını hazırladıq. 
52 saylı mağaza
Siyəzən şəhəri, Heydər Əliyev küçəsi, 55A ünvanında yerləşən mağazanı cəmi 750 manata almaq olar. Obyektin ümumi faydalı sahəsi 33.1 m2-dir. Kiçik biznes qurmaq üçün əlverişli hesab olunur. Bu obyekt iyulun 27-də keçirilən hərraca çıxarılıb. Hərraca qatılmaq üçün tələb olunan beh 75 manat təşkil edir.
Maye qaz satışı sahəsi
Neftçala rayonu, Bankə qəsəbəsi, Ə.Gözəlov küçəsi, 2A ünvanında yerləşən maye qaz satışı sahəsinin ilkin satış qiyməti mağazadan cüzi fərqlənir – 1 000 manat. Bu obyektin digər üstünlüyü torpaq sahəsi ilə birgə özəlləşməyə çıxarılmasıdır. Adıçəkilən əmlakın ümumi faydalı sahəsi 51.8 m2, torpaq sahəsi 65.8 m2-dir. Bu obyekt də iyulun 27-də keçirilən hərraca çıxarılıb. Hərraca qatılmaq üçün 100 manat beh məbləği tələb olunur.
Kənd klubu
Hazırladığımız siyahıda növbəti 2 əmlakın ilkin satış qiyməti eynidir. Belə ki, Qazaxın Alpoud kəndində və Qubanın Talış kəndində yerləşən klubların hər birinin başlanğıc qiyməti 2 000 manatdır. Obyektlərin ərazisi kiçik biznes qurmaq üçün əlverişlidir.
Bu əmlaklar torpaq sahələri ilə birgə özəlləşdirməyə çıxarılıb. Qazaxda yerləşən obyektin ümumi faydalı sahəsi 80.4 m2, torpaq sahəsi isə 101.2 m2-dir. Qubada yerləşən əmlakın ümumi faydalı sahəsi 81.6 m2, torpaq sahəsi isə 317 m2-dir. Hər iki əmlak 27 iyul tarixində keçiriləcək hərraca çıxarılıb. Hərraca qatılmaq üçün 200 manat beh məbləği ödənilməlidir.
Yeməkxana
Balakəndəki yeməkxana isə 2 450 manata hərraca çıxarılır. Rayonun Mahallar kəndində yerləşən əmlakın sahəsi 69.2 m2-dir. Dövlət əmlakı 13 iyul tarixində keçiriləcək özəlləşdirmə hərracına çıxarılıb. Hərraca qatılmaq üçün tələb olunan beh 245 manat təşkil edir. 
5 saylı mağaza
Yevlax rayonu, Aran qəsəbəsində yerləşən 5 saylı mağazanın ilkin satış qiyməti 3 000 manatdır. Mağazanın sahəsi 52.6 m2-dir. Əmlak 27 iyul tarixində keçiriləcək hərraca çıxarılıb. Hərraca qatılmaq üçün 300 manat beh məbləği ödənilməlidir.
Alıcqışlaq kənd klubu
5 000 manata Xaçmazın Alıcqışlaq kəndində yerləşən eyniadlı klubu almaq olar. Obyektin ərazisi də genişdir. Belə ki, adıçəkilən əmlakın ümumi faydalı sahəsi 260.7 m2, torpaq sahəsi isə 300 m2-ə yaxındır. Bu obyekt də torpaq sahəsi ilə birgə özəlləşdirilir. 13 iyul tarixində klub üzrə keçiriləcək hərraca qatılmaq üçün 500 manat beh tələb olunur. 
İqtisadiyyat Nazirliyi yanında Əmlak Məsələləri Dövlət Xidmətindən verilən məlumata görə hər kəs Xidmətin rəsmi saytından (emlak.gov.az) və ya Özəlləşdirmə portalından (privatization.az) hərraca çıxarılan dövlət əmlakı üzrə seçim edə bilər.
Elektron Xidmətlər Portalından (e-emlak.gov.az) müvafiq hərrac xidmətini seçərək qeydiyyatdan keçib, dövlət əmlakının ilkin hərrac qiymətinin 10 faizi məbləğində behi ödəyib hərracda iştirakçı statusu almaq mümkündür. Sifarişçilər hərraclara onlayn formada da qoşula bilər. Prosesə marağı olan şəxslər hərrac günü həm Əmlak Xidmətləri Məkanına gəlməklə, həm də Elektron Xidmətlər Portalından (e-emlak.gov.az) “Elektron hərrac” bölməsini seçərək hərracları qeydiyyatsız formada izləyə bilərlər.
13 iyul və 27 iyul tarixində keçiriləcək hərraclara çıxarılan dövlət əmlakı ilə buradan tanış olmaq mümkündür.