Bu ilin ilk yarısında Azərbaycanda fəaliyyət göstərən bankların əldə etdiyi xalis mənfəət 372 milyon 614 min manat olub. 
Sozcu.info xəbər verir ki, ümumi mənfəətin 84%-i və ya 311 milyon 935 min manatı 5 bankın payına düşüb. 2021-ci ilin ilk yarısında “Azərbaycan Beynəlxalq Bankı” 148 milyon 150 min manat, “PAŞA Bank” 50 milyon 640 min manat, “Kapital Bank” 99 milyon 772 min manat, “Xalq Bank” 5 milyon 819 min manat, “Bank Respublika” isə 7 milyon 554 min manat xalis mənfəət əldə edib. 
Qeyd edək ki, özəl bankların əldə etdiyi 224 milyon 464 min manatlıq ümumi mənfəətin 67%-i və ya 150 milyon 412 min manatı “Paşa Holdinq”ə bağlı 2 bankın- “PAŞA Bank” və “Kapital Bank”ın payına düşüb.
Məlumat üçün onu da bildirək ki, bu ilin ilk yarısında Azərbaycanda fəaliyyət göstərən sığorta şirkətləri tərəfindən 452 milyon 366 min manat sığorta haqqı toplanıb. Toplanan vəsaitin 79,2%-i və ya 358 milyon 58 min manatı 5 şirkətin payına düşüb. 2021-ci ilin ilk yarısında "PAŞA Həyat Sığorta" 159 milyon 565 min manat, "PAŞA Sığorta" 105 milyon 766 min manat,  Dövlət Sığorta Kommersiya Şirkəti (“Azərsığorta”) 44 milyon 709 min manat, “Qala Sığorta” 24 milyon 31 milyon manat, “Atəşgah Həyat Sığorta” isə 23 milyon 708 milyon manat sığorta haqqı toplayıb.
Qeyd edək ki, özəl sığorta şirkətlərinin topladığı 407 milyon 657 min manatlıq sığorta haqlarının 65%-i və ya 265 milyon 124 min manatı “Paşa Holdinq”ə bağlı 2 sığorta şirkətinin - "PAŞA Həyat Sığorta" və "PAŞA Sığorta"nın payına düşüb.