Abutalıb Səmədov: “Rusiyadakı təlatümlərin respublikamıza keçməsini yalnız ermənilər və onların maraqlarına xidmət edən qüvvələr arzulaya bilərlər”

Azərbaycan müxalifətinin radikal cinahı Rusiyada müxalifət lideri Aleksey Navalnı ilə bağlı cərəyan edən hadisələri həvəslə izləyir. Navalnının həbs olunmasından sonra Rusiyanın şəhərlərində mitinqlərin keçirilməsi Azərbaycan müxalifətinin sözügedən qanadında ənənəvi “inqilab sərhədimizə yaxınlaşır” əhval-ruhiyyəsi yaradıb. Navalanını, Rusiyada gedən mitinqləri elə dəstəkləyirlər, sanki Azərbaycanın taleyi həll olunur. Bununla həmin müxalifətçilər nəyə nail olmaq istəyir? Navalnıdan nə umurlar?
Bəs niyə özləri Navalnı olmaq istəmir? Bizim radikal müxalifət “qoçuları” ilə Navalnının müqayisəsi mümkünmü? Bir qrup müxalifətçi niyə xaricdə siyasi ayaqlanma olanda, xalq etirazları başlayanda həvəslənir, bu prosesin Azərbaycanda da təkrarlanacağına ümidlənir? Saakaşvili, Yuşşenko, Qırğızıstan inqilabı, Poroşenko, Venesuledakı xalq etirazları... və indi də Rusiyadakı etirazlar bizim müxalifəti həvəsləndirən əsas amillər olub, yenə də olmaqdadır. Tərəfdarlarına deyirlər ki, baxın, orada oldusa, bizdə də olacaq. Amma bizdə olmur ki, olmur. Çünki real şərait yoxdur. Bəs radikalların bu sevincəkliyinin səbəbi nədir?
Azərbaycan Naminə Alyans Partiyasının sədri Abutalıb Səmədov bildirdi ki, Navalnı Almaniyada müalicə  olunandan sonra həbs olunma ehtimalını gözünün altına alıb Rusiyaya qayıtdı: “Eyni cəsarəti Azərbaycanda hakimiyyətə gəlmək iddiasında olan müxalifətçilər göstəriblərmi? Sərhədi keçən kimi ürəklənib, ”cəsarətli" bəyanatlar verənlər  geriyə qayıtmamaq üçün əllərindən gələni edirlər. Çünki onların müxalifətçiliyi “üzdə qalmaq”, “dolanışığı təmin etmək” xatirinə aparılan “mübarizədən” başqa bir şey deyil. Çünki onların özləri də yaxşı başa düşürlər ki, heç vaxt hakimiyyətə gəlməyəcəklər və bu səbəbdən də reallıqdan uzaq hər cür fantastik bəyanatlar verə bilərlər.

Navalnının başladığı hərəkat ciddi nəticə verə bilərmi? İnanmıram. Çünki onu dəstəkləyən maddi durumu ağır olan müəyyən kütlədən fərqli olaraq, ziyalılar, orta sinif nümayəndələri Navalnını ciddi siyasətçi və dövlət adamı hesab etmirlər. Yaxşı anlayırlar ki, kütlələrin xoşuna gələn filmlər hazırlayan orta səviyyəli bir bloger Rusiya kimi böyük dövləti idarə edə bilməz.
Bu cür insanların postsovet məkanında hakimiyyətə gəlməsində xarici qüvvələr maraqlıdır və onların son uğurlu hakimiyyət çevrilişi Ermənistanda baş vermişdi. Nəticəni təkcə ermənilər deyil, bütün dünya müşahidə edə bildi. Gördülər ki, xarici güclərin hakimiyyətə gətirdikləri jurnalistlər, blogerlər xalqlarının başına hansı fəlakətləri gətirə bilərlər. Yeri gəlmişkən, Azərbaycanda hakimiyyətə gələcəyinə ümid edən blogerlər, keçmişdə parlament müxbiri olmuş keçmiş jurnalistlər və digər “liderlər” var və təbii ki, onların belə “xam xəyallarla” yaşamaq haqqını heç kim əllərindən ala bilməz".
Partiya sədri hesab edir ki, yaxın vaxtlarda Rusiyada ciddi hakimiyyət böhranı yaranacağını və bu böhranın hansısa blogeri hakimiyyətə gətirəcəyini güman edənlər özlərini və xalqı aldatmaqla  məşğul olur, “xam xəyallarla” yaşamaqda davam edirlər: “Sadəcə olaraq bu cür xam xəyallara düşənlər bir müddətdir ətraflarındakı azsaylı insanların başını ”Şimal qonşumuzda inqilab olacaq, sıra bizə çatır" kimi absurd təbliğatla aldatmağa çalışırlar. Lakin insanlar onlara inanmır. Ağlı başında olan hər kəs bilir ki, Rusiya böyük dövlətdir və son illər güc strukturları bu cür qarışıqlıqların qarşısını almaq üçün hər şeyə gedəcəklərini dəfələrlə nümayiş etdiriblər. Bu dəfə də hər cür etirazın qarşısı qətiyyətlə alınacaq.
Rusiyadakı proseslərin Azərbaycana təsiri ola bilməz və olmamalıdır. Ötən il tariximizin ən böyük qələbəsini qazanmışıq və addım-addım  son məqsədə-tam suverenliyimizin təmin olunması və Ermənistanla aramızda olan bütün mübahisəli məsələlərin aradan qaldırılması istiqamətində irəliləyirik. İndiki şəraitdə Azərbaycanda siyasi hakimiyyət uğrunda mübarizənin qızışmasını, Rusiyadakı təlatümlərin respublikamıza keçməsini yalnız ermənilər və onların maraqlarına xidmət edən qüvvələr arzulaya bilərlər. Xalqımız, ziyalılarımız, ilk növbədə siyasi qüvvələr bu cür xam xəyalların nə qədər təhlükəli olduğunu anlamalı və qarşısını almaq üçün əllərindən gələni etməlidirlər".