Daşnaklar təslim olan Ermənistana qarşı çıxır. Belə ki,  daşnaq silahlı dəstələri Qarabağı tərk etmək istəmirlər. “Daşnaksütyun” partiyası nümayəndələrinin formalaşdırdığı könüllü dəstələr hələ də Qarabağda, öz mövqelərində qalmaqdadırlar. Bunu partiyanın üzvü Geqam Manukyan iddia edir.
Bildirir ki, onlar Qarabağla bağlı razılaşmanı çox ağır hesab edirlər və əvvəlki yerlərində qalırlar. Məlumdur ki, tarixən daşnakların  xaricdə  güclü maliyyə dəstəkləri var və sülhü tanımamaq qərarı təkcə onların mövqeyi olmaya bilər. Razılaşmaya hər hansı silahlı əngəl olarsa, onların zərərsizləşdirilməsi necə olmalıdır? Çünki sonradan partizan dəstələri kimi Azərbaycanın mülkü əhalisinə, eləcə Rusiya və Türkiyə sülhyaratma missiyasına hücumlar təşkil edə bilərlər.
Politoloq Elxan Şahinoğlu deyir ki, “Daşnaksütyun” partiyasının Ermənistanda siyasi gücü yoxdur: “Onlar heç parlamentə düşə bilməyiblər. Sadəcə, qədimi adları var və ermənilərin ilk siyasi, terrorçu partiyasıdır. Xaricdə büroları və tərəfdarları güclüdür.  Diaspora içində də mövqeləri var. Amma Ermənistanda tərəfdar qrupu çox azdır. Ölkə daxilində nəsə etmək üçün isə ilk növbədə canlı qüvvə lazımdır”.

Elxan Şahinoğlu
E.Şahinoğlu bildirir ki, yaranmış vəziyyət müxalifətə Paşinyan hökumətini tənqid etmək, devirmək üçün fürsət verib. Daşnaklar da yaranmış vəziyyətdən istifadə edərək cəmiyyətin gözünə girməyə çalışırlar: “Paşinyan tərəfdarlarının maraqlı bir cavabını oxudum. Onlar Paşinyanın istefasını tələb edən müxalifətə bildirirlər ki, siz də üç ölkə arasında imzalanan sənədə etiraz edin, sülhməramlılar ərazidən çıxsın və müharibəni davam etdirək.  Əslində isə Paşinyan tərəfdarları müxalifətə demək istəyir ki, biz uduzduq, gücümüz çatmadı, amma siz də parlament qarşısında etiraz aksiyası keçirdiyinizə gəlib cəbhədə döyüşərdiniz. Paşinyan iki dəfə səfərbərlik elan etdi. Amma gələn olmadı. Mən səfərbərlik elan olunan zaman da deyirdim ki, Paşinyanın məqsədi odur ki, müharibədən sonra deyə bilsin ki, ”mən əlimdən gələni etdim, amma olmadı". Cəmiyyəti də günahkar çıxarmaq istəyirdi ki, siz savaşmağa gəlmədiniz. Və indi də bu cür çıxışlar edir. “Daşnaksütyun” partiyasının üzvləri nə edəcək? Gedib Rusiyanın sülhməramlıları ilə savaşacaq? Yoxsa bizimlə ikinci dəfə müharibəyə başlayacaqlar? Bunların hamısı gözə kül üfürməklə məşğuldur".
Politoloq söyləyir ki, Ermənistanda cəmiyyət də, müxalifət də məğlubiyyəti qəbul edib: “Ermənistanda Paşinyanın hökumətinə çox da ciddi etirazlar yoxdur. Parlamentin qarşısına da çox adam çıxmamışdı. Rusiyalı jurnalistin reportajına baxdım. Deyir ki, İrəvanda sakitçilikdir, mağazalar işləyir, küçələrdə avtomobillər normal hərəkət edir. Ermənilərin əksəriyyəti Dağlıq Qarabağ məsələsinin bu cür həll olunmasına sevinirlər. Çünki həm büdcələrinə təsir edirdi, həm uşaqları təhlükə altında əsgərliyə gedirdi. Ola bilər ki, Dağlıq Qarabağda doğulanlar bunu özünə faciə sayır, amma əksəriyyət bundan razıdır ki, təhlükədən qurtulublar. Mən bəzi konfranslarda erməni nümayəndələrlə görüşəndə onlar da deyirdi ki, Dağlıq Qarabağ məsələsi onlar üçün yükdür.  Cəmiyyət olaraq ermənilər bu məğlubiyyəti qəbul edib. Bunun da təsdiqi meydanlara çıxan insanların sayıdır. Əksəriyyət buna sevinir və gördülər ki, savaşmağın da mənası yoxdur. Çünki döyüş meydanına kim gəldisə, öldürdük. Özləri də görürdü ki, bu gedişlə gənc qalmayacaq.  Paşinyanı qəbul etməsəm də, onun bu mövqeyini qəbul edirəm. Müxalifətə deyir ki, niyə gəlib bizimlə Şuşada döyüşmürdünüz? Mitinq keçirmək əvəzinə savaşardınız. Paşinyan indi vaxt udmaq istəyir. Hakimiyyətini qorumağa çalışır. Parlament üsulu ilə devirə bilmədilər, küçə mitinqləri yolu ilə devirmək də çətindir. Polis və ordu Paşinyanın yanındadır. Ordu da Paşinyana məğlubiyyəti elan etməyi təklif etdi. Bundan sonra ermənilərə hərbi gücü yenidən yaratmaq üçün azı 10-15 il lazımdır. Paşinyanı devirmək istəyənlərin özünün də real gücü və çıxış yolu yoxdur. Nə edəcəklərini bilmirlər. Sadəcə olaraq, yaranmış vəziyyətdən istifadə etmək üçün çıxışlar edirlər. Gələnlər nə edəcək? Bizimlə savaşacaq? İndi bəzi ermənilərin, xüsusilə də Paşinyanı devirmək istəyənlərin bir sözü var ki, guya bunlar vuruşurmuşlar, amma Paşinyan təslim olub. Guya iddia edirlər ki, əks hücumlarla işğaldan azad edilmiş əraziləri yenidən ala biləcəklərmiş. Müharibə dayandığı üçün bu cür bəyanatlar çoxalıb. Bir neçə gün sonra bu cür bəyanatlar və açıqlamaların sayı artacaq. Bu isə cəmiyyətdə nüfuz qazanmaq üçün deyilən sözlərdir”.