Forbes 2026-ci il  milyarderlər siyahısı yenilədi: Rus milyarderlərin sayı rekord həddə çatdı

Dünyanın ən nüfuzlu iqtisadi jurnallarından biri olan Forbes 2026-cı il üçün milyarderlər siyahısını yeniləyib. Yeni siyahıya Rusiyadan daha 14 nəfərin daxil edilməsi ilə ölkədən olan milyarderlərin ümumi sayı 155-ə çatıb. Bu göstərici jurnalın indiyədək apardığı hesablamalar tarixində ən yüksək rəqəm hesab olunur. Rus milyarderlərin ümumi sərvəti isə rekord səviyyəyə — 696,5 milyard dollara yüksəlib.

Siyahıya daxil olan yeni rus milyarderlər

Forbes-un məlumatına görə, siyahıya daxil edilən yeni milyarderlər müxtəlif sahələrdə fəaliyyət göstərirlər. Onların arasında dərman istehsalı, qida sənayesi, bank sektoru və metallurgiya kimi sahələrdə böyük biznes qurmuş şəxslər var.

Yeni adlardan biri "Promomed" dərman şirkətinin qurucusu Petr Beliydir. Şirkət Rusiyada məşhur diabet dərmanı Ozempic-in analoqunun istehsalı ilə tanınır. Beliyin sərvəti təxminən 1,1 milyard dollar qiymətləndirilir.

Digər yeni milyarder Sergey Kasyanenkodur. O, Rusiyanın ən böyük çay və qovrulmuş qəhvə istehsalçılarından olan "Orimi" şirkətinin həmtəsisçisidir və sərvəti 1,1 milyard dollar civarındadır.

Siyahıya həmçinin Macarıstanda yaşayan Ruslan və Timur Rahimkulov qardaşları da daxil edilib. Onlar tanınmış iş adamı Megdet Rahimkulovun oğullarıdır və Macarıstanın aparıcı şirkətlərindən olan OTP Bank və neft-qaz şirkəti MOL-da pay sahibidirlər. Qardaşların sərvəti müvafiq olaraq 1,9 və 1,8 milyard dollar qiymətləndirilir.

Yeni milyarderlər arasında aşağıdakı şəxslər də yer alır:

Aleksandr Tkaçev – “Agrokompleks” şirkətinin sahibi, Rusiyanın keçmiş kənd təsərrüfatı naziri və Krasnodar vilayətinin sabiq qubernatoru (1,8 milyard dollar);

Vitaliy Maşçitskiy və ailəsi – alüminium şirkəti "Vimetco"nun nəzarət səhmdarları (1,5 milyard dollar);

Vadim Vikulov – Rusiyanın böyük taxıl və günəbaxan yağı ixracatçılarından olan "Aston" şirkətinin rəhbəri (1,5 milyard dollar);

Aleksandr Rakşin və ailəsi – "Mariya-Ra" pərakəndə satış şəbəkəsinin qurucusu (1,4 milyard dollar);

Mark Kurtser – “Ana və Uşaq” brendi ilə tanınan "MD Medical Group" şirkətinin sahibi (1,3 milyard dollar);

Grigoriy Anikeyev – qida istehsalçısı "ABI Produkt" şirkətinin rəhbəri (1,3 milyard dollar);

Valeriy Kustov –"Efko" qida şirkətinin idarə heyətinin sədri (1,1 milyard dollar);

Sergey və Yevgeniy Mihaylov qardaşları – "PAO Çerkizovo" qrupunun sabiq sahibi İqor Babayevin oğulları (hər biri 1,1 milyard dollar);

Vladimir İvanov – "Yandex" şirkətinin Rusiyadakı fəaliyyətinin satışından sonra "Nebius" adı ilə fəaliyyət göstərən qurumun səhmdarı (1,1 milyard dollar).

Rusiyanın ən varlı iş adamları

Forbes-un siyahısında Rusiyadan olan ən varlı şəxs "Severstal" metallurgiya şirkətinin sahibi Aleksey Mordaşovdur. Onun və ailəsinin sərvəti 37 milyard dollar olaraq qiymətləndirilir və bu göstərici ilə qlobal siyahıda 57-ci yerdə qərarlaşıb.

İkinci yerdə "Interros" holdinqinin və "Norilsk Nickel" şirkətinin rəhbəri Vladimir Potanin dayanır. Onun sərvəti 29,7 milyard dollardır və ümumi siyahıda 79-cu sıradadır.

Son iki ildə rus milyarderlər arasında lider olan "LUKOIL" şirkətinin qurucusu Vahid Ələkbərov isə 29,5 milyard dollar sərvətlə üçüncü yerə geriləyib və qlobal siyahıda 81-ci mövqedə qərarlaşıb.

 Qlobal milyarderlər siyahısında rekord

Forbes bildirir ki, 2026-cı il siyahısında ümumilikdə 3428 milyarder yer alıb. Bu, 2025-ci illə müqayisədə təxminən 400 nəfər çoxdur.

Dünyanın milyarderlərinin ümumi sərvəti isə ötən illə müqayisədə 4 trilyon dollar artaraq 20,1 trilyon dollara çatıb.

Ölkələr üzrə bölgüdə ən çox milyarder 989 nəfər ABŞ-dadır. Hətta siyahının ilk 20 pilləsində olan şəxslərin 15-i amerikalıdır. Çin və Honq-Konq 610 milyarderlə ikinci, Hindistan isə 229 milyarderlə üçüncü yerdə qərarlaşıb.

Bloomberg agentliyinin məlumatına görə isə 2026-cı ilin əvvəlindən bəri Rusiyanın ən varlı iş adamlarının ümumi sərvəti 19,392 milyard dollar artaraq 318,48 milyard dollara yüksəlib. Agentlik öz reytinqində ilk üçlükdə Vladimir Potanin, Aleksey Mordaşov və Novatek şirkətinin ortaq sahibi Leonid Mihelsonu göstərib.

Beləliklə, 2026-cı ildə qlobal iqtisadiyyatda milyarderlərin sayı və sərvəti rekord səviyyəyə çatmaqda davam edir.

Sozcu.info