Xəbər verdiyimiz kimi, ötən ay Şəmkirdə iş adamı Arzu Cabbarov damarlarının kəsilməsi nəticəsində aldığı xəsarətlərdən xəstəxanada dünyasını dəyişib. Bir neçə gün öncə isə sosial şəbəkələrdə Yeganə Yusifova adlı qadının çıxışı yayımlanıb və o, A.Cabbarovun polislər tərəfindən qurulan plan nəticəsində öldüyünü iddia edib. Belə ki, qadın Şəmkir Rayon Polis Şöbəsinin rəis müavini Bayram İsmayılovun onu iş adamına qarşı qurulan planda iştiraka məcbur etdiyini bildirib. Y.Yusifova iddia edib ki, tapşırığa əsasən, o, iş adamı ilə görüşərək intim görüntülərini çəkməli və bundan ona qarşı şantaj kimi istifadə etməli imiş. Əvəzində isə rəis müavini onun barəsində RPŞ-də olan şikayətləri (Polis Şöbəsinə qadının dələduzluq əməlləri ilə bağlı müraciətlər daxil olub-red.) xitam edəcəyini, bundan başqa ona pul verəcəklərini vəd edib.

DİN-in Mətbuat Xidmətinin şöbə rəisi, polis mayoru Elşad Hacıyev "Qafqazinfo"ya açıqlama verərək sosial şəbəkələrdə yayılan iddiaların əsassız və böhtan xarakterli olduğunu bildirib: “Bu iddiaların kökündə o dayanır ki, ailə üzvləri A.Cabbarovun ölümünün təşkil olunmasını bildirməklə, Yeganə Yusifovanın evində olması, həmin qadının polisə döyülməsi və təhqir olunması barədə şikayətinin mahiyyətini dəyişdirsinlər.

Xəbəri rus dilində oxuyun: МВД об обнаружении тела пропавшего индийского туриста в Загатале - Фото

Fotoda: Yeganə Yusifova

Çünki ailə istəyir ki, Şəmkir rayonunda mərhum barədə yayılan qeyri-etik məzmunlu faktları ört-basdır etsin, ölümün səbəbkarı kimi Şəmkir Rayon Polis Şöbəsinin  əməkdaşlarını göstərilsin. Ancaq bu uydurma iddialar həqiqətin üstündən xətt çəkmək gücündə deyil, istintaqda əsaslı sübutlar var.

Y.Yusifovanın evində baş verən münaqişədə qapı şüşəsinin sınmasından xəsarət alan şəxsin həmin gecə qadın tərəfindən hansı məqsədlə evə çağırılması faktı, eləcə də, mərhumun “Viagra” dərmanından istifadə etməsi bütün suallara cavabdır”.

DİN rəsmisi vurğulayıb ki, Y.Yusifovanın ona təzyiq olunması ilə bağlı iddialarına gəlincə, onun dələduzluq əməlləri ilə bağlı 5-dən artıq epizod üzrə cinayət faktı var və istintaq gedir: "Bütün iddialar faktsız olmaqla subyektiv mülahizələrə əsaslanır və digər xüsusatlar da istintaqla araşdırılır".

İş adamının həyat yoldaşı Zəminə Əhmədova isə DİN-in mövqeyi ilə razılaşmayıb. O, “Qafqazinfo”ya müraciət edərək ərinin intihar deyil, polislərin yetirdiyi xəsarət nəticəsində öldüyünü iddia edib. Qadın bildirib ki, sahibkarlıq fəaliyyəti ilə məşğul olan əri 4 ildir ki, Şəmkir Rayon Polis Şöbəsinin rəis müavini Bayram İsmayılovla mübahisəli olub: 

“Bayram tez-tez Arzudan pul tələb edirdi, yoldaşım da deyirdi ki, qanuna uyğun işləyirəm, sənə nə üçün pul verməliyəm? Arzu ona deyirdi ki, sənə heç vaxt pul verməyəcəyəm. Bayram İsmayılovun göstərişi ilə Feyruz və Etibar adlı polislər qabaqcadan hazırlanmış ssenariyə uyğun olaraq Yeganə Yusifova adlı qadın vasitəsilə Arzunun intim videosunu çəkib hədələyərək pul istəyiblər. Mayın 7-də Şəmkirdə yerləşən “SUM 28” deyilən yerdə plana uyğun olaraq Feyruz adlı polis əvvəlcədən ora gedib. Saat 17 radələrində Arzu otaqda olarkən Feyruz əlində telefonla çəkiliş edərək həmin otağa daxil olub və Arzu ilə mübahisə ediblər. Həmin vaxt pəncərənin şüşəsi sınıb, Feyruz yerdən şüşə qırıntısını götürərək Arzunun qoluna zərbələr endirib. Sonuncu zərbə Arzunun sol əlinin damarını kəsib.

Fotoda: Arzu Cabbarovun xəstəxanaya aparıldığı iddia edilən maşın

Daha sonra elə həmin yerdə olan digər polis Etibar ərimi öz maşını ilə Şəmkir xəstəxanasına aparıb. Ardınca da hadisəni gizlətmək üçün Yeganəni polis şöbəsinə aparıb 1 həftə orada saxlayıblar. Orada Yeganəni döyərək xəsarət yetiriblər ki, ekspert gələndə həmin izləri görsün. Plan belə qurulub ki, guya Arzu Yeganə ilə mübahisə edərək onu döyüb, münaqişə vaxtı da özü xəsarət alıb. Yeganə bizə səs yazıları təqdim edib. Həmin səsdə ekspertin onların istədiyi kimi rəy verdiyi deyilir. Üstəlik, Yeganə şöbədən buraxıldıqdan sonra polislər ona Gəncədə kirayə mənzil tutublar, 300 manat da pul veriblər. Bank kartına 4 dəfə pul göndəriblər. Bunların da səs yazıları və qəbzləri əlimizdədir. Təzəlikcə, Yeganə ilə rəis müavini arasında olan vatsap yazışmaları da bizə təqdim edilib. Səs yazıları istintaqa təqdim ediləcək. Şəmkir RPŞ-nin rəis müavini Bayram İsmayılovun Feyruz və Etibarla əlbir olaraq hədə-qorxu ilə sahibkarlardan pul yığmasını sübut edən çoxlu faktları istintaqa təqdim edəcəyik. Şəmkir xəstəxanasına da müraciət etmişik ki, Arzunu ora kimin gətirdiyini bilmək üçün kamera görüntüləri verilsin”.

Zəminə Əhmədovanın iddiaları ilə bağlı yenidən DİN-in Mətbuat Xidməti ilə əlaqə saxladıq. Xidmətin şöbə rəisi Elşad Hacıyev bildirdi ki, iddialar tamamilə absurd və əsassızdır.