Milli Məclis “8 Noyabr - Zəfər Günü münasibətilə amnistiya elan edilməsi haqqında” layihəni müzakirə edərək, bir oxunuşda qəbul edib. Azərbaycan Prezidenti İlham Əliyev tərəfindən irəli sürülən təşəbbüsün qəbulu ictimaiyyət tərəfindən çox müsbət qarşılanıb. Amnistiya aktının 17 minə yaxın məhbusa şamil olunacağı gözlənilir.  
Milli Məclis sədrinin I müavini, parlamentin Hüquq siyasəti və dövlət quruculuğu komitəsinin sədri Əli Hüseynlinin amnistiya ətrafında dediyi bu fikirlər diqqət çəkib: “Akta əsasən, təxminən, 3 min məhkum azadlığa buraxılacaq. Ehtiyatsızlıqdan cinayət törətmiş 1000-dən çox şəxs, himayəsində uşağı olan, təxminən, 600 nəfər və təxminən, 100 qadın amnistiyaya düşəcək. Onu da qeyd edim ki, indidən dəqiq rəqəmləri söyləmək çətindir. Rəqəmlərin, təqribən, bu istiqamətdə olacağı gözlənilir”.
“Biz bütün şəhid ailələri və qazilərin müraciətlərinə həssaslıqla yanaşırıq”. Bu fikirlər də Ə.Hüseynliyə məxsusdur
Deputat bildirib ki, onlar ağır və xüsusilə ağır cinayət törətmiş qohumları ilə bağlı Əfv Komissiyasının parlamentdən olan deputatlarına müraciət edə bilərlər: “1992-ci ildə olan amnistiya aktına ağır, xüsusilə ağır cinayət törətmiş şəxslər də daxil edilmişdi. Şəhid və qazi ailələrinin belə cinayət törətmiş yaxın qohumları ilə bağlı müraciətlərinə əfv məsələsi zamanı baxıla bilər”.

 Kamal Cəfərov 
Deputat Kamal Cəfərov da Amnistiya aktının qəbul olunduğu iclasda çıxış edib. Onun fikirlərində də diqqətçəkən məqamlar var: “Tariximizin ən böyük Amnistiya aktı cəmiyyətdə, respublikada böyük sevincə, şadyanalığa səbəb olub. Çünki qarşıdan gələn 8 Noyabr - Zəfər Gününü minlərlə insan evində, ailəsi ilə birgə qeyd edə biləcək. Layihə həm Birinci Qarabağ müharibəsi, həm də İkinci Qarabağ müharibəsi, Aprel döyüşləri, Tovuz hadisələri, ümumilikdə Azərbaycan Respublikasının ərazi bütövlüyü uğrunda döyüş əməliyyatlarında iştirak edən şəxslərə, medal və ordenlə təltif olunanlara, müharibədə şəhid olmuş şəxslərin yaxın qohumlarına şamil edilir.
Amnistiya yalnız həbsdən azad etməni deyil, həm də cəzanın müddətinin azaldılmasını ehtiva edir. Belə ki, 3 ildən artıq olmayan müddətə azadlıqdan məhrumetmə cəzasına məhkum olmuş şəxslərin cəzası 6 ay azaldılacaq. Bu maddənin 3 mindən çox şəxsi əhatə edəcəyi proqnozlaşdırılır. Böyük ictimai təhlükə törətməyən şəxslər üçün 1 il, az ağır cinayət törətmiş şəxslərin isə həbsdən çıxdıqdan sonra üzərlərində 2 il məhkumluğu olur. Bu amnistiya ilə azadlığa çıxan şəxslərin üzərindən məhkumluq da götürüləcək.
Elə hallar var ki, bəzi şəxslər barəsində Amnistiya aktında göstərilən maddələr üzrə hökm olmasa da, prokurorluq orqanlarında istintaq aparılır və ya məhkəmə icraatı olur.
Bu amnistiya ilə prokurorluq orqanları həmin şəxslər barəsində cinayət təqibi başlamayacaqlar, başlayıbsa da, xitam verəcəklər, eyni zamanda məhkəmələr həmin şəxsləri cəzadan azad etməklə ittiham hökmü çıxaracaq".
Deputat amnistiya tətbiqinə məhdudiyyətlərləbağlı qeyd edib ki, korrupsiya cinayətləri, vəzifə səlahiyyətlərdən sui-istifadə, dövlət büdcəsindən təyinatı üzrə istifadə etməmə, vəzifə səlahiyyətlərini aşma, rüşvət vermə və digər cinayətlər bu amnistiyanın əhatə dairəsinə daxil deyil: “Yekunda isə qeyd etməliyəm ki, bu amnistiya vətənimizin ərazi bütövlüyü ilə bağlı hər hansısa formada zərər görən bütün şəxslərə şamil edilir. Ona görə də həm əhatə dairəsinə, həm də mahiyyətinə görə qarşıdan gələn Zəfər Gününə layiq bir aktdır, Prezidentin xalqa hədiyyəsidir”.
“Hazırkı Amnistiya aktı cinayət törətmiş şəxslərin cəzadan azad edilməsi, şəxslərə təyin olunmuş cəzanın müddətinin azaldılması, məhkumluğun götürülməsi və cinayət təqibinə xitam verilməsi formasında reallaşacaq”.

Bəhruz Məhərrəmov 
Bunu da APA-ya açıqlamasında Milli Məclisin deputatı Bəhruz Məhərrəmov deyib. O, qərar layihəsində amnistiya tətbiqinə qoyulan məhdudiyyətlərin də nəzərdə tutulduğunu bildirib: “Cinayət Məcəlləsinin epidemiya əleyhinə rejimin, sanitariya-gigiyena və ya karantin rejimlərinin pozulmasını ehtiva edən 139-1 maddəsi də həmin məhdudiyyətlərin dairəsinə daxildir. Bilirsiniz, amnistiya humanist iradə ifadəsidir, lakin amnistiya aktı hazırlanarkən real situasiya nəzərə alınır ki, şəxsiyyət, cəmiyyət və dövlətin cinayətkar qəsdlərə məruz qalma ehtimalı minimallaşdırılsın. Bu maddənin məhdudiyyətə məruz qalmasına gəlincə, pandemiya davam etsə də, vurğulamalıyıq ki, Cinayət Məcəlləsinin 139-1 maddəsinin sanksiyasına məruz qalan vətəndaşların sayı elə də çox deyil.
Cərimə sayının çox olması barədə deyilənlərə gəldikdə, karantin rejiminin pozulmasına görə tətbiq edilən cərimələrin tam mənada əksəriyyəti cəza yox, inzibati tənbeh tədbiridir. Yəni bu əməllər Cinayət Məcəlləsinin 139-1-ci maddəsi yox, İnzibati Xətalar Məcəlləsinin 211-ci maddəsinin sanksiyasına məruz qalıb. Ümumiyyətlə, statistikaya baxsaq, Cinayət Məcəlləsinin 139-1-ci maddəsi çox az, yalnız xüsusi hallarda tətbiq edilir".

Novella Cəfəroğlu: “Bilmirik ki, onlar azad olunacaq, ya yox”
İnsan Hüquqları üzrə Birgə İşçi qrupunun üzvü Novella Cəfəroğlu bir az gileyli danışdı: “Biz bir yerə yığışıb, bu məsələni müzakirə etdik. Açığı deyim ki, çox iradlar var. Amnistiya çox gözəl bir şeydir. Minlərlə insan öz ailəsinə qovuşacaq. Amma bir şey var ki, Amnistiya aktı qəbul edilməmişdən əvvəl müstəqil hüquq müdafiəçilərini, QHT-ləri bir araya gətiribməsləhətləşmələr aparmalı idilər. Hansı maddələr ora düşməlidir, amnistiya vacibdirmi? Bu suallar verilməli idi. Hazırda bütün dünyadan bizə çoxlu təzyiqlər var. Elə maddələr ora salınmalıdır ki, siyasi motivlərlə olan məhbuslar da azad olunsun. İndi biz bilmirik ki, kimlər azad olunacaq, kimlər qalacaq. Mən çox istərdim ki, Saleh Rüstəmli ora düşsün. O, I Qarabağ savaşı zamanı Gədəbəyin icra başçısı kimi böyük şücaətlər göstərib. Jurnalistlərin, blogerlərin çıxmasına səbəb olacaq maddələr də ora salınsa, çox yaxşı olardı. Yəni bunlar əfvə qalmasınlar. OMON-çular, ”Qaranquş"lar, Qarabağ partizanı kimi ömürlüklər var. Müharibələrdə olublar. İndi bilmirik ki, onlar azad olunacaqlar, ya yox. Biz dünyaya göstərə bilərdik ki, bu amnistiya doğrudan da hamıya şamil olunub. Ömürlüklərin işinə ayrı baxılmalıdır. Bu gün hər yerdə o qədər özbaşınalıq baş alıb gedir ki, hərə bir söz deyir".

Əliməmməd Nuriyev: “Bu cinayətlər də Amnistiya aktına daxil deyil”
Prezident yanında Əfv Məsələləri Komissiyasının üzvü Əliməmməd Nuriyev hansı kateqoriyadan olan insanların amnistiyaya düşməyəcəyini açıqladı: “MTN işi” çərçivəsində həbs olunanlar amnistiyaya düşmürlər. Çünki onlar ağır cinayətlərdə ittiham olunublar. Ağır və xüsusilə cinayətlərə yol vermiş şəxslərdir. Bu cinayətlər də Amnistiya aktına daxil deyil. Ağır cinayətlərdə ittiham olunanlar o zaman amnistiyaya düşürlər ki, cəzalarının bitməsinə 6 ay qalır. Amnistiya müəyyən kateqoriyalı şəxslər və konkret cinayətlərlə bağlı olur. Burada konkret şəxslərin dairəsini müəyyənləşdirmək mümkün deyil. Həmin şəxslər barəsindəki konkret maddələrə baxmaq lazımdır ki, Cinayət Məcəlləsinin hansı maddələri ilə məsuliyyətə cəlb olunublar, yaxud məhkum ediliblər. Buna uyğun şəkildə dəyərləndirmə aparmaq olar. Amnistiya qeyri-müəyyən şəxslər dairəsinə aid olur".[spoiler][/spoiler]